Асығып-аптығуды, шаршап-шалдығуды, басқалармен сөз таластыруды ұнатпайтын, өзіндік қатаң ұстанымдары бар, табиғатынан тіршілігіне жауапкершілікпен қарай білетін Зейнекүл Темірханқызы өзінің сан түрлі мамандықтардың ішінен таңдаған саласына махаббатпен қарайтын жан. Көптеген мамандықтардың ішінде сақтық пен байқампаздықты, тиянақтылық пен қырағылықты қажет ететін экономика, есеп-қисап саласымен сабақтастырып жемісті еңбектеніп келеді. 
      Ұлы Отан соғысының ардагері Рыспаев Темірханның шаңырағында 1961 жылдың 8 мамырында дүниеге келген Рыспаева Зейнекүл Темірханқызы қарапайым жұмысшы әкесінің батылдығы мен мейірімі мол анасының тәлімді тәрбиесімен есейді. Әкесі Рыспаев Темірхан 1924 жылы 15 сәуірде дүниеге келген. Ұлы Отан соғысы жылдарында Оңтүстік Қазақстан облысынан әскерге шақырылған 140 мыңнан астам адамның қатарында болған, соғыс ардагері. Есімі 2010 жылы 9 мамырда Шымкентте ашылған Қазақстандағы ең үлкен Даңқ мемориалында қашалып жазылған.Оңтүстік Қазақстан облысының әкімі Асқар Мырзахметов жетекшілігімен Ұлы Жеңістің 70 жылдығына орай, 2015 жылы Ұлы Отан соғысына қатысқан Оңтүстік Қазақстандық жауынгерлердің есімдері жазылған естелік кітабы баспадан басып шығарылып, сол жауынгерлердің қатарында Рыспаев Темірханның да есімі жазылды. Майдангер 1989 жылғы 15 қарашада дүниеден өтті. Анасы Рыспаева Ақынқыз Пәтейқызы 1924 жылы дүниеге келген. Отағасының жай-күйін жасап, үй шаруасында болып, өмірге үш ұл мен үш қызды тәрбиелеп өсірді. Қандай қиын заман болмасын дастарханынан ас үзілмеген, қолы ашық, келген қонағына қабағы жазық жан болған. Аяулы жан 1999 жылғы 2 ақпанда дүниеден озды.
      Зейнекүлдің үлкен әпкесі Базаркүл 1947 жылы 21 қыркүйекте дүниеге келген. Бауырларының қамқоры, анасының көмекшісі бола білді. Білім алып, ұзақ жылдар бойы учаскелік мейірбике болып қызмет атқарды. Сол қызметтен құрметті зейнет демалысына шықты. Төрт қыз бен үш ұлдан 23 немере, 22 шөбере сүйіп отырған бақытты әже. Екінші әпкесі Сапаркүл 1955 жылы 10 қазанда дүниеге келген. Анасының тәлімді тәрбиесімен бойжеткен Сапаркүл үй шаруасына тындырымды болды. Қазіргі таңда зейнеткер, төрт қыз екі ұлдан 29 немере, 3 шөбере сүйіп отырған бақытты әже. Ағасы Сәрсенбай 1958 жылы 22 қазанда дүниеге келген. Ақ адал мінезді, тіршілігінде ешкімнің ала жібін аттамаған абыройлы азамат болды. Жұбайы Дүйсенкүл Сейдәзімқызы екеуі екі ұл бір қыз тәрбиелеп, өсірді. Сәрсенбай 2005 жылы бақилық болды. Қазіргі таңда Дүйсенкүл Сейдәзімқызы 11 немеренің бақытты әжесі. Інісі Ерлан 1963 жылы 22 желтоқсанда дүниеге келген.Темір жол саласында қызмет атқарады. Жұбайы Жанар екеуі алты қыз, бір ұл тәрбиелеп өсіріп, балаларынан төрт немере сүйіп отырған бақытты ата-әжесі. Інісі Нұрлан 1965 жылғы 21 қарашада дүниеге келген. Құрылыс саласында еңбек етеді. Жолдасы Бегайым екеуі үш қыз, бір ұлдың ата-анасы, бір немеренің ата-әжесі.
      Бауырларын – барым деп бағалайтын Зейнекүлдің өзінің берекелі шаңырағында қызы Махашова Алия Есбергенқызы 1995 жылы 19 қыркүйекте дүниеге келген. «Халықаралық қатынастар» және «Есеп және аудит» мамандықтарының иегері, спорт саласында есепші лауазымында жұмыс атқарады.Зейнекүлдей анасынан тәлімді тәрбие алған Алия өте кішіпейіл, үлкен-кішіге бірдей құрмет көрсете алатын, сабырлы да сыпайы жан. Тұрмыста, өсіп-өнген қыпшақ елінің келіні. Жалғыз білім үйретуге емес, біліммен бірге жақсы тәрбиені қоса берген, Отанға деген ыстық сезім мен жақындарына, туған-туыстарына деген сүйіспеншілікті 3 ұлының бойына дарытып, үлкен әулеттің берекесі мен мерекесін, отбасының ұйытқысын келтіріп отырған атасы Серік пен енесі Майра да өте парасатты жандар. Қонақжай, ақжарқын мінезді, ата – анасына қамқор, бауырларына мейірімді, сабырлы, жайдары көңілді, қыпшақ елінің ұрпағын жалғастырып отырған жары Нұрсұлтан екеуі екі баланың ата-анасы атанып отыр.
      Зейнекүл Темірханқызы Жамбыл есеп-статистикалық техникумын статистик мамандығын, Алматы халық шаруашылық институтын 1987-1992 жылдары аралығында экономист мамандығы бойынша бітіріп шықты. Білімді маман Зейнекүл Темірханқызы өзінің еңбек жолын 1980 жылы қазан айынан Арыс қалалық информациялық есептеу станциясында ЕКМ операторы (оператор ВКМ информационно-вычислительной станции города Арысь) лауазымында бастады. 1984 жылдың мамыр айынан бастап 1987 жылдың сәуір айы аралығында Арыс қалалық атқару комитеті, жоспарлау комиссиясының экономисі (экономист плановой комиссии горисполкома города Арысь)лауазымында жұмыс жасады.
      1987 жылдың сәуір айынан 1992 жылдың маусым айы аралығында Шымкент қалалық атқару комитетінде жоспарлау жөніндегі экономисі, аға экономисті, бас маманы (экономист, старший экономист, главный специалист по бюджету горисполкома города Шымкент) лауазымдарында жұмыс атқарды. 1992 жылдың маусым-қараша айлары аралығында облыстық әлеуметтік төлемдерді төлеу орталығы операциялық бөлімінің бас маманы (специалист операционного отдела областного центра по социальному начислению и выплате) лауазымында жұмыс жасады. 1992 жылдың қараша айынан бастап 2008 жылдың маусым айы аралығында Оңтүстік Қазақстан облысының қаржы басқармасының кірістерді болжау, халықты әлеуметтік қорғауды қаржыландыру, білім беруді, мәдениет және спортты қаржыландыру бөлімдерінде аға экономист, бас маман, бас экономист лауазымдарында жұмыс атқарды. 
      2008 жылдың маусымынан 2009 жылдың қараша айы аралығында Оңтүстік Қазақстан облысының экономика және бюджеттік жоспарлау басқармасының білім және спорт бөлімінің бас маманы лауазымында жұмыс атқарды. 2009 жылдың қараша айынан 2018 жылдың шілде айы аралығында Оңтүстік Қазақстан облысы экономика және бюджеттік жоспарлау басқармасының білім және спорт бөлімінің, білім және мәдениет бөлімінің, білім, мәдениет және жастар саясаты бөлімінің, білім және жастар саясаты бөлімінің басшысы лауазымында абыройлы қызмет атқарды. 2018 жылдың шілде айынан 2020 жылдың қараша айы аралығында Түркістан облысы экономика және бюджеттік жоспарлау басқармасының ауыл шаруашылығы, табиғатты қорғау және кәсіпкерлікті дамыту бөлімінің, ауыл шаруашылығын, кәсіпкерлікті және өнеркәсіпті дамыту бөлімінің басшысы лауазымында жұмыс атқарды. 2020 жылғы 9 қарашадан бастап құрметті зейнеткерлік демалысына шықты.
      2020 жылдың қараша айынан 2021 жылдың қазан айына дейін Түркістан облысы ауыл шаруашылығы басқармасына қарасты «Бөген арнасы» коммуналдық мемлекеттік мекемесінде басшының экономикалық жоспарлау бойынша орынбасары қызметін атқарды. Түркістан облысының әкімдігінің 2021 жылғы 26 шілдедегі №163 қаулысына сәйкес, облыстық ауыл шаруашылығы басқармасының «Бөген арнасы» коммуналдық мемлекеттік мекемесі, сол басқармаға қарасты «Тұран су» шаруашылық жүргізу құқығындағы мемлекеттік коммуналдық кәсіпорнына қосылды. 2021 жылдың қазан айынан бері «Тұран су» шаруашылық жүргізу құқығындағы мемлекеттік коммуналдық кәсіпорынында экономика, құқық және бюджеттік жоспарлау бөлімінің басшысы қызметін атқарып келеді.
      Білікті көшбасшының марапаттары да еңбегінің жемісіндей лайықты. Ол Қазақстан Республикасы Президентінің 2015 жылғы 5 тамыздағы Жарлығы бойынша «Қазақстан Конституциясына 20 жыл» мерекелік медалімен наградталды.Оңтүстік Қазақстан облысы әкімінің 2011 жылғы 28 желтоқсандағы№212 шешімімен бекітілген «Облысқа сіңірген еңбегі үшін» медалін омырауына жарқырата тақты.2023 жылғы наурыз айында Қазақстан Республикасы «Ауыл шаруашылығы ардагерлер Кеңесі» Қоғамдық бірлестігінің «Құрметті ардагер» №055 куәлігі ұсынылды. Одан бөлек, облыс әкімі атынан, облыстық мәслихаттан, жұмыс атқарған мекеме басшылары атынан көптеген грамоталармен, алғыс хаттармен марапатталды. Солардың бірі, Оңтүстік Қазақстан облысының әкімі Ө. Шөкеевтың 2006 жылғы қарашадағы «Алғыс хаты», Оңтүстік Түркістан облысының әкімі Ж. Түймебаевтың 2018 жылғы желтоқсандағы «Алғыс хаты», Түркістан облысы әкімінің орынбасары А. Сабитовтың 2020 жылғы қарашадағы Алғыс хатымен наградталды. 2023 жылы Республикалық «Ұстаз жолы» қоғамдық қорының, «Түркістан облысының ауыл, орман шаруашылығы, табиғат және жануарлар әлемін қорғау қызметкерлерінің жергілікті кәсіподағы» Қ.Б. шешімімен өз саласында еселі еңбек етіп, үздік нәтижелерге қол жеткізгені үшін «Еңбек даңқы» медалімен марапатталды.
      Ұжым қызметкерлерімен бірге түрлі іс-шараларға белсенді қатысып, жүлделі орындарға ие болған. Солардың бірі – 2003 жылы Қазақтан Республикасы Тәуелсіздігінің 10 жылдығына арналған Оңтүстік Қазақстан облысы қаржы департаментінің қызметкерлері арасында өткізілген Спартакиадада дойбыдан II орын, 2005 жылы «Наурыз мейрамы» қарсаңында өткізілген спорттық іс-шарада «дойбыдан» 1 орынға ие болған, 2010 жылы маусым айында Облыстық басқармалар қызметкерлері арасында өткен Спартакиадада ұжым жүлделі 1 орынға ие болған. Сонымен қатар, облыс өңіріндегі ауыл шаруашылығы саласының маңызды іс-шарасы «Алтын күз» мерекесін жылда өткізуде ұжым қызметкерлерімен бірге ат салысып келеді (2021 жылы Түркістан облысының әкімі Ө.Шөкеевтың, 2023 жылы Түркістан облысының әкімі Д.Сатыбалдының «Алғыс хатымен» марапатталды). 
      Орнықты ісімен, тынғылықты қызметімен ұжым арасында сыйлы да қадірлі Зейнекүл Рыспаева кейінгі жас мамандарға үлгі көрсетер ұстаз ретінде де танымал. Көпке берері әлі көп көшбасшыға Алла берген абыройы асқақтап, ел игілігі жолындағы қызметі жемісін төге берсін дейміз.