Жылмен есептеуге келмейтін мың жылдан аса тарихы бар қазақтың басты құндылығы - Тәуелсіздік. Белінде шоқпары ілініп, білегінде қалқаны әрдайым соғысқа дайын болған жаугершілік заман артта қалып, ел ішіндегі түсінбестікті парасаттылық пен сабырлылықпен шешетін дәуірде өмір сүріп келеміз. Егемендік алып, ежелгі қонысымызда ұрпақ өрбітіп, төсінде мал өргізіп отырғанымыз бейбітшіліктің арқасы. Тәуелсіздік – ешқандай саудегер баға бере алмас, қазаққа аталардың қанымен, ақ білектің күшімен, ақ найзаның ұшымен келген тәңірдің теңдессіз сыйы.
      «Салтым менің - асыл қазынам» - деп есептейтін, өзінен кейінгі буынға ынтымақтастық пен татулықты дәріптеп келе жатырған, «Хиуаз» қоғамдық бірлестігінің төрайымы және 2015 жылдан бастап Саламат Мұқашев атындағы Атырау политехникалық жоғарғы колледжінде жұмыс жасайтын Шахарман Абилкасимовна 1962 жылы Өзбекстан Республикасы, Хорезм облысы, Үргеніш қаласында дүниеге келді. Қазіргідей шекара бөлінісі жоқ, төсекте басы, төскейде малы қосылған көршілес елдермен бірігіп жатқан мамыржай кезеңде бақытты балалығын өткізген Шахарманның жүрегіндегі ұлтқа деген, Отанға деген патриоттық сезімі кішкентай бала жүрегінен оянды. Тағдырдан теперіш көрген сайын, өмірге деген құштарлығын жоймайтын мұсылман баласы емеспіз бе, әкесі Әбілқасым Құрманұлы кішкентай кезінен ата-анасынан айрылса да, қоғамда да, өмірде де өз орнын тапқан, жеке бастың қажеттілігінен ел мүддесін жоғары қойған, халыққа адал қызмет еткен азамат. Саналы ғұмырын ел қызметіне арнаған шоқтығы биік тұлға ұзақ жылдар бойы Хоразм облысында экономика саласында басшылық қызметте еңбек етті. Ардақты азаматтың бастамасымен өзі тұратын «Прогресс» кентінің атын өзгертіп, ұлы ақын, арқалы дарабоз, дарыны жолбарыс Жамбыл Жабаевтың есімін берді. Хорезмдегі алғашқы қазақ тілінде оқытатын мектепті ашты. Сол мектептен қазақ, орыс, өзбек тілдерінде тәлім алып, түлеп ұшқан түлектер бүгінде Алматы, Нұр-Сұлтан, Тараз, Ақтау, Қарағанды қалаларында белді қызметтер атқарады. 
      Қыранның балапаны тек қияда қалықтайтыны секілді, әкесі секілді ұлы арманды жүрегіне қондырған Шахарман Абилкасимовна Ташкент мәдениет институтында дәріс алып, біраз жылдар бойы Ташкент қаласында Мемлекеттік әлем тілдер университетіндегі ғылыми кітапхана директорының орынбасары қызметін атқарады. Үйірінің шабысы алыстан есітілгенде, тыпыршып тұра алмаған Тайбурылдай, уақыт өткен сайын Шахарманның да ойы туған елге ауа бастайды. Қой үстіне бозторғай жұмыртқалаған елге, қандастар арасына кімнің оралғысы келмейді, тәңірден тілегені қабыл болып, 2007 жылы «мемлекеттік квота» бойынша жолдасы Абдулла, қызы Айсұлумен, ұлдары Нұрсұлтан, Исламмен бірге Қазақстанға оралады. «Еліміз үшін - еңбек етсек» - деген арман көкейінде болғанмен, көзіміздің тірісінде бұл бақытқа қол жеткізеді екенбіз бе?» - деп ойлаған жанұя, үгін тартсаң майы көрінетін қазақ елінің қай жері де қазыналы, топырағы да құнарлы Атырау қаласына келіп шаңырақ тігеді.
      «Тас түскен жеріне ауыр» - дейді қазақ, Отанға - деген сағыныш жүрегінде қозданып жанып, жалынға айналған ішкі толғанысын, сағынышын, Отанға оралғаннан кейінгі сезімдерін біз - журналист ретінде жеткізе алуымыз екіталай. Сондықтан, мақаламыз тұщымды болу үшін Шахарман Абілқасымқызының өз жазбасын қағаз бетіне түсіргенді жөн көрдік. 
      «Ата-бабамыздың кіндік қаны тамған жеріне келіп, қандастарымызбен қауышып, өз елімізде, өз жерімізде, Тәуелсіздік туының астында бейбіт те берекелі тірлік кешу маңдайымызға жазылған екен. Біздің ұлтымыздың көшбасшысы дүние жүзі қазақтарының I құрылтайында бізге осындай тәуекел қадамға жол сілтеді, әрине, ол жол - белгісіздікке бастар жол еді. Алайда, біздер айтылған сөздің игілігіне және жауаптылығына сендік, шындыққа айналған сол асыл сөздер - Елбасының тарих алдында және Қазақстанның келешегі алдындағы тағы да бір еңбегінің жемісі. Н.Ә. Назарбаевқа алғысым шексіз, Алладан шапағат тілеймін. 
      Ерте бастан қазақтар «Сұлтан - сүйегін қорламайды» -деген. Біреулер үшін бұл артық айтылған болуы мүмкін, бірақ мен өзім әрдайым өз балаларыма, жастарға «Кұрыш қалай шынықты» кітабының кейіпкерінен замандастарымның үлгі алғанын айтып отырамын. Адам өмірде алдына мақсат қойып, заманының осынау ерек тұлғасына айналуға тырысқаны жөн. Атырауға көшіп келу туралы шешіміме бір сәтте өкінген емеспін. Үкімет қамқорлығы мен қолдауын облыс пен қала басшылары тарапынан көріп келемін. Ұлдарым Нұрсұлтан Қазақстан Республикасының қаржы министрлігінің мемлекеттік кірістер комитетінде, ал Ислам көліктік бақылау инспекциясында жұмыс жасайды. Айзере, Хантөре, Алихан есімді үш немерем, Жұлдыз есімді келінім бар. Жолдасым «Жұмыспен қамту-2020» бағдарламасымен 3 гектар жерді мемлекеттен жалға алып, бақшалық өнімдер өсіруде. Мен - қазақ болып туғаным үшін бақыттымын және осы елде тұратын бақытты әйелмін! Қызым Айсұлу жергілікті жігітке тұрмысқа шығып, ұйыған отбасын құрып отыр. Ұлым Ислам жергілікті кызға үйленіп, бакытты жанұя атанып отыр. Қазіргі күнде 2 жиен, 3 немеренің сүйікті әжесімін.
      Бүгінде Отаныма оралған соң қол қусырып, қарап жатуға арым бармай, игі істер атқару үшін қазақ бауырларымның арасынан табылу мақсатында, аты аңызға айналған қазақтың батыр қызы ұшқыш Хиуаз Доспанова атындағы коғам бірлестігін құрып, жетекшілік етіп жүрмін. «Хиуаз» қоғам бірлестігі Атырау облысында 2013 жылы заңды түрде құрылған. Қоғамдық бірлестіктің басты мақсаты - Қазақстан халқының салт дәстүріне сай мәдениет пен мемлекеттік тілін өркендету, қоғамда әйелдердің белсенділігін арттыру болып табылады. Үкіметтік емес ұйымдар мүшелері - елдің нағыз патриоттары. 2010 жылдан бастап, Іскер әйелдер қоғамының мүшесімін, мемлекет қоғамдағы белсенділігімді бағалап, Тәуелсіздік күніне орай Елбасы Нұрсұлтан Назарбаевтың «Алғыс хатымен» марапатталдым. Бұл марапатты облыс әкімі Бақтықожа Ізмұхамбетов табыстады. 
      Қазақстан - қазақ халқының ата-баба мекені, ежелгі қонысы. Еліміз өлшеусіз табиғат байлығымен ғана емес, ең алдымен сан түрлі ұлттардан құралған халқымен ерекше екенін ұмытпаған абзал. Бүгінгі бейбіт те шуақты күндерді бағалай отырып, жаңа биіктерге ұмтылу – біздің буынның бағыты болуы тиіс. Қазіргі таңда Тәуелсіздік - барлығымыз үшін ерекше қасиетті күн. Бірліктің, ынтымақтастық пен татулықтың күні. Мемлекетіміздің тәуелсіздігі — ең алдымен халқымыздың бақыты. Алғашқы жылдарда басым мақсаттардың қатарында егемендікті нығайту, ұлттық қауіпсіздікті қамтамасыз ету, экономикадағы қиыншылықтарға жауап беру болған еді. Сондықтан бүгінгі күні халқымыз өткеннен қалған тарихи өнегені, отан сүйгіштікті, ұлтына деген махаббатты жоғалтпай, әрі қарай жастардың патриоттық сезіміне енгізуге ерекше көңіл бөлуі керек деп ойлаймын».   
 ✦ 2011 жылы ҚР Тәуелсіздігінің 20 жылдығына арналған облыстық «Қазақтың қолөнері» мәдени шарасынан «Алғыс хат»;
✦ 2012 жылы дүниежүзі қазақтары қауымдастығының Атырау филиалының Наурыз мерекесіне орай ұйымдастырылған облыстық шарасынан «Алғыс хат»;
✦ 2012 жылы ҚР Тәуелсіздігінің 20 жылдығына арналған Кеңөзек аудандық әкімшілігінен «Алғыс хат»;
✦ 2013 жылы облыстық VI азаматтық форум аясында өткізілген әлеуметтік маңызды жобалар байқауынан Атырау облыстық ішкі саясат басқармасының басшылығынан «Алғыс хат»;
✦ 2016 жылы ҚР Тәуелсіздігінің 25 жылдығы аясында облыстық білім беру жүйесіне қосқан еңбегі, кітапханашылық қызметті ұйымдастырудағы шығармашылық ізденісі мен іскерлігі, кәсіби қызметіндегі жетістіктері үшін С.Мұқанов атындағы Атырау облысы білім басқармасы атынан «Алғыс хат»;
✦ 2017 жылы VII, 2018 жылы VIII облыстық азаматтық форумдағы үкіметтік емес ұйымдардың жобалар жәрмеңкесінен диплом;
✦ 2018 жылы «Ұлттық мұралар ұрпақ қазынасы» - атты шараға жастардың ұлттық құндылықтары мен мәңгілік мұраларды танып, рухани тұрғыдан жетілуіне, ел келешегінің туын көтерер жалынды жастарды тәрбиелеуге үлес қосқаны үшін Атырау қаласы әкімінің «Алғыс хаты»;
✦ 2018 жылы Елбасы Н.Назарбаевтың «Болашаққа бағдар: Рухани жаңғыру» бағдарламалық мақаласы аясында Атырау төрінде өткізілген «QAZAQ FEST-2018» этнофестивалінде ұлттық құндылықтарымызды дәріптеуге қосқан зор үлесі үшін Атырау облысы жастар саясаты мәселелер басқармасынан «Алғыс хат»;
✦ 2018 жылы Атырау облысы І слетінде Атырау облысы әкімінің жанындағы әйелдер істері және отбасылық демографиялық саясат жөніндегі комиссиясының қорытындысында 
Атырау облысы бойынша жылдың «Үздік үкіметтік емес ұйым» номинация жеңімпазы;
✦ 2019 жылы Нұр-Сұлтан қаласында Қазақстан Республикасы ақпарат және қоғамдық даму министрлігі Д. Абаев үкіметтік емес ұйымдарға арналған «Мәдениет пен өнерді дамыту» номинациясы бойынша сыйлы ақынның лауреаты;
✦ 2019 жылы Нұр-Сұлтан қаласында Қазақстан Республикасы Президенті – Елбасы қорының директоры Д.Назарбаевадан, мұқтаж жандарға қамқорлық таныту жолындағы жасаған ерен еңбегі үшін, өзгелердің қиындығын шынайы жүрекпен сезініп, жан жылуымен бөліскені үшін – «Алғыс хат»
✦ Республикалық кітапханашылар арасында ұйымдастырылған «Тәуелсіздік – ел тілегі!» атты шығармашылық байқауынан «Бас Жүлде».
    
      Жалғыз ағаш орман болмайтын секілді жетістіктерге жету жолында кездескен қиындық көпірлерінен өту оңай емес. Бақыт сәулесіне жүзіңді сүйдіру үшін де, бел жазбай еңбек ете білу керек. «Жақсының жақсылығын айт, нұры тасысын» - демекші, ел еңсесін тіктер игі істерді атқарып, ел қошеметі мен марапатына бөленіп келе жатырған Шахарман Абілқасымқызы Тәуелсіздігіміздің көк туы мәңгі көкте желбіреп тұру үшін аянбай еңбек етіп, ұлыларды ұлықтау мақсатында тер төгіп келе жатырған, асыл жүректі жан. Бүгінгідей, жастардың бойында ұлттық құндылықтар, рухани сезімдер әлсіреп бара жатқанда, адам бойына ерік-жігер беріп, қайраттандырып жүрген, жүрегінің дүрсілі «Ұлтым», «Отаным» деп соғатын жандардың қатары көп болғай!