«Жібек жолы - бауырластар» қоғамдық бірлестігінің жетекшісі

      «Қазақтың кең байтақ даласы» - деп әңгіме басталса, аяқты көсіле тастап тереңнен сөз қозғайтын ұлы елдің ұрпағы емеспіз бе, асты тұнған байлық қазақ елінің ұландары да арыстандай айбатты, жолбарыстай қайратты, қайсар да, қажырлы жігіттер мен қыздар. Картада көрсетілген территориясын көріп тұрып, аталарымыздың осындай жері бізге аманаттап кеткеніне мақтанасың. Ыза кернеген жерге - сүңгі салсаң судың атып шыққанындай, қай өңірін, қай облысын алсаң да жерінің асты да үсті де қазба байлықтарға бай. Соның бірі, талай ақынның отты жырына себеп болған, әншінің әнінде қалықтаған қасиетті де, киелі өлке Атырау өңірі. Өткенге бұрылып бір қарап, кейінге бір қадым шегініп көрсек, жаулап алмақ болып келген батырларын бассыз, тұлпарларын тұяқсыз қайтарған батырлары мен домбырасын шерткенде күн-түнімен үзбей жырлаған жыршылары, ел құрметіне бөленген әулиелері бар өлке, әлі күнге қазақтың ортаймайтын. таусылмайтын қазынасы болып келеді. Осы жер астындағы байлықты ел игілігіне жаратуға күш салып, ел экономикасының дамуына өз үлесін қосып келе жатқан айтулы азаматтар мен ел ағалары, құрмет көрсетуге лайықты жандар арамызда да көптеп кездеседі. Осындай жүрегінде адамгершілік қасиеттері мен Отанға деген патриоттық жалыны шарпып тұрған, халық байлығын ел игілігіне жаратуға қызмет етіп, мәңгілік елдің экономикасын алға сүйрелеуге сеп болып келе жатқан азаматтарымыздың бірі де бірегейі – Тазабекова Әлия Мұстафақызы.
      Жүк ауырын көтерген қара нардай, қай салаға барса да қолына алған ісінің бойына қан жүгіртіп, өз ісінің шебері болып қана қоймай игі істерге өзге азаматтарды тартып, баулып, кейінгі жастардың жоғары білім алуы үшін еңбектеніп келе жатқан Әлия Мұстафақызы 1967 жылдың 24 сәуірінде Атырау облысы, Жылыой ауданы, Құлсары қаласында дүниеге келді. Түгін тартсаң мұнайы көрінетін, берекелі етсең ұдайы көрінетін өлкенің самалына балалық бұрымын сүйдіріп өскен ол - 1974-1982 жылдары Құлсары қаласындағы А.С.Пушкин атындағы орта мектебінде білім алды. Мектеп қабырғасында үздік оқыған баланың арманы биік болады емес пе, өскенде үлкен жетістіктерге жетуді алдына максат етіп қойған Әлия 1982-1985 жылдары Атырау қаласындағы медициналық колледжінен «Мейірбике» мамандығын алып шықты. Ойы ұшқыр, түйіні мол қай істің де оң шешімін оңай табатын тапқыр, алғыр қыз - 1989-1995 жылдары Алматы қаласындағы КазПТИ В.И.Ленин атындағы «таукен геология инженері» мамандығы бойынша оқып, Атырау мұнай-газ институтын бітіріп шықты. 
      Кездескен жағдайларға байыптылықпен қарап, әділ шешімін табуға тырысатын, ойына алған ісін ұршықша айналдырып алып кететін пысық қыз Әлия өмірінің негізіне айналған мамандығы бойынша алғашқы еңбек жолын 1998 жылы Атырау мұнай-газ институтының «Әскери жұмылдыру және төтенше жағдай» бөлімшесінде бас маман болып бастады. Тосын жай айтып келген бе, есікті қағып ескертіп кірмейтін табиғаттың ерке мінезін түсіну үшін де айрықша түйсік, пайымдылық, білім мен ізденіс керек. Бұл жағынан келгенде Әлияның жұмысында ешқандай қиыншылық болмады. Мектептегі алғырлық қабілеті мен жоғарғы оқу орнында алған білім-тәжірибесі бас маманды нәтижелі жұмыс істеуге тартып, өз қызметін толық және үздік атқара білді. «Мен оқып-тоқып болдым. Көп нәрсені білдім» - деу адамның дамуының тоқтауы деген сөз. Білікті, алға ұмтылатын маман әрдайым ізденіс үстінде болуы керек. Сол кезде ғана алыстан мұнартып көрінген тау шыңы жақындай түспек. Осыны ұғынған Әлия 2001-2004 жылдары Атырау мұнай және газ институтын екінші мамандық «Инженер-экономист» бойынша тәмәмдады. 
      Бір орнында өсіп-өнеге алып бәйтеректей 17 жыл «Бас маман» болып қызмет еткен Әлия 2015-2016 жылдары Атырау мұнай және газ институтының ішінен «Жібек жолы – қытай тілін оқыту орталығы» ашылып, осы орталықта жауапты жетекші болып қызмет атқарса, 2017 жылдың қаңтарынан бастап «Жібек жолы - бауырластар» қоғамдық бірлестігін құрып, осыған өзі жетекшілік етіп келеді. Әлия - өз саласының үздік маманы ғана емес, қоршаған ортаға бей-жай қарай алмайтын, ел тұрмысын, қоғам әлеуметін көтеруіне қол үшін созып, еңбектеніп келе жатқан қоғам белсендісі. Қоғамдық бірлестікте жүріп, құрылғанынан үш жылдай уақыт болса да талай игі істердің атқарылуына бастамашы бола білді.
      Атап айтар болсақ, Әлияның ұсыныс бойынша 2015 жылдың тамыз айында Атырау мұнай - газ институтына оқуға Қытай еліндегі қазақ қандастардан бала тартуға басшылықтан бұйрық алып, Қытайға барып 100 баланы қабылдап, студенттердің төрт жыл бойы жақсы білім алуына қамқорлық жасады. 2015 жылдың қыркүйек айында Атырау мұнай және газ институтында «Қытай тілін оқыту орталығына» басшылық етіп жүрген жылдары ҚХР жоғары оқу орындарымен байланысып, институтқа «Конфуции» бағдарламасы бойынша оқушы жіберуге келісіп, Қытай білім министрлігінің білім грантына ұсыныс жасап, нәтижесінде 2016 жылдың маусым айында 11 студентке мемлекеттік білім грантының иегері атануға ықпал етті. 
      Қасқалдақ қанды қазақ, қарға тамырлы. Аталарымыздың кең жерлерде көшіп-қонып жүргені дархан даланың кеңдігі. Бірақ, тірсегі діріл қаққан Кеңес Одағы құлағаннан кейін, үлкен шаңырақтың 15 ұлындай әр ел өзінше енші алып, тәуелсіз деп танылып, шекарасын айқындап жатқан кезде көп қазақ өзге елдің аумағында қоршалып қала берді. Қойы қоралас, желіні мен өрісі бір болған ауылдар енді жаңа талап бойынша қай елдің аумағында қалды, сол елдің азаматы болып танылып, тірлігін кеше берді. Осыдан кейін барып, «Оралман» - деген атау беріліп оларды елге оралту туралы бағдарламалар дайындалып, әркім хал-қарекетінше ата-жұртқа оралып жатты. Бірақ, ең кедей деген малшының өзінде бір қора қой болған, сол кездері көп қазақ өзге елде қалып қойды. Тәуелсіздік алғалы қандастарды елге әкелуге қаншама жұмыстар жасалып жатырса да, келе алмай отырған қандастарымыз әлі көп. Шет елдегі қазақтарды Отанына оралту тек мемлекеттің ғана міндеті емес, жүрегі бір соққан, тілі бір әр қазақтың жұмыла істейтін жұмысы. Қандастарды елге оралтуда Әлия да аз жұмыс атқарған жоқ. Қолы жеткен жерге дейін қарманып барып, жәутеңдеп сыртта жүрген қазақтардың елге оралуына сеп болып, талай жанның ақ батасы мен алғысын алды. 
      Қытайдан келген қандастарды ортаға бейімдеу және құжаттандыру жұмысына бірорталықтан жетекшілік ету үшін «Жібек жолы - бауырластар» бірлесітігін ашып, әрі бұл жастардың қоғамға сіңісіп кетуі үшін әр түрлі спорттық іс-шаралар мен қоғамдық жұмыстарға белсене араласуына күш салып, қадағалап отырды. Оралмандардың құжаттандарылуы және Қазақстан Республикасының азаматтығын алуы үшін өзі бас болып көп жұмыстар жүргізді. «Әрбір баламен жұмыс жасау адамға өзіндік қиыншылықтарымен қоса үлкен жауапкершілік арқалатады. Қажыр-қайрат пен көп уақытыңды жұмсауға тура келеді. Бірақ қазақ мемлекетінің өркендепөсуі үшін, болашағы үшін жұмыс жасап жүргенін есіңе түскенде шаршағаның ұмытылып, кеудеңді бір ерекше шаттық, қуаныш билейді, көңіліңе жұбаныш сыйлайды. «Жібек жолы - бауырластар» қоғамының қаржылай көмек көрсетуімен ақын Уәлібай Нұрбақыттың 2017 жылы«Көкжалдар» - атты дастандар жинағы мен 2019 жылы «Қалибек Хакім» - атты кітаптарын баспадан шығарып беруге қол ұшымызды бердік. 2015 жылы елге әкелген қандас студенттеріміз 2019 жылы оқуларын аяқтап, дипломдарын алды. Бүгінгі таңда әрқайсысы әр түрлі салады еңбек етіп жүр. Енді осы студенттердің ата-анасы мен бауырлары елге қоныс аударып келуде. Жұмысымыз осылармен жалғасын тауып келеді» - деп ішіндегі үзік сырын қағазға түсірген Әлия Мұстафақызы атқарған еңбектерінің арқасында түрлі «Грамота», «Алғыс хаттар», «Дипломдармен» марапатталды. 

✦ 2016 жылы жылдың 5-7 сәуір аралығында өткізілген «Көп тілді білім берудегі интеграция» (қазақ, қытай, орыс, ағылшын тілдері қарым-қатынасы) халықаралық семинарына қатысып, баядама жасағаны үшін - сертификат;
✦ 2017 жылы ізгілік пен жақсылықтың бастауы болған Ұлыстың Ұлы күні Наурыз мерекесін жоғары деңгейде ұйымдастыруға атсалысқаны үшін, ұлттық құндылықтарды құрметтеп, дәстүрімізді дәріптеуге жастарымызды ұлт жандылыққа тәрбиелеуге өз үлесін қосқаны үшін - «Алғыс хат»;
✦ 2018 жылы Ұлыстың Ұлы күні Наурыз мерекесіне орай ұйымдастырылған «Ұлттық салт-дәстүр» байқауында қазақ халқының салт-дәстүрі мен ізгі қасиеттерін шебер насихаттап, халықтың бай мұрасын шебер жеткізе білгені үшін Атырау қалалық әкімдігінен «III дәрежелі диплом»;
✦ Қазақстан Республикасының Тәуелсіздік күніне орай Атырау мұнай және газ институтының дамуы мен гүлденуіне қосқан үлесі және жастарды тәрбиелеу ісінде қол жеткізген табыстары үшін институт атынан «Құрмет грамотасы»;
✦ Ата-жұртқа оралып, тамыр тартсақ деген ата-аналардың арманын жүзеге асыруға себеп болып, болашақ сыйлағаны үшін, биік адамгершілік пен махаббат сыйлап қамқорлық танытқан еңбегі үшін Қытайдан келген 100 студенттің ата-анасының атынан «Алғыс хат».

                         Әлияға!
      Еркелікті ежелгіжасырыпсың жанарға,
      Сезіледі тек содан анда-санда хабарда,
      Таптап өтіп қаншама тағдыр жүгі жатса да,
      Елең етіп,оларды сен алмадың назарға.

      Қыз ұзатып, келін ал, орын-орын қойдырып,
      Жоқтатпауға әкені жүрдің ылғи –ой қылып.
      Жеткіздің де оларды, өзіңді де ойлауың,
      Нұрбақыттай жар таптың, басың қостың той қылып.
 
      «Қазақ десе қашан да қайысады қабырғаң,
      Шұбыруда қазақтар сен Қытайдан шақырған.
      Ана болып ұл-қызға, маңдайынан сыйпадың, 
      «Жібек жолын» аштың да, үй тұрғыздың «тақырдан».

      Жүрегің бар кіршіксіз, жаның жаздай жайдарлы,    
      Қызыңның бар бұрымы, ұлыңның бар айдары.
      Алып келіп қытайдан жүз қазақтың баласын, 
      Қазағыма жүз отау тігіп бердің пайдалы.

      Кей еркектің қолынан келе бермес істерің,
      Жылжығанмен жылдарың, тұғырыңнан түспедің.
      Мен апаң боп тілеймін, тумасам да туыстай,
      Аппақ арман үмітің, уысыңа түскенің» - деп ақын жазушылар одағының мүшесі Жаниба Карасаева Әлияға арнап жыр төгіп, Әлия Мұстафақызының жүрегіндегі тазалық пен әділдікті, мейірімі күннен де мейірбандығы мен алғыс арқалаған адамгершілік қасиеттерін өлеңге сыйдырған ақын, жазушылар одағының мүшесі Жаниба Қарасаеваның берген бағасынан артық баға, шығарған тұғырынан биік жер жоқ. Шет елде жүрген қандастарымыздың елге оралуына үлес қосып, бірнеше қазақтың емес жүздеген, мыңдаған қазақтың тағдыры үшін алаңдап жүрген аналық маххаббаты мол, асыл жүректі жанға қояр ескертіш алтыннан болмақ!