Ұстаз… Жалпы, ұстаз десе, тұла бойы тұнып тұрған дарын иесі, терең ойлы, өте байсалды тұлғаның бейнесі еске келеді. Көзімізге тіке қарап, бір жымиғанының өзі бізге жеткілікті еді. Ұшқыр ойлы көзімен тіке қарағандақ, берілген тапсырманы қандай бағада орындап келгенімізді, айтпай-ақ бірден түсінетінбіз. 
      «Бүгінгі тапсырмаға дайындығын аз» деп ұяттан бетімізді қызартса, енді бірде «керемет, нақышына келтіріп жазған екенсін» деген мақтау сөздері білімге деген құштарлығымызды одан әрі еселей түсетін. Жалпы, өзім оқушы кезімде мұғалімнің бет-бейнесіне, киім-киісіне, жүріс-тұрысына қызығатынмын. Мектептен келе сала, шай-тамағымды апыл-ғұпыл ішіп алып, үйдегі іні-бауырларымды отырғызып қойып, солармен сабақ ойынын ойнайтынмын. Ұстазымнан көргенімді жасап, әжемнің шарқатын арқама жауып алып, атамның көзілдірігін тағып, аяғыма анамның тықылдақ туфлиін киіп, ұстазымдай болуға тырысатынмын. Балалық кезімнен қалған ең керемет естеліктердің бірі осы еді.
      «Жай мұғалім хабарлайды, жақсы мұғалім түсіндіреді, керемет мұғалім көрсетеді, ұлы мұғалім шабыттандырады» деп, ұлы ағылшын ағартушысы Уильям Уорд айтпақшы, ұлы ұстазымызға қарап, осылай шабыттанатынбыз. 
      «Бала жүрегі кішкентай күй сандық, сол сандықтың кілтің тапсаң ғана ашылады. Мұғалімнің қолында әр кезде сол кілт тұруы керек» деп, Мұхтар Шаханов ағамыз айтқандай, баланың бойындағы дарынды, қабілетті аша білген ұстаздарымыздың бірі, ол Сатыбалдина Нағима Сүлейменқызы еді. Семей облысының Абралы ауданы, Қайнар селосында 1932 жылдың 20 желтоқсан айында шаруа жанұясында дүниеге келген Нағима апамыз, бала болып әке-шешенің мейіріміне қана алмады. Анасы Мәрзия Бекейқызы өмірден ерте өтсе, әкесі Сатыбалдин Сүлеймен 1941 жылы Ұлы Отан соғысына өз еркімен аттанады. 86-АД қүрамында майданға қатысқан әкесі 1943 жылдың 10 қаңтарында қаза тапқан. Шлиссербург қамалында жерленген. 
      Соғыстан кейінгі жылдары еліміз даму жолында біраз қиналғаны бәрімізге белгілі. Сол уақыттары үкімет көмек ретінде соғысқа қатысқан әскер отбасыларына түрлі салалар бойынша оқуға түсуге жеңілдіктер берді. Сол әскер семьясы жеңілдігіне ие болған Нағима Сүлейменқызы Алматы медицина институтына түседі. 
      Сонымен қатар, екі мамандықты қатар игеруге мүмкіндік алған Нағима апамыз, Өскемен пединститутында үздік бітіріп шығады.  Білімнің кәусар суынан сусындаған, өзіне сенімді де белсенді Нағима апамыз, еңбек жолын «Тарбағатай университеті» атанған Абай атындағы орта мектепте жан жары Асқар Ислямовпен бірге бастайды. Оқушыларға білім нәрі мен тәлім-тәрбиесін беріп, білім саласына үлкен үлесін қосады. 
      Нағима апамыздың ұстаздық қызметінде жүріп, атқарған көптеген еңбегі үшін үкімет тарапынан жоғары марапаттармен бағаланады:
      -  «ҚР білім беру үздігінің құрметті қызметкері»;
      - «Еңбек ардагері»;
      - а) I, II, IIIдәрежелі Ана Даңқы;
      - ә) «Батыр Ана» медальдарымен марапатталған.
      -  Аналық ерлігі үшін «Алтын алқа» белгісі тапсырылды.
      -  Тарбағатай ауданының әлеуметтік-экономикалық дамуына ерекше үлес қосқаны үшін «Төс белгісімен»;
      -  Университет жылнама беттеріне қомақты үлес қосқаны үшін ҚР БҒМ вице-министрі және университет ректоры «Университет мақтанышы» төсбелгісімен;
      - 1941-1945 жж. ҰОС 65 жылдық жеңісіне орай мерекелік медальмен марапатталды.
      - 1941-1945 жж. ҰОС жылдарындағы қажырлы еңбегі үшін «Тылдағы еңбеккер» атағы тапсырылды.
      - Ресей Федерациясы Президентінің 2019 жылдың 13 маусымындағы Жарлығымен «1941-1945 жж. Ұлы Отан соғысының жеңісіне 75 жыл» торқалы медалімен марапатталса,
      - 2011 жылы Өскемен қаласындағы «Анашым!» атты Конституция күніне арналған мерекелік шараның жеңімпазы атанды.
      - 2012 жылы «Шығыс інжуі» конкурсында династияның негізін қалаушы номинациясында лауреат атанды.
      Нағима Сүлейменқызы – шын мәнінде дана адам. Өйткені мұғалім – мамандық болса, ұстаздық адамның бойындағы дарындылық, ұлы қасиет. Нағима апамыз өз заманында ұлы ұстаз бола білді. Өз бойындағы білімін оқушы бойына дарыта білді. 
      Тәжірибелі маман, білікті ұстаз бүгінгі таңда 6 қыз, 4 ұл тәрбиелеп, өсіріп, 23 немере, 29 шөбере көріп, шаңырағының берекесін кіргізіп отырған Батыр ана. Өмірлік жары Асқар Ислямовта мыңдаған шәкірттің зердесіне тәлім мен тәрбиенің нәрін сеуіп, артында өшпес із қалдырған ұлағатты ұстаз. Ол кісінің де қызметіне деген сүйіспеншілігі көптеген жетістіктерге жеткізді. Атап айтсақ:   «Қазақстан Республикасының еңбек сіңірген мұғалімі», «ҚКСР еңбек сіңірген мұғалімі», «КСРО халық ағарту ісінің үздігі», «ҚКСР халық ағарту ісінің үздігі», «КСРО азаматтық қорғаныс ісінің үздігі», неше дүркін «Социалистік жарыс жеңімпазы», «Еңбек ардагері», «Үздік еңбегі үшін», «Ұлы Отан соғысы кезіндегі тылдағы үздік еңбегі үшін» медальдарымен марапатталып, «Қазақстан Республикасына ерекше сіңірген еңбегі үшін зейнетақы иесі» атақтарының иегері, үш дүркін республикалық мұғалімдер съезінің делегаты болған. 
      Осылайша ұстаздың осындай қасиеттерінен оның терең ілім иесі екендігін көре аламыз. «Жақсының жақсылығын айт, нұры тасысын» демекші, жақсы адамнан ғана, жақсы ұстаз шығады.