«Айшылық алыс жерлерден, Көзіңді ашып - жұмғанша, Жылдам хабар алғызды» деп болашақты болжап кеткен ағартушы Ыбырай Алтынсариннің өлеңінде жырланған мамандық ол – төрткүл дүниені бір сымтетікте біріктірген – байланыс саласы.
      Ғылым жарықтың жылдамдығынан да тез дамыған бүгінде байланыс орталықтарының, телевизияның, ғаламтордың адамзат өміріндегі алар орны ерекше. Өткен ғасырдың орта шенінде адамзаттың ғарышты бағындыруы ғылымда төңкеріс жасауға алып келді. Кеңес үкіметіндегі коментатрлық байланыс, тәуелсіздік алғаннан кейін дербес үй телефонына айналып, өзге да егемен елдің тәуелсіз телеканалдары жұмысын бастап, телевизиялық және байланыс саласының жұмысына ерекше екпін келді. Байланыс - бүгінгі таңда адам өмірінің ажырамас бір бөлігіне айналды.       Міне, жылына төрт түлейтін тазыдай, жыл санап емес күн санып дамып, әлемнің түкпірі мен шалғайда жатқан ауылды тілдестіріп, үндестіріп отырған байланыс саласында қызмет етіп, ел ықыласына бөленіп келе жатқан азаматтарымыздың бірі, «Аягөз белгі беру жане байланыс дистанциясында» Жарма бекетіндегі байланыс үйінде аға электромеханик болып, 33 жыл қызмет етіп келе жатқан Манханов Толымбек Қамалиұлы.
      Толымбек Қамалиұлы 1962 жылдың 12 қарашасында Абай облысы, Аягөз ауданы, Жарма кентінде дүниеге келді. Асқар тау әкесі Қамали Абдрахманұлы тыл еңбеккері, 49 жыл темір жол саласында шебер болып қызмет етікен еңбек адамы болса, мейірім нұры күн шұғыласынан да жылы анасы Зықыш Тобылғазықызы он құрсақ көтеріп, бала тәрбиесінде болған алтын жүректі Ана.
      Елдік пен татулықтың дәнекері болып, тіршіліктің бастауы болып жатқан таулары бұлтпен тілдескен қатты мекенде бақытты балалығын өткізген ол бойындағы алғырлығы мен зеректігін, ұйымдастырушылық қабілетін бала кезінен көрсете білді. Талай қыранның қанатын қомдап, тұлпарды тағалаған Жарма кентінде П.Теряев атындағы орта мектебінде іргелі білім ордасының табалдырығын аттап, білім нәрімен сусындады. 
      Сыныпішілік, мектепішілік шараларға белсене қатысып, жанындағы достарын бір іске үйіріп алып кететін ұйымдастырушылық қабілетінің арқасында сыныптағы оқушылардың алды болды. "Қолымнан келмейді" деген сөзді білмейтін, өзіне тапсырылған мұғалімнің әр ісіне жауапкершілікпен қарап, тиянақты, әрі мұнтаздай таза етіп орындайтын ол ұстаздарының алғысына бөленді. Қабілетті жас қандай ортада да белсенді болды. Мектепке үлкен дайындықпен келетін шәкірт Толымбек Қамалиұлы сыныптағы озат оқушылардың бірі болумен қатар, «Шіркін, ұлым болса осындай болсын!» деп тамсанатын алтын жүректі ұландардың сапында болды.       Өмір бұлағының бастауы болған, білім ордасынан түлеп үшқан жалынды жас Толымбек Қамалиұлы 1980 жылы мектепті тәмамдаған соң Семей қаласына келіп, №27 Темір жол мамандарын дайындайтын техникалық училищесіне оқуға түседі. Осы оқу орнынан «Сигнализация, централизация, блокировка» факультетінен «Электромеханик» мамандығын алып шығады. 
      Тасын түртсең тарихы сөйлейтін қазақ даласының қай жері де киелі, топырағы құнарлы, самалынан берекенің лебі өскен құтты мекен. Тарихта таңбасы мен жарқын істері қалған ұлылар мен дүлдүлдердің табаны тиген өлкенің ұланы бола білген жас техникалық мамандықты меңгерген соң, 1983-1985 жылдары Кеңес әскері сапында Ташкент қаласында Отан алдындағы борышын өтеп келеді. Елге келген соң, өзінің игерген мамандығы бойынша Аягөз қаласына еңбек жолын бастайды. Міне, сол бір уақыттан бері Абай облысы, Аягөз ауданы, Жарма кентінде «Аягөз белгі беру және байланыс дистанциясында» Жарма бекетіндегі байланыс үйіне электромеханик болып жұмысын жалғастырып келеді. Бүгінгі таңда ол электромеханик қызметінде.       Адамның дәрежесін көтеріп, абыройын өсіретін құндылық ол әрине, еткен еңбегі. Ол адам өмірімен бірге жасасып тұратын дүние. Үнемі жақсылықты бұйырып, игі іске келгенде өзі бас болып асығып жүретін Толымбек Қамалиұлы танымы терең, парасаты пайымды азамат. Ізгі қызмет көрсетудің тамаша жолдарын білетін, өмірлік тәжірибесі мол, өзіне жүктелген тапсырманы адал орындауды басты парыз санайтын азаматтың қоғамдағы орнын зерделесек ойы озық, дүниетанымы мол, адамгершілік қасиеті жоғары, өресі биік, жаратылысынан пейілі таза, мінезі ашық, ақты ақ, қараны қара деп айтатын тік мінезді болғанымен, үні салмақты да байсалды, жүзі жылы. 
      Өз саласына жанымен берілген ол әрқашан әріптестеріне, жаңадан келген жастарға мәдениеттілікті, білімділікті паш етіп, өздерінің қабілеттеріне сай, адал қызмет етуін айтудан жалыққан емес. Тынымсыз еткен еңбегінің жемісін көріп, үлкен жетістіктерге қол жеткізіп, өнегелі қызметінен жоғары марапаттарға ие болды.
      Толымбек Қамалиұлы Жармада қара шаңырақ иесі. Екі ағасы теміржол саласында еңбек еткен бүгінгі таңдағы зейнеткер. Жұбайы Зубайда Аблахатқызы да өзі секілді, Байланыс үйінде бірге жұмыс жасайды. Бір саланың білікті мамандары үш перзент тәрбиелеп, бүгінгі таңда қонысын кеңейтіп отыр. Тұңғышы Әлібек Алматы теміржол институтын бітірген, үйленген, 1 қыз, 1 ұл бар. Әлібек Семей қаласында Байланыс белгі беру дистанциясында электромеханик қызметін атқарады. Жолдасы Толғанай қарттар үйінде медбике. Екінші ұлы ӘділетТолымбекұлы мал шаруашылығымен айналысады. Негізгі мамандығы медицина саласы. Кенжесі Аят Толымбекұлы Алматыда «Отбасы банкте қызметкер, Семей қаласындағы Қазақстан гуманитарлық инновациялық Заң университетін бітірген.
      Тауықтың үнімен таласа шығыстан еңсе көтерген күн, тоқтаусыз жылжып, ұясына ерте енеді. Бұл - жер-дүние жаратылғалы бұлжымайтын тәңір заңдылығы. Қамшының қысқа сабымен өлшенген ғұмырда жүректе дүрсілі соғып тұрған әр пенде артында өзіндік ізін қалдырып, қолынан келгенше елге қызмет етіп кетеді. Уысқа сыйдыра алатын сары даланың самалындай, тағдыр да бәрінің ығына жығылмайды. Арманның бәрі орындала бермейді. Тек қайсарлық танытып, табандылық көрсетіп, саналы ғұмырын өз саласына арнаған жандардың ғана тарихта ізі, халықта есімі қалады. 
      Тапшы уақытпен таласа, аз уақыт бөліп, ел құрметіне бөленген жанның еңбегін қағаз бетіне түсіріп, көпшілікке таныстыру журналистік парызымыз деп есептеген соң қалам тербеп отырмыз. Күміс тұғырға лайықты, алтын сөздермен жиегі өрнектелген шапан жауып отырған ел ағасы Толымбек Қамалиұлы сынды аптал азаматтар ортамызда аман-есен, кейінгі ұрпаққа үлгі болып жүре бергей!