Ұстаздық деген кең ұғым, қастерлі мамандық. Бұл мамандық иелерінің жауапкершілігі де мол, атқаратын жұмыстары да ауқымды. Қызығы мен шыжығы қатар жүретін осынау маңызды салаға бүкіл өмірін арнап, қаншама мамандығының майталманы атанып жүрген үлгі етерлік тұлғалар жетерлік. Бүгін біз сөз еткелі отырған жан білім саласының ауыр жүгін арқалап, қатардағы шәкірттерінен білімді болашақ мамандарды дайындап, көптің көңілін тауып, сүйіспеншілікпен басталған сүйікті ісі белестерді бағындыруына сеп бола білген ел ардақтысы – Малдыбай Құлжабай Ажметұлы.
      Құлжабай Ажметұлы еліміздің оңтүстік өңіріне қарасты Алматы облысы, Кеген ауданы, Күрметі (бұрынғы атауы Таушелек) ауданында 1948 жылы сәуір айының 15 жұлдызында дүниеге келген. Соғыс аяқталса да, сол жылдары дүниеге келген сәбилердің балалық шағы жарқын естеліктерге тола болды деп ауыз толтыра айта алмаймыз. Құлжабай балалық шағын аталған өңірде өткізіп, алғаш мектеп табалдырығына қадам басады. Өңірдегі мектептің 8-сыныбын бітіріп, білімін одан әрі 1966 жылы Жалаңаш ауылында орналасқан Срендигор орта мектебінде жалғастырып, одан сол мектептің түлегі атанады. Мектеп қабырғасынан спорт десе ішкен асын жерге қоятын ер азаматымыз әрдайым қоғамдық іс-шараларда бой көрсетіп жүрді. Аудан орталығында өткен түрлі іс-шараларда волейболдан, футболдан өзінің ептілігімен, шымырлығымен көпті тәнті ете білді. Әрі аталмыш сайыстардан арнаулы грамоталарға қол жеткізіп, өзінің шебер спортшы екендігін дәлелдей білді. Ел азаматының шапшандығына сүйсінген көрермен "Жарайсың, Құлжабай!" деп қошемет сөздерін арнап, аудандық газеттерге мақала жариялағаны да бар. 
      Еліміздің әрбір ер азаматы Отан алдындағы борышын өтеуге міндетті. 1967 жылы мектептен түлеп ұшқан Құлжабай Ажметұлы Кеңес әскері қатарына шақырту алып, Отан алдындағы борышын өтеуге Ресейдің Воронеж қаласына аттанады. Адам өзі жеткен биігінде тоқтап қалмау керек. Үнемі биікке ұмтылып, алға жылжу керек екенін есте ұстаған Құлжабай Ажметұлы әскер қатарында бола жүріп, волейболдан, баскетболдан 1-разряд нормасын орындап шығады.
      Қазақ халқы "Дені саудың жаны сау" деген мақалды тегін айтпаған. Жаугершілік кезінде ат үстінде жүріп ақ найзамен жерін, елін жаудан қорғаған, бейбіт кезде ат үстінде малын баққан, мерекеде неше түрлі спорттық ойындармен елінің көңілін көтерген қазақтың еңбектеген баладан еңкейген қариясына дейін спортпен айналысқан деп айтсақ еш артықшылығы болмайды. Өйткені өнер мен спорт – қазақтың өмірінің негізі. Жас ер бала дүниеге келісімен ол ертеңгі елінің қорғаны, ата-анасының иек артар тірегі екенін есте ұстаған. Əрбір ата-ана баласының үй шаруасына көмектесе жүріп шынығатынын, ерік-жігері мықты, дені сау азамат болатындықтан жас кезінен еңбек етуге, ойынын ойнап, тойын тойлап еркін өсірген. Сондықтан ауылдан шыққан балалар арасынан спорттың қай түрі болса да айналысса спорт шеберлері көптеп шығатынын өмір көрсетіп келеді. Сондай азаматтардың бірі де бірегейі атана білген Құлжабай Ажметұлы әскерден оралғаннан кейін "Алғабас" совхозының дирекциясы спорт нұсқаушысы етіп жұмысқа қабылдайды. Мұнда да өзінің нақ өз ісінің шебері, спорт майталманы екенін байқаған мектеп басшылары дене шынықтыру пәнінің мұғалімі болуды қалайды. Ұстаздық жолға қадам басқан Құлжабай Ажметұлы өз ісіне деген тиянақтылығы мен жауапкершілігін еш уақытта естен шығарған жоқ. Ол жексенбі күндері де баскетбол, волейбол, футбол үйірмелерінен жетекшілік етіп, өзі де балалармен бірге үзбей жаттықтырушы ретінде дәрістерден қалмай жүрді. Нәтижесінде спорт үйірмелері совхоз бойынша ең үздік ойыншылар қатарынан орын алды.       Қызметтік жолда өзгерістер орын алып, ел азаматы 1969-1970 жылдарындағы оқу жылын жаңа мектепте дене шынықтыру пәнінің ұстазы ретінде жалғастырды. Осы жылдың қазан айында облыс құрамы командасымен бірге қол добынан республикалық жарыста бой көрсетті. Нәтижесінде чемпион дәрежесіне ие болды. Әлі бабында екендігіне көзі жетті ме, әлде өзі жеткен жетістіктерге енді шәкірттері жетсе деген ізгі ниет пе ұстазымыз енді бала жанының бағбаны болуды місе тұтты. Теориялық тұрғыда қарулануды жөн санаған ел азаматы 1971 жылы Алматы шаһарында орналасқан дене шынықтыру институтына оқуға түсіп, студент атанады. Жоғарғы оқу орнында да институт атынан баскетбол командасымен жарысқа қатысып, жүлделі орындарға ие болып жүрді. 1975 жылы дене шынықтыру пәні мұғалімі мамандығына қол жеткізеді. Ұстаздық еңбек жолын Еңбекшіқазақ ауданы Ақши ауылындағы орыс, қазақ аралас орта мектепте Ақши (қазіргі Бөлек батыр) мектебінде кәсіби мамандығы бойынша дене шынықтыру пәнінен сабақ береді. Оқушылары ауданда өткен жарыстарда жеңіске жетіп, мектептің беделін көтеріп, ұстаз мерейін үстем ете білді. Құлжабай Ажметұлы ауыл ішінде де осы бір тындырымды істерінің арқасында үлкен беделге ие болды. Нәтижесінде ауыл халқы ел азаматын ауданға депутат етіп тағайындады.
       Ел намысын бəрінен биік қоя білген Құлжабай Ажметұлы өзінің мансаптық жолын одан әрі 1980-1981 жылдары аралығында Ішкі істер басқармасының шақыртуы бойынша жасөспірім тәрбиелейтін полиция қызметіне офицерлік дәрежеге ауысып, осы аудандағы Есік қаласында учаскелік инспектор болып жұмыс істейді. Мектептерде жиналыстар өткізіп, жастарды отансүйгіштікке, қоғамдық тәртіпке баулып, спортқа бір табан жақын болуға шақырды. Әрдайым қоғамға пайдасын тигізгісі келетін ел азаматы өз мақсат-міндетін мүлтіксіз орындай білді. Ішкі істер басқармасында жұмыс жасаған сегіз жылының ішінде міндетін абыроймен орындап, жоғары талапшылдық көрсеткіші үшін "Тындырымды инспектор" деген тақырыппен аудан газеттерінде есімі ерекше аталып, халық ілтипатына бөленіп жүрді. Ұстаздықтан басталған ұлы іс ұзақ жылдар бойы Қазақстан Республикасы Ішкі істер министрлігінде қызметімен жалғасын тапты. Нәтижесінде Құлжабай мырза 1997 жылы милиция майоры ретінде зейнеттік демалысына қол жеткізді. Екі қолды бос қоймай, 2013 жылға дейін күзетте жұмыс жасап, Ақши ауылының ақсақалдарының мүшесі бола жүріп, жас ұрпаққа тәлімді-тәрбие бере білді. 
      Өз ісінің шебері атана білген жан отбасында да арқасүйер азамат бола білді. Өзінің болашақ жарын кезіктіріп, 1974 жылы Жақашбаева Зәурешпен шаңырақ көтеріп, екеуі Ақши ауылының тұрғыны болды. Зәуреш анамыз қыздар педагогикалық институтының математика пәні бойынша білімін жетілдіріп шыққан кәсіби ұстаз. 1975-2013 жылдар аралығында математика пәнінің ұстазы болып, алдына келген әрбір шәкірттің ақылшы ұстазы, жанашыр жақыны бола білді. Отбасында үш ұл, екі қыз тәрбиелеп өсірді. Әрбірінің жеке тұлға болуына сеп болып, ата-ана міндетін орындай білді. Ел жақсылары 2013 жылы Іле ауданына қарасты, Боралдай ауылына көшіп келді. Құлжабай мырза мұнда келісімен Боралдай ауылдық округінің ақсақалдар қоғамының мүшесі атанды. Ұзақ жылдар бойы өзінің жинақтаған тәжірибесін жастарға үйретіп, ауыл әкімімен бірлесіп, қоғамдық жұмыстарға белсене қатысудан қол үзбеді. 
Қорыта келе, қашанда болашағын алыстан бағамдайтын қазақ «қыстың қамын жаз ойла» демеуші ме еді… Ендеше, Қазақстанның жарқын болашағы үшін қандай да бір іс тындыруға міндетті екенімізді естен шығармай, тәжірибелі ел азаматтарының еңбек жолын көпшілікке үлгі тұтайық!
      Құлжабай Ажметұлы деніңізге саулық, отбасыңызға амандық тілейміз!