Қырық жанды нәзік әйел-аналарымыздың араласпаған ортасы болмаған. Сонау қиын-қыстау зұлмат соғыс кезінде азаматтары үшін белдері қайысып, ауыр жүкті арқалап, ерлермен бірге түзде жұмысын істеп, үйде бала тәрбиесін қатар алып жүрді. Тіпті темірді тізгіндеп, атқа қамшы салдырған. Талай бұрымдылар қолына қару алып, жауға қасқайып шығып, ас үйде қазанын қайнатқан. Солай бола тұрса да өздерінің әйел атына кір келтірмеген, әйелдік қасиетінен айырылмаған. Ел басына күн туса да әйел-ана затының ешбір мойымайтын осындай қайтпас қайсар мінезі заман ауысқанымен, сипатын жойған емес. Рухы мықты, өжет талай нәзік жандылар тарих беттерінде алтын әріптермен жазылып қалды. Қазақ қоғамында талай әйел-аналардың болғанын білеміз. Олардың қатарын кейінгі толқын толықтырып отыратыны да заңдылық. 
      Сұлулық пен нәзіктікті, қажыр мен қайсарлықты бiр бойына жинаған, еңбектің ауыр кетпенін арқасына салса да еңсесін тік ұстап, ауыл шаруашылығы саласында еңбек ете білген, бүгінгі таңда құрмет пен абырой биігіне көтеріліп отырған Сәрсенбаева Клара Құралқызы қызмет атқарған нәзік жан.
      Клара Құралқызы 1961 жылы 20 наурызда Атырау облысы, Қызылқоға ауданы, Сағыз ауылдық округінде дүниеге келді. Тарихына үңілсең талай тарландардың алтын есімі менмұндалап шығатын топырағы киелі, құтты мекенде бақытты балалығын өткізіп, өмір арқанын әділдік, адалдықпен өрген әкесі Құрал мен мейірім нұры күн шуағынан да жылы анасы Кариманың мейірім-махаббатына бөленіп өсті. 
      Отбасында жылылық көрген жанның өзге ортада да күн секілді нұр шашатыны бар емес пе, бүгінгі таңда ағайынның ардақтысы, ауылдың сыйлысы, перзенттерінің құрметтісіне айналған Клара Құралқызы 1967 жылы Қазақстан темір жолының Батыс Қазақстан теміржолына қарасты Атырау облысы, Қызылқоға ауданы, Сағыз стансасының №490 орта мектебіне барып, сол мектептен 10 жылдық мектепті аяқтады.
      Ауылда өсіп, тіршілігінің негізгі тірегі болған сол бір жылдары бедел биігінен түспеген ауыл шаруашылығына қатысты мамандықты таңдаған Клара Құралқызы 1979 жылы Орал ауыл шаруашылық техникумына түсіп, ветеринар мамандығын алып шыққан соң, өзінің алғашқы еңбек жолын 1982 жылы Сағыз селосындағы Ленин атындағы совхозда ветеринар-маман болып бастайды. 
      Совхозда еңбек ете жүріп, мал арасындағы аса қауіпті жұқпалы аурулармен күресіп, ел экономикасын көтеруге күш салды. Аса қауіпті жұқпалы ауру шыққанда Мәскеудегі (ВИЭВ) Бүкілодақтық Экспериментальды Ветеринарлық Ғылыми-зерттеу институтында болып сабақ алды. 
      1990 жылы Алматы зооветеринарлық институтының ветеринарлық факультетіне түсіп, 1996 жылы жоғары білімді ветеринарлық дәрігер атағына ие болған Клара Құралқызы Одақ кезінде совхоз тарап кетуіне байланысты 1998 жылы Республикалық Ветеринариялық лабораторияның Сағыз филиалында ет-сүт тексеру лабораториясында Лаборатория меңгерушісі болып қызмет атқарды. 
      Реформалар жасалып, қиын-қыстау кезеңдер болса да өзінің таңдаған мамандығынан аяғын тартпаған Клара Құралқызы 2005 жылдан бастап Сағыз ауылдық округінің мал арасындағы аса қауіпті жұқпалы аурулар мен күрес бөлімінің меңгерушісі болып қызмет атқарып келеді. 
      Қандай істің де ортасына білек сыбана кірісіп кететін еңбексүйгіш, ауылдың қоғамдық өміріне араласуды белсенділік танытқан Клара Құралқызы ауыл тұрғындарының төрт түлігін қарап, жыл мезгілдеріне сай келетін аурулардың алдын алып, профилактикалық іс-шараларды жүзеге асыруда ауыл әйелдерінің көшбасшысы болды. 
      Осындай белсендігі, өз саласына деген адалдығының арқасында басшылық, әкімдік, шаруашылық саласы тарапынан көптеген Құрмет Грамоталары, Алғыс хаттары және мерекелік медальдармен марапатталды. Солардың ішіндегі ең даңқы жоғары наградасы – Қазақстан Республикасының І дәрежелі «Еңбек Даңқы» ордені. 
      Әйел – саясаткер, әйел – бала тәрбиелеуші, әйел – үй күтуші, әйел – заңгер, әйел – экономист. Иә, тізімді әрі қарай жалғастыра беруге болады. Әрине, әйел ең бастысы – ана. 
      «Құдайдан кейінгі құдірет – ана» деген екен бір ғұлама. Тіршілікте ананың, жалпы нәзік жанды қыз баласының рөлі ерекше. Иә, халықтың құрметіне бөлену – елге ерінбей еңбек еткен адамға ғана тән нәрсе емес пе? Бұл жерде, ең алдымен, айналаға адамгершілік қасиет әсер ететіні ақиқат. Өйткені адал еңбек ету қажеттіліктен тумайды, ол үлкен азаматтық жауапкершіліктен туындайды. Ел сенімін ақтаудың қаншалықты маңыздылығын қолынан іс келетін жанның ғана мойнына алған жауапкершілік жүгінен аңғаруға болады.
      Клара Құралқызы әйел-ана ретінде де өзінің міндеттерін орындай білген асыл жар. Арқа сүйер азаматы Асқар екеуі үш перзент тәрбиелеп өсірді. 
      Тұңғышы Алмара – Қызылорда қаласында тұрады, отбасылы, 3 баласы бар, дәрігер-терапевт. 
      Ұлы Нұрлыбек – Сағызда Өрт сөндіру бөлімінде жұмыста, жанұялы. 
      Кіші ұлы Серікболсын – Алматы қаласындағы QAZBILIM ALMATY ұлттық лицейінің оқу ісі меңгерушісі, тарих пәні мұғалімі. 
      Ауыл шаруашылығы саласында еңбек етіп келе жатқан, ұжымдастары арасындағы әділдігі, басқарушылық қабілеті және іскерлігінің арқасында қандай ортаға барса да төрден орын алатын Клара Құралқызының еңбегіне табыс, деніне саулық тілейміз!