Ғұлама әл-Фараби: «Жақсы мінез-құлық пен ақыл біріккенде біз өз бойымыздан, әрі өз әрекеттерімізден абзалдық пен жетілгендікті табамыз және осы екеуінің арқасында біз ізгілікті, қайырымды боламыз» депті. Осы асыл қасиеттерді басқаның бойынан тауып жатсақ несі артық?! «Ұлтқа қожалық жасауға болмайды, оған тек қызмет ету керек» деп Мұстафа Ататүрік тауып айтқан ғой. Адамдардың алдында ары таза болып, елге беріле қызмет ету қасиеті бастықтың да, шенеуніктің де бойынан табылып жатса қандай ғанибет!
      Жаны сұлу адам жан-жағына нұрын сеуіп жүреді ғой. Мақтарал, Ордабасы аудандарының Құрметті Азаматы Абишев Нұралы Алмаханұлы да әрдайым өзінің биік беделімен, орнықты сөз ұстынымымен, уәдеге беріктігімен көпке сыйлы да құрметті азамат. Оның адамды еріксіз баурап алатын қасиеті бар. Өзінің ақыл-кеңесін айтып, жанындағылардың пікірімен санаса білетін білім-білігі келіскен білікті көшбасшының әсіресе жастарға берер өнегесі мол. Бойындағы бекзаттығы, сарбаздығы, келісті кербездігі, міндетіне деген жауапкершілігі кейінгі толқынға үлгі боларлықтай. Өзінің қажырлы қайратымен шаршамай-шалдықпай адал еңбектеніп келе жатқан кейіпкеріміз ішкі-сыртқы мәдениетімен өз ортасына қадірлі.
      Бүгінгі біздің мақаламызға арқау болып отырған, әр қазақ менің жалғызым деп есептейтін, қолында барын ағайынмен бөлісуге дайын тұратын Нұралы Алмаханұлы 1967 жылдың 7 шілдесінде Оңтүстік Қазақстан облысы Шардара ауданы Көксу совхозында көпбалалы жұмысшылар отбасында дүниеге келді. Талай ұлылардың сөзі ұранға айналып, тектілердің табаны тиген қасиетті топырақта балалығын өткізіп, әке мен ананың мейірім шуағына бөленіп өсті.       Кішкентайынан алғыр, әрбір істің мән жайын бақылай білетін, қандай да бір игі істі бастауға дайын тұратын, сыныптың көшін алға сүйрейтін, белсенді жастардың бірі бола білген Нұралы Алмаханұлы 1984 жылы Сарыағаш ауданы, Бірлік совхозында орта мектепті үздіктер қатарында бітіріп шыққан соң, сол бір кездердегі ауыл өміріне, өндіріске араласып кете барды. 
      Өзінің алғашқы еңбек жолын Бірлік совхозында 3 дәрежелі электр монтері болып бастады. Одан кейінгі 1986 жылы Шардара қаласындағы «Құрылыс материалдары комбинатында» арматура цехында жұмыс жасаса, біраз уақыт Жаушықұм ауылында дене шынықтыру методисі де болды. 1994 жылы Шымкент қаласы, Абай ауданы аппаратында 2 дәрежелі инспектор де болып қызмет атқарды.
      Осылайша түрлі салада қызмет етіп, мол тәжірибе жинақтаған Нұралы Алмаханұлы басшылық қызмет атқарған жылдары да жауапкершілікпен басқарған ұжымның жұмысын өрістету мақсатында көптеген игі істерді қолына алып, нәтижелі ете білді. 2000 жылы М.Әуезов атындағы Оңтүстік Қазақстан мемлекеттік университетінің «Автоматты электр байланысы» мамандығы бойынша толық курсын бітіріп, электр байланысының инженері біліктілігін алған кейіпкеріміз 2000 жылы «Батсутрансгаз», «Батсуэнергосбыт» ЖШС директоры қызметін атқарса, 2002 жылдан 2006 жылдар аралығында «Батсу» корпорациясының Президенті болып тағайындалды. 2006 жылдан 2012 жылдар аралығында «Комби-строй-1» ЖШС, 2012 жылдан 2023 жылдың сәуір айына дейін «Bokei», «Бөрте милка» ЖШС директоры қызметін атқарып келді. 
      Нұралы Алмаханұлын білетіндер оның сонау бала кезінен еңбекқор, жан-жақты, ізденімпаз болғанын айтады. Ашық жарқын мінезді, ойланып барып әрекет ететін, уәдесіне болаттай берік азамат. Кім кіммен болмасын ауызбіршілігі жарасып, тез тіл табысып кетеді. Өзінің жаны да, ары да сұлу азаматты көпшілік құрметтеп, сыйлап, төрден орын беріп жатады. Ылғи жақсы жандармен дәмдес болып, жасы үлкен ағаларының батасын алып жүреді. 
      Өзі де кейінгі іні-қарындастарына өнегелі өмір жолымен, әдемі жүріс-тұрысымен үлгі көрсетіп ағалық қалпынан танбай келеді. Мазмұны мен мағынасы осылай сәйкес келіп тұрғанда айта кету керек, ол жақынына, тіпті бейтаныс көмек сұраған адамға да қолынан келген жақсылығын аянбайтын жомарт, ылғи жан-жағына тек шуағы мен шұғыласын шашып жүретін азамат.      Нұралы Алмаханұлы қызмет атқарған жылдары түрлі марапаттарға ие болды. Мерейін үстем етіп, абырой төбесіне шыға білген кейіпкеріміздің марапаттарын таратып айтсақ:
      «Құрмет» ордені;      Қазақстан Республикасының Президентінің Алғыс хаты;
      2004 жылы «Жылдың ең үздік кәсіпкері» аталымының Жеңімпазы;
      «Халыққа арналған өнеркәсіп тауарлары» ІІ дәрежелі аталымының Иегері;
      «Парасат» ордені;
      «Қазақстан Конституциясына 10 жыл» мерекелік медалі;
      «Қазақстанның тәуелсіздігіне 20 жыл» мерекелік медалі;
      ХІХ халықаралық экономикалық форумында «Лидер отрасли» ордені;
      Оңтүстік Қазақстан облысы әкімінің «Облысқа сіңірген еңбегі үшін» медалі.
      «Жақсы адамға мал бітсе, ағайынның жоқ-жітігіне қарасады» деген сөз осы Нұралы Алмаханұлына арнап айтылған ба дейсің. Негізінде, адамның адамгершілік абзал қасиеттері, азаматтық тұлғасы, болмысының бейнесі, төңірегіндегілерге жанашырлығы айқын көрінетін тұстары болады емес пе?! Қай уақытта болмасын қиналған ағайынның жанынан табылып, сүрініп жатса демейді, құлап жатса тұрғызуға тырысады. Иә, мұндай асыл қасиет кез келгеннің қолынан келеді дей алмаймын.
      Адам ес білгеннен бастап, өзінің қандай нәрсеге қабілетті екендігін бағамдай бастайды. «Бір бала бар әкеге тарта туатын, бір бала бар әкеден өте туатын» деген емес пе?! Жалпы кімге де болмасын отбасынан алған тәрбие негізі өмірінің азығы болмақ. Оны дәлелдеп айтып жатудың да қажеті жоқ. Себебі отбасындағы үлкендердің іс-әрекеті бала үшін айнымас заңдылық. Олар не көреді, соны бойына сіңіре береді. Текке тартпай тумайды дейді ғой үлкендеріміз. Расында тексіз адам болмайтыны секілді, мінезсіз адам туылмайды. Ал мінездің ең жақсысы – қарапайымдылық. Қарапайымдылықтың өзі қазаққа тән асыл қасиет. Міне, осындай қасиеттерді бойына сыйдырып, қоғаммен бірге қозғалып, қайырымдылық шараларына үзбей қатысып отыратын Нұралы Алмаханұлы облыста көптеген қайырымдылық іс-шараларға қатысып, халықтың әлеуметтік жағдайын көтеруге қолынан келгенінше үлес қосуда.       Атап айтар болсақ:
      «Нұр Отан» қорына ;
      «Атамекен» қорына;
      ОҚО, Мақтарал ауданы, Абай ауылдық округіндегі Гагарин мектебіне;
      Титов мектебіне қаржылай көмектесті;
      Мақтарал ауданы Қызылқұм ауылдық округіндегі 10 соғыс ардагерлеріне сымтетік орнатып берді;
      Мақтарал ауданы, Ералиев ауылдық округіндегі Дәуір орта мектебіне демеушілік көмек жасады;
      Мақтарал ауданының жетім және мүгедек балаларына көмек көрсетті;
      Шардара қаласында аз қамтамасыз етілген 2 отбасыға үй салып берді;
      Шардара қаласының орталық мешітіне көмек көрсетті;
      Шымкент қаласындағы нашар көретін балаларға, әлеуметтік бағдарламалар және жұмыспен қамту басқармасына қаржылай көмек берді;
      Шымкент қаласындағы Абай аллеясын көріктендіру жұмыстарын жүргізді;
      Сусыз отырған Мақтарал ауданы Киров ауылының су жүйесінің құрылысы жобасын дайындаттырды;
      Шымкент қаласындағы Көл аумағындағы Ш.Қалдаяқов ескерткішін салуға өз үлесін қоса отырып, бас мердігер болып құрылысын жүргізді;
      Шымкент қаласындағы Тәуелсіздік алаңының құрылысына, Ипподром аумағындағы ескерткіштерді тұрғызуға үлес қосты;
      Мақтарал ауданында сусыз отырған Атамекен ауылдық округінің 8 елді мекеніне су желісін құруға демеушілік жолмен жоба дайындаттырды; 
      Ұлы Отан соғысы жеңісінің 70 жылдығына орай Мақтарал ауданындағы 291 соғыс және тыл ардагерлерін аралап, қаржылайсыйлығын таратты;
      Шымкент қаласының орталық мешітіне көмек көрсетті;
      Мақтарал ауданы Ералиев мектебінің оқушысы М.Қаныбековаға қаржылай көмек көрсетті;
      Мақтарал ауданы Ералиев ауылдық округінде 15 пар спорттық форма алып берді;
      Мақтарал ауданының тұрғындарына Оңтүстік Қазақстан, Южный Казахстан және Жаңа Казақстан газеттеріне жазылуға қаржылай көмек берді;
      Мақтарал ауданындағы мүмкіндігі шектеулі балалардың мектеп-интернатына 3 шаңсорғыш, 1 толық жабдықталған компьютер сыйға тартты;
      Мақтарал ауданы Ералиев ауылдық округіндегі М.Мақатаев мектебіне жөндеу жұмыстарын жүргізді;
      Шымкент қаласында әкімшілік іскерлік орталығын абаттандыру жұмыстарына үлес қосты;
      Мақтарал ауданының 50 ардагеріне «Южный Казахстан» газетін жаздырып берді;
      Мақтарал ауданындағы «Нұр Отан» филиалымен қосылып, Мақтарал ауданының жетім балаларына, аз қамтамасыз етілген отбасыларға көмек берді;
      Отырар ауданындағы Ш.Қалдаяқовтың ескерткішінің құрылысына қаржы қосты;
      Кентау қаласындағы ескерткіш құрылысына өз үлесін қосты;
      Газсыз отырған Жамбыл ауылдық округінің тұрғындарына газ желісіне жоба дайындатып, газ құбырларын беріп, 70 үйді газға қостырды;
      Сусыз отырған Қызылқұм ауылының тұрғындарына демеушілік жасап, ауыз су құбырын тартып берді;
      Ордабасы ауданындағы Бадам ауылдық округына қатысты Ақбұлақ ауылының стадион құрылысына қаржылай демеушілік көрсетті.
      Табиғат адамға жақсы мен жаманды ажырата алатын ой-сана берген ғой. Сондықтан да саналы адам «Жақсылық көрсем өзімнен, жамандық көрсем өзімнен» дегенді жадына сақтап, әрбір жасайтын қадамына ақыл көзімен қарап, жүрек қалауымен жасайтынын білеміз. Жақсы адам қоғамның қорғаны, ортасының мақтанышы әрі отбасының қамқоры. 
      2007 жылдан бері облыстық мәслихаттың депутаты, партиялық істерге де белсене араласатын, «Аманат» партиясының республикалық Саяси кеңестің мүшесі және Түркістан облыстық Саяси кеңес және Саяси кеңесі Бюросының мүшесі, биылғы 2023 жылдың наурыз айынан бастап Түркістан облыстық мәслихатының төрағасы қызметін абыроймен атқарып келе жатқан Нұралы Алмаханұлы жары Муталиева Гулнара Лесбекқызы екеуі екі ұл, екі қыз тәрбиелеп өсіріп, олардан алты немересі сүйіп отырған бақытты ата-әже.
      Біршама істің басын біріктіріп, дос-жолдастарының, ағайын-туыстың қуаныш-қайғыларын бөлісуге уақыт таба білетін Нұралы Алмаханұлы ізеттілігі мен кісілігі келіскен абзал азамат. «Тура ағаш – үйге тіреу, тура жігіт – елге тіреу» демекші, өмірдегі өнегесімен, адамгершілік қасиеттерімен төңірегіндегілердің сый-құрметіне бөленіп жүрген Нұралы Алмаханұлы ағамыздың тындырымды еңбегі мен адал ісі қызметтес әріптестері мен кейінгі ұрпақтарына әрдайым үлгі.
      Иә, адал еңбегімен, қалтқысыз қызметімен ел-жұрттың алдында абыройы артып, беделі биіктеп, сый-құрметке бөленіп келеді. Ол туған-туысы, жора-жолдасы ортасында беделді, отбасында қадірлі азамат. Ол әрдайым осындай деңгейден көрініп келе жатқан, көпшілікке айрықша танымал, айтулы азаматқа Алла берген абыройы арта берсін деген тілек білдіреміз!