Маңғыстау – маңдайын жел қаққан, құмының әр түйіріне көне күннің ізі сіңген киелі мекен. Көкжиекке құлаған қоңыр далада тіршілік таң шапағымен бірге оянып, кешкі шапақпен бірге саябырлайды. Түйенің боздауы, жылқының кісінеуі, қыстау түтінінің көкке баяу көтерілуі – сол өлкенің ғасырлар бойы үзілмеген үн-лебізі.
      Осындай кеңістікте ердің нарқын еңбегі өлшейді, азаматтың абыройын елдің ықыласы таразылайды. Қара қазанның қамын күйттеп, қалың жұрттың қажетіне жарауды мұрат еткен жандар қашанда ел жадында биік тұрады. Қыстың боранына, жаздың аптабына қаймықпай, төрт түліктің бабын келтіріп, туған өлкенің тынысына нәр беріп жүрген азаматтардың бірі – Кылишаев Наурыз Есбергенович. Ата кәсіптің аманатына қиянат жасамай, маңдай тердің өтеуін адал несібеден іздеген кәсіпкердің тірлігі ауыл өмірінің берекесіне ұласып келеді.
      Туған жердің топырағынан қуат алып, маңдай терді мәртебе санаған, ел ырысын еселеуді өмірлік мұрат еткен Кылишаев Наурыз Есбергенович 1989 жылғы 3 сәуірде Маңғыстау облысы Бейнеу ауданына қарасты Бейнеу ауылында дүниеге келді. Қасиетті Маңғыстаудың қоңыр даласы, құт қонған ауылдың қарапайым тірлігі, ақсақалды елдің берекелі болмысы бала жүрегіне ерте жастан еңбекке адалдықты, үлкенге құрметті, кішіге ізетті дарытты.
      Наурыз Есбергеновичтің бойындағы еңбекқорлық пен елге деген жанашырлық – бірнеше ұрпақтан жалғасқан текті тәрбиенің жемісі. Әулеттің ақсақалы Қылишаев Лесбай 1927 жылы дүниеге келіп, ғұмырын мал шаруашылығы саласына арнады. 1943–1960 жылдары колхозда жылқы бағып, кейін 1969–1987 жылдар аралығында Маңғыстау облысы Бейнеу ауданындағы «Маңғыстау» совхозында шопан болып еңбек етті. Ұзақ жылғы адал еңбегі үшін Қазақ КСР-інің Құрмет грамотасымен, «Еңбек ері» медалімен және өзге де марапаттармен марапатталып, 1978 жылы «Москвич-412», 1986 жылы «УАЗ-469» автокөліктеріне ие болды.
      Лесбай ақсақал малшылықпен қатар, жылқыға қажетті ер-тұрман, жүген, тұсау, қамшы секілді бұйымдарды жасайтын шеберлігімен де ел құрметіне бөленді. Ал арғы атасы Қылиша Маңғыстауға белгілі атбегі әрі көреген адам болған. Ашаршылық жылдары Ақтөбе облысындағы Жем өзенінің бойына тары егіп, Бозашы өңірінің халқын азықпен қамтамасыз етіп, ел басына түскен қиындықты еңсеруге өзіндік үлесін қосқан азамат ретінде халық жадында сақталды.
      Әулеттің берекесін арттырған асыл әже Қылишаева Құрманқыз 1937 жылы дүниеге келген. Ол өмірге он перзент әкеліп, олардың сегіз ұлы мен екі қызын адалдыққа, еңбекқорлыққа, білімге баулыды. Тағдырдың жазуымен, егіз нәрестелері дүниеге келгеннен кейін көп ұзамай өмірден озды. Ана мейірімі мен тәрбиесін көріп өскен перзенттері бүгінде әр салада еңбек етіп, туған өлкесінің өсіп-өркендеуіне өзіндік үлестерін қосып жүрген азаматтар мен азаматшалар.
      Наурыз Есбергеновичтің әкесі Қылишаев Есберген 1960 жылы дүниеге келіп, саналы ғұмырын төрт түлік шаруашылығына арнады. 1977 жылдан 1994 жылға дейін Бейнеу ауданындағы «Маңғыстау» совхозында шопан болып еңбек етіп, кәсібіне деген адалдығының арқасында комсомол және партия ұйымдарының түрлі марапаттары мен грамоталарына ие болды. Мал шаруашылығымен қатар шығармашылыққа да жақын болып, Бейнеу аудандық «Рауан» газетінде тілшілік қызмет атқарып, қоғамдық өмірге белсене араласты. Өкінішке қарай, 2019 жылы дүниеден озды.
      Ал анасы Тұрманбетова Тыным бүгінде зейнет жасында болса да, еңбектен қол үзген емес. Түйе сауып, шұбат пен ұлттық сүт өнімдерін әзірлеп, ағайын-туыстың ақ батасы мен алғысына бөленіп жүрген ақ жаулықты ана. Осындай еңбек пен адамгершілік қатар өрілген отбасылық тәлім-тәрбие Наурыз Есбергеновичтің өмірлік ұстанымының қалыптасуына, туған жерге адал қызмет ететін азамат болып өсуіне берік негіз қалады.
      Наурыз Есбергенұлының білім атты қасиетті сапарға бет бұрған алғашқы қадамы Маңғыстау облысы, Бейнеу ауданындағы Ақжігіт ауылында орналасқан, Екінші дүниежүзілік соғыстың батыры Мәди Қайпыұлы Бегеновтің есімі берілген мектептің табалдырығын аттаудан басталды. Болашақ азаматтың бойына білім мен тәрбиенің алғашқы негізі осы білім ордасында қаланды. Кейін оқуын Бейнеу ауданындағы Жангелдин атындағы орта мектепте жалғастырып, осы мектепті табысты аяқтады. Ұлағатты ұстаздар ұясы, талай талапкердің қанатын қатайтқан қастерлі қара шаңырақ жас шәкірттің ғылымға деген құштарлығын арттырып, өмірлік ұстанымының қалыптасуына зор ықпал етті.
      Бала күнінен-ақ зеректігімен, зерделілігімен және сабырлы мінезімен қатарластарының құрметіне бөленген Наурыз әр пәнге ерекше ықылас қойып, білім биігін бағындыруға талпынды. Сыныптағы қоғамдық жұмыстардан шет қалмай, мәдени-көпшілік және тәрбиелік шараларға белсене қатысуы оның ұйымдастырушылық қабілетін, көпшілікпен тіл табыса білетін азаматтық болмысын айқын көрсетті. Ұстаздары оның жинақылығын, парасаттылығын, жауапкершілігі мен тиянақтылығын жоғары бағалап, жарқын болашағынан үлкен үміт күтті. Әрбір тағылымды сабақ, әрбір ақыл-кеңес пен өнегелі тәрбие оның жүрегіне ізгілік пен білімге деген құштарлықтың дәнін егіп, кейінгі өмір жолына берік негіз қалады.
      Талай саңлақты түлеткен іргелі мектепті 2006 жылы тәмамдаған соң, талап отын маздатқан жас Ақтөбе қаласындағы мұнай-газ саласына маманданған колледжге оқуға қабылданды. Ел өндірісінің өзегі саналатын кәсіпті таңдауы еңбектің нарқын терең бағалайтын азаматтық ұстанымынан хабар беретін. Колледж қабырғасында жүріп мамандықтың қыр-сырына қанығып, теориялық білімін тәжірибелік машықпен ұштастырды. 2009 жылы оқу орнын абыроймен бітірген жас маман қолына дипломын алып, еңбек майданына нық қадам басты. Жастық жалын мен кәсіби даярлықты қатар ұстаған Наурыз Есбергенович тіршіліктің толассыз талабына тайсалмай араласып, адал еңбекті арқау еткен азаматтық ғұмырын бастады.
      Наурыз Есбергенович жүрегіне мейірім ұялаған, ағайынның амандығын ардақ тұтқан, елдің елеулі ісіне елгезек араласатын азамат. Жақсының жанынан табылып, жабырқағанға жебеу болу, қуанышқа ортақтасу, көптің кәдесіне жарар іске қамшы салдырмай кірісу – оның азаматтық жаратылысынан туған қасиет. Кең қолтық, ақжарқын мінезі, ар-ұятты биік ұстаған ұстанымы ауыл-аймақ арасындағы абыройын асқақтата түседі.
      Шаруашылықтың қазанын қайнатып, ырысын еселеу оңай міндет емес. Қыстың қытымыр аязы мен жаздың аптап ыстығында малдың жайын, жердің күйін, еңбек адамының көңілін қатар ойлау – іскер басшыға жүктелер ауыр жүк. Наурыз Есбергенович осынау жауапты жүкті жігерімен көтеріп, тіршіліктің тамырын дөп баса білетін тиянақты басшылық қырымен ел сеніміне ие болып келеді. Ұжым ішіндегі ауызбіршілікті бекем ұстауы, әр жұмысшының маңдай теріне құрметпен қарауы, түйткілді мәселелерде тоқтамды шешімге келуі шаруашылықтың берекесін арттыра түсті.
      Адал кәсіптен тапқан несібенің бір бөлігін ел игілігіне бағыштау – оның өмірлік ұстанымдарының бірі. Мұқтаж жанға демеу беру, әлеуметтік бастамаларға қолдау көрсету, ауылдағы ағайынның қуанышына үлес қосу секілді сауапты істерден шет қалмайды. Қайырымдылықты адамдық борышқа балаған жомарт жанның игі ниеті талай отбасының көңіліне медет, талай іске сүйеніш болып жүр.
      Кәсіпкерлік өрісіне бет бұрған Наурыз Есбергенович ата кәсіптің ауыр жүгін арқалап, мал шаруашылығын маңдай термен өркендетуге бел буды. Алғашқы жылдары қыстың қытымыр аязы, жаздың аптап ыстығы, нарықтың құбылмалы қалпы, қора-қопсы мен мал басына қатысты толассыз қам оны талай сынның тезінен өткізді. Әйтсе де, қара нардай қайраты, талапқа беріктігі, тиянақты тірлігі әрі қолға алған істі соңына дейін жеткізетін табандылығы қандай қиындықтың да бетін қайтарды.
      Тұяқтының бабын, жердің ырысын, адал еңбектің қадірін қатар ұстаған азаматтың тынымсыз бейнеті берекелі бастамаларға ұласты. 2010 жылы іргесі қаланған «Наурыз» шаруа қожалығы бүгінде аудан көлеміндегі еңселі шаруашылықтардың қатарынан орын алып отыр. Қожалық түйе мен жылқы өсіруге ден қойып, табиғи мал өнімдерін өңірдегі кәсіпкерлік нысандарына жеткізеді. Қыстаудың қамы, жайлаудың жайы, малдың күйі, еңбек адамының көңілі – бәрі де қожалық иесінің назарынан тыс қалмайды.
      Шаруашылық тізгінін мығым ұстаған Наурыз Есбергенович ұжымдағы ынтымақты ел ырысының берік тірегі санайды. Әрбір жұмыскердің маңдай терін бағалау, ортақ мүддеге жұмылдыру, шешім қабылдар сәтте сабыр сақтап, байып таразысына жүгіну – басшылық қызметіндегі берік қағидаларының бірі. Сондықтан қожалықтағы еңбек ырғағы бір сәт саябырсыған емес, тіршілік тамыры жылдан-жылға терең тартып келеді.
      Ауыл шаруашылығы мен кәсіпкерлік саласындағы адал қызметі, ел қазынасының молаюына қосқан сүбелі үлесі әр деңгейдегі марапаттар арқылы бағаланды. Алайда Наурыз Есбергенович үшін ең үлкен марапат – ағайынның ақ батасы, елдің ықыласы, туған жердің берекесі.
      Іскерлік пен отбасы жауапкершілігін қатар алып жүрген Наурыз Есбергенович – шаңырақтың қорғаны, перзенттеріне өнеге болар әке. Жұбайы Қожанбекова Мадина екеуі екі ұл тәрбиелеп отырған жарасымды отбасы. Ақ жаулықты ананың мейірімі мен әкенің парасатты тәрбиесі тоғысқан шаңырақта үлкенге құрмет, кішіге ізет, еңбекке адалдық, ағайынға қамқорлық алтын арқау болып өрілген.
      Туған жердің ырысын еселеуді азаматтық парыз санаған Наурыз Есбергеновичтің маңдай терге сүйенген еңбегі ел-жұрттың алғысына бөлене бергей. Қысы қытымыр, жазы аптап дала тіршілігінің бар салмағын қайыспай көтеріп, ата кәсіптің абыройын асырған азаматтың өрісі кең, несібесі мол болсын. Деніне саулық, жанына қуат, отбасына баянды бақыт, шаңырағына шаттық тілейміз. Жұбайы Мадина ханыммен бірге қос ұлының қызығын көріп, әулетінің мерейі үстемдей берсін. «Наурыз» шаруа қожалығының қорасы малға, дастарханы ырысқа, еңбегі берекеге толсын.
      Ағайынның ақ батасы, елдің ықыласы, адал кәсіптің абыройы Наурыз Есбергеновичке әрдайым серік болып, алдағы асулары биіктей бергей. Туған өлкенің тынысына нәр қосар игі бастамалары жалғасып, мәртебесі мерейлі, ғұмыры шуақты болсын дей отырып, мақаланы тәмамдаймыз.