Қарапайым еңбек адамдары кез келген қиыншылықтан өз еңбегінің арқасында ғана тауды да, тасты да бұзып, барлығын еңсере алатыны сөзсіз. «Еңбек – бәрін де жеңбек» деген рас сөз. Қазіргі таңда еңбектің мән-маңызы арта түскені ақиқат. Еңбек еткеннің еңсесі биік деген ғой. Әрбір саналы адам өзінің еткен еңбек жолымен дараланады. Кесек істерімен көпке үлгі-өнеге болады. Өзіне ғана емес, еліне де пайдам тисе деп тұратын азаматтар арамызда аз емес. Ұлағатты істерімен, қарапайым да адамгершілік қасиеттерімен көптің құрметіне бөленіп жүрген жандар жетерлік. Білімі терең, тұлғасы кесек, өмір көшінде өзгеден ерек, ой байламы бөлек көрініп тұратын ағаларымыздың бірі Шәкімбаев Талғат Шәкімбайұлы жайлы кеңінен тарқатып әңгіме шертпекпіз.
      Шәкімбаев Талғат Шәкімбайұлы 1960 жылы 14 шілдеде Гурьев облысы (қазіргі Атырау облысы), Қызылқоға ауданы, Сағыз станциясында (Сағыз селолық округі) теміржолшылар отбасында дүниеге келген. Әкесі Ермекбаев Шәкімбай Сағыз теміржол станциясында көп жылдар «стрелочник» болып қызмет етіп, 1968 жылы өмірден өткен. Анасы Жұманова Анипаш құрметті еңбек демалысына шыққанша теміржол бойында «монтер пути» (жол жөндеуші) болып қызмет етті.
      Талғат Шәкімбайұлы мектеп кезінде өзінің ақылдылығымен, алғырлығымен, зеректігімен, уәдесіне деген беріктігімен, ұйымдастырушылық қабілетімен көзге түсіп, ұстаздарының мақтанышы болды. Қолынан кез келген іс келетін іскерлігімен де дараланып тұратын. 
      Сағыз станциясындағы теміржол бойында мектебін бітіріп, Сағыз селосындағы №112 орта кәсіптік техникалық училищесіне түскен Талғат Шәкімбайұлы бір жыл оқып, кәсіптік білім алып шыққан соң, өзінің алғашқы еңбек жолын 1976 жылы Гурьев теміржол станциясының Сағыз бөліміне жол жөндеуші болып бастайды.
      Өзінің шаруасына берік, тапсырған ісіне тиянақтылықпен қарай білетін, табанды жас жігіт 1978 жылы Алматы индустриалды техникумына оқуға түсіп, 1982 жылы «Өндірістік жабдықтарды монтаждау және жөндеу» мамандығы бойынша бітіріп шығады. 1982 жылы оқу бітіре салысымен Москва қаласында отан алдындағы борышын өтеп, 1984 жылы әскер қатарынан елге оралған Талғат Шәкімбайұлы 1984 жылы мамыр айынан бастап Сағыз транспорттық мекемесіне диспетчер болып қабылданды.
      Қайсыбір істі бастаса да барлық күш-жігерін салып еңбектенетін жасты аға мамандар мен басшылық құрам бірден-ақ жақсы көріп кететін. Үлкенге іні, кішіге ақылшы аға бола білетін Талғат Шәкімбайұлының тағы бір қыры, ешқашан адамның бетіне келіп, қатты сөйлемейтіндігі дер едік. Кім кімнің болмасын жағдайына түсіністікпен қарап, қолынан келіп жатса көмегін аянбайтын азамат. Қандай жағдайға болмасын өзін сол адамның орнына қойып, барлығын егжей-тегжейлі ойланып барып ақылмен шешім қабылдай білетін азамат. Үлкен-кішіге құрметі бірдей. Сіз бен бізден ажырамайтын, ілтипат-ізеті мол. Көмек сұрағанның қолын кері қайтармайтын жомарттығы тағы бар. 
      Кейін «Сенімді Құрылыс» мекемесіне диспетчер болып қабылданып, онда да абыроймен қызметін атқарып шықты. 2011 жылы Қызылқоға өңіріне газ құбыры жүргізіліп, «ОблТрансГаз» Қызылқоға аудандық жөндеу және пайдалану бөлімінің Сағыз бөлімшесіне 7 разрядты шебер лауазымына жұмысқа қабылданған Талғат Шәкімбайұлы қаупі көп жұмыстың қауіпсіздік шараларын халыққа түсіндіре, бірлесе жұмыс жасап, құрметті зейнет демалысына шыққанша абыроймен еңбек етті.
      «Адал еңбек адамды қуанышты сезінуге, өзіне деген сенімділікке жетелейді, бақытқа, байлыққа жеткізеді. Еңбексүйгіш адам айналасына да сыйлы, беделді болады. Әрқашан өз ісімізге адал болып, еңбектің тәтті дәмін сезіне білсек, нағыз бақыт деген, міне, осы. Адал еңбекті бағалап, қадірлеуді ата-анамыздан бала кезімізден бойымызға сіңіріп өстік. 
      Әкеміз күн ұзақ еңбектен шаршап келсе де, үйге келген соң да дала еңбегінен қол үзбейтін. Қарап отырған адамға дайын дүние жоқ қой. Әкеміздің қайраттылығына, қайсарлығына, еңбекқорлығына, дариядай ақылына тәнті болатынбыз. Белі бүгілмей еңбектен рахат тапқан жан. 
      Анамыз өте мейірімді, қамқор жан. Өзгенің баласының самайынан сипап, құшағына қысып, дастарханға отырғызып, ас-дәм таттырмай жібермейтін. Үйге келген әрбір адамды «құтты қонақ» деп дастарханын жайып, ыстық шайын ала жүгіретін. Біз үлкен шаңырақ болдық.
      Үлкен-кішілеріне қамқор болып, бірінің айтқанын бірі істейтін. «Жетпей жатыр», «Жоқ» дегенді айтпадық та. Қанағатшылдық біздің отбасының ұранындай еді. Әкеміз ылғи да «қанағат қарын тойдырады, барға қанағат еткен адам, көпке қол жеткізеді», - дейтін. Бала болып сол сөзді түсінбейтін де едік. Міне, қазір сол сөздің төркінін түйсіндік. Ата-анамыздың осындай өнегелі істерінің, ақылдарының арқасында бой түзеп келеміз. Балаларыымызға да соны айтып түсіндіріп, ата-ана жолымен тәрбиелеп келеміз. Аллаға мың да бір шүкір, еңбегіміздің жемісін көріп келеміз» – деген Талғат Шәкімбайұлы ұзақ жылғы мінсіз еңбегінің арқасында Қазақстан Республикасының Тәуелсіздігіне 30 жыл толу мерекесіне орай Құрмет грамотасымен, аудандық, округтік әкімдігінің грамоталарымен марапатталды.
      Адалбақынын тік ұстап шаңырағын көтерген мерейлі отбасында Талғат Шәкімбайұлы жары, Алматы теміржол транспорты инженерлері институтының өндірістік және азаматтық құрылыс мамандығы бойынша бітіріп, осы Сағыз елді мекенінде құрметті демалысқа шыққанша еңбек еткен Шәкімбаева Саржанмен екеуі 3 ұл, 1 қыз тәрбиелеп өсірді. Барлығы да жоғарғы оқу орындарын бітіріп, қызметтерін жасап жатыр, отбасылы. Қазіргі таңда немерелерін қызықтап, оларды тәрбиелеуге көмектесетін ардақты ата.
      Талғат Шәкімбайұлының орнықты ойлылығы, іскерлігі, байқағыштығы, білімдарлығы, азаматтығы мен адамгершілігі, көсемдігі мен шешендігі, абзалдығы мен ағалығы, арлығы жоғары деңгейде екені рас. Мінезінің ерекшелігі – адамның көңіл кілтін таба білетіндігі. Әділетті, шынайылықты жаны сүйеді. Қайнардай таза мөлдір көңілімен, кең жүрегімен, мейірімділігімен жақындарын ғана емес, қалың көпшіліктің көңілінен шығып жүргені анық. Азаматтық тұлғасы мен адами қадір-қасиеті, кемел келбеті мен кісілігі, биік болмысы оның жоғары парасат иесі екеніне еріксіз бас идіртеді.
      Иә, өз бақытын еңбектен тапқан азаматтың мұрат еткен ісін абыроймен атқарып, әлі де елге берері мол. Қашанда абырой биігінен көрініп, биіктерді бағындыра беріңіз ел ағасы!