«Ер Едіге» қоғамдық қорының төрағасы

      Мемлекет – өркениеті мен мәдениеті, тілі мен діні, салт-дәстүрі мен өнері бір ұлтпен біріккен рулардың бірлесіп өмір сүретін мекені. Ал, билік - сол мекендеген халықтың басын біріктіріп, бірлік пен бейбітшілікте ұстап, бақытты да берекелі ғұмыр кешкені үшін тыныштықты қадағалап, озық технологияларды қолданып, саналы да салауатты өмір кешуіне қам жасайтын басқарушы топ. Жер бетіне адамзаттың табан ізі түскелі, жерін әр ғасырда әр түрлі басқарушылықтар болып келеді. Қаған, Хан, Патша, Президент. Ал, сол Елбасылардың үні мен сөзін халыққа жеткізе білетін жергілікті әкімдер мен депутаттар. Тәуелсіз елдің мәңгілік болып қалуы үшін билік тарапынан көптеген істер атқарылып жатыр. Бірақ, сол маңыздылығы мол шешімдер мен игі шаралар халық құлағына жеткенімен, жүрегіне жетіп жатыр ма?! Қаламымыздың ұшын сиясауытқа қанша малсақ та еңбектері мен жанкешті істері толық ашып жаза алмайтын халық қалаулылары мен ел билігіндегі азаматтарға құрмет көрсетіп қою азаматтық борышымыз.
      Таңының атқанын әндетіп жеткізетін, тауықпен таласа тұрып, қордаланып қалған әлеуметтік мәселелер мен ел мұңын, мұқтаждығын мінберге жеткізіп, түйіні мол істің шешімін табатын азаматтарымыздың бірі, ел мен елдікті, халық пен билікті жалғастырып, тілдестіріп келе жатқан дархан көңіл, пейілі кең, сабырлылығы басым, парасат-пайымдылығы болмысына ерекше кескін беретін Ахат Ахметұлы ауданның ғана емес аймақтың, ананың ғана емес адамзаттың бағына туған ұл. Бүгінде облыстың құрметті азаматы, ақылгөй дана ақасақалы атанған азамат 1948 жылдың 25 қыркүйегінде Ақтөбе облысы, Темір ауданының, Грачевский ауылдық кеңесінде дүниеге келді. Соғыстан кейінгі жағдай анау айтқандай мәз болмаса да, ел ішіндегі тыныштық орнап, ауыл ішін сәбидің күлкісі мен еңбектің кетпені бұзған сол жылдары балалық дәурен де болмады. Ойын баласы қолына күрек ұстап, егіс алқабына кетсе, енді ақыр басында бірі қауғасын құдық түбіне жіберіп жатты. 
      1966 жылы аудан орталығынан шалғай жатқан Шұбарқұдық ауылында орта мектепті бітірген Ахат осы жылы Ресейдегі Омбы мемлекеттік ветеринарлық институтына оқуға түсті. Ол кездері де мамандықтың төресі ауыл шарушылығында болатын. Жоғарғы оқу орнының қабырғасында жүргенде жігіт Ахат жақсы оқыды. Айтқан сөзді қағып алатын алғырлығы мен жан-жағындағыларды бір іске үйіріп алып кететін ұйымдастырушылық қабілетінің арқасында топ жетекшісі болып, бойындағы дарындылығы мен білімін студенттер мен ұстаздар алдында да сан мәрте дәлелдеді. Қолы тиген істі жандандырып жіберетін епті саусақтар Ахатты абырой биігіне көтеріп, оқу барысында спортпен айналысып, қоғамдық жұмыстарға белсене араласты. Талапты жас, білікті маман оқуды бітіргеннен кейін Қазақстанның ет және сүт өнеркәсібі министрлігіне тағайындалып жауапты қызметтер атқарды. Одан кейін еңбек жолы Целиноград облысындағы «Атбасар» ет комбинатында жалғасын тапты.      Ауылдан адам көшкенмен, адамнан ауыл көшпейді. Өзгелерді мойындатқан ерекше қабілеті мен өзінің еңбекқорлығының арқасында үлкен жұмыстар атқарып жүрсе де, алыстан мен мұндалап шақырған ауылына жиі көз салған Ахаттың арманы орындалып, 1972 жылы Ақтөбе облысына оралып, еңбек жолын Темір совхоз-техникумында жалғастырды. Тезге салса да шағыла қоймайтын қайратты да қайсар жас білек сыбана кіріскен ісін аяғына дейін жеткізбей қоймайтын. 1973 жылдың наурызынан 1979 жылдың желтоқсан айына дейін Темір аудандық комсомол комитетінің екінші, содан кейін бірінші хатшысы болғанда да қоғаммен, елмен, басшылықпен тығыз байланыста болып, алдына келген мұқтаж жандардың меселін қайтармай, қолынан келген көмектер жасап азаматтық танытты. Өз ісіне деген жауапкершілігінің арқасында басшылықтың оң көзқарасына ілініп, түрлі жауапты қызметтерде болды. Аудандық, халықтық бақылау комитетінің төрағасы, аудандық партия комитетінің ұйымдастыру бөлімінің меңгерушісі болып тағайындалып, елеулі істер атқара жүріп, одан кейін Темір аудандық атқару комитетінің төрағасы, халық депутаттары кеңесінің төрағасы болып сайланды.
      Ахат Ахметұлы алдында кездескен қиыншылықтардан қорықпады. Кедергілерден қашып емес, шешіп құтылатынын біліп, түйінді мәселелерде әділ шешімін айта біліп, үлкен жауапкершіліктерден қашпай өзіне жүктелген міндеттерді атқарды. Қиындықтың кәрі көкжалын, еңбектің дырау қамшысымен тұмсықтан ұрып сұлатып, еңбекқорлығы мен жауапкершілігінің арқасында биік белестерден көрінді. Бұл да көптің бойында бола бермейтін, адамдық қасиеттер мен имандылықтың нұры жүрегінде шуағын төгіп жатқан жанның бойынан көрінетін мінездер. 
      Аудан әкімшілігі басшысының орынбасары, әкімнің орынбасары, ауылшаруашылық бөлімінің бастығы қызметтерін атқара жүріп, мол тәжірибе жинақтаған Ахат 1999 жылы облыстағы жетекші аудандарының бірі - Темір ауданының әкімі болып тағайындалғанда да жұртшылықтың өзіне деген сенімдері мен үміттерін ақтай білді. Бұл жылдары тоқыраудың кәрі тарланы балаққа жармасып, ел тұрмысы күзеу тартып, тәуелсіз Қазақстан тарихындағы өте күрделі кезеңдердің бірі болатын. Бір орталыққа ағынған кеңестің жүй келмеске кетіп, жұрт не болғанын түсінбей, ел еңсесін енді көтеріп жатқан, жалақы мен зейнетақы төленбеген, жұмыс орындары қысқарған, облыстың және жалпы халықтың әлеуметтік-экономикалық жағдайы күрт нашарлаған кезең еді. Әлеуметтік те, экономикалық та көптеген мәселелер инвесторлар есебінен шешілуі керек еді.
      Әкім болып келген Ахат қажыған елдің тұрмысын жақсартып, тіршілікті бір жолға қою үшін, тығырықтан шығудың түрлі жолын іздеді. Жоғарғы жүз бұрғаныңмен олардың да қалтасы тесік, өзіңнен басқа сенім артар адам да басшылық та жоқ қиын кездер болатын. Бірақ, өзім деген жанның өгіз қара күші болатыны секілді, әлеуметтік жағдайды саралай, жаңа заманның тілін ерте түсінген әкім Ахат инвестор есебінен аудан жағдайын жақсартуға күш салды. Мұнай-газ саласы, теміржол және ауылшаруашылық кәсіпорындарымен тығыз ынтымақтастықтың арқасында аудандағы барлық оқу орындары жөнделіп, газ жылытуға ауыстырылды. 2000 жылдан бастап инвесторлардың күшімен мектеп-гимназия салынып, пайдалануға берілді. Айта кету жөн, ол - республикада бірінші болып, соның негізінде бірнеше жылдан кейін ауылдық жерлерде гимназияның жұмысын ұйымдастыруға арналған республикалық семинар өтті. Бірнеше жыл ішінде ауданда тағы 6 жаңа мектеп ашылды.
      Өте қиын жағдайда су және тұрғын үй-коммуналдық шаруашылық нысандарын қалпына келтіру және салу қажет болды. Барлық елді мекендерде су шаруашылығы нысандары коммуналдық меншікке қайтарылды және күрделі жөндеуден өтті, оның ішінде Кеңқияқ, Шұбарқұдық және Темір қалаларында. Ауданда кенеттен ата-анасынан айырылған ауқатты отбасылардан шыққан балалар тұрады. Мұндай балалар үшін – «Кор Хонинк» басшылық ететін «Maersk Oil Kazakhstan» компаниясының қаражаты есебінен отбасылық үлгідегі балалар үйі салынды.
      Әкім болып жұмыс істеген 10 жыл ішінде аудан экономикасы нығайды, аудан тұрақты дамып келе жатқандар санатына енді. Егер 1999 жылы аудандық бюджет 280 миллион теңгені құраса, 2009 жылға қарай ол 2 миллиард теңгені құрады. Осының арқасында аудандағы моральдық-психологиялық ахуал қалпына келді. Тоқырау - дейтін тар өткелден аз шығынмен өтіп, аудан экономикасын жолға қойған Ахат -2002-2004 жылдары Қазақстан Республикасы Президентінің жанындағы Ұлттық кеңестің мүшесі болып сайланды. Саналы ғұмырын ел мүддесі үшін, халықтың жақсаруы үшін жұмыс жасаған Ахат Ахметұлы бұл қызметте де жоғары мінберден көрінді. 
      Бұдан әрі қызметтік қызметте жоғарлап, 2009 жылы облыс әкімінің кеңесшісі, кейін ішкі саясат басқармасының басшысы болып тағайындалса, 2011 жылдың қарашасында «Нұр Отан» партиясы, Ақтөбе қалалық филиалының бірінші орынбасары, сол жылы ол қалалық мәслихаттың депутаты болып сайланды. Ал, 2017 жылдың қаңтарынан Ақтөбе қалалық ардагерлер кеңесінің және «Ер Едіге» қоғамдық қорының төрағасы қызметін атқарып келеді. 2019 жылы «Алтын орданың» 750 жылдығына байланысты Ақтөбе қаласында «Ер Едіге» ескерткіші орнатылуына үлес қосқан Ахат Ахметұлы «НұрОтан» партиясында, мемлекеттік қызметтегі, Ақтөбе облысына сінірген адал қызметі үшін төсбелгілерімен және сонымен қатар бірнеше рет дипломдар, алғыс хаттармен марапатталған. Бүгінде «Ақтөбе облысы Темір ауданының құрметті азаматы» -деген құрметті атағы бар. 

✦ «Еңбек ерлігі үшін» медалі;
✦ «Қазақстан Республикасының тәуелсіздігіне 10 жыл» мерекелік медалі;
✦ «Целинаның 50 жылдығы» мерекелік медалі;
✦ «Астанаға 10 жыл» мерекелік медалі;
✦ «Қазақстан Республикасының Конституциясына 20 жыл» мерекелік медалі;
✦ «Қазақстан Республикасының Тәуелсіздігіне 20 жыл» мерекелік медалі;
✦ «Тәуелсіздікке 25 жыл» мерекелік медалі;
✦ «Астананың 20 жылдығы» мерекелік медалі;
✦ «Ақтөбе облысына сінірген адал қызметі үшін» төсбелгі;
✦ Қазақстан Республикасы Президентінің «Құрмет грамоталары».

      Балалығын еңбекке, жастығын ел қызметіне, азаматтығын халыққа, ақсақалдығын кейінгі ұрпақ тәрбиесіне арнаған Ахат Ахметұлының өнегеге толы өмірі келер ұрпаққа үлгі. Құм көшіп, теңіз тартылса да, уақыт добы шыр айналса да артына өшпейтін із, өлмейтін сөз, игі істерін сабақ етіп қалдыра білген халық қалаулысы, аудан айбары, адамзаттың ақтаңгер ұлы туралы әлі талай мақалалар жазылып, азаматтық болмысы туралы кинолар түсіріліп, ақсақалдық келбеті суретшілердің қалқаламынан өнер туындысы болып туындайтыны анық.