Хисметуллин Ғаббас Хисметоллаұлы 1944 жылдың 23 сәуірінде Атырау облысы , Исатай ауданындағы Мыңтөбе ауылсоветінде дүниеге келген. 1961 жылы Забурын селосындағы Куйбышев атындағы орта мектепті бітірген.
      1962-1967 жылдары Жамбыл қаласындағы  су шаруашылығы- құрылыс институтында оқып, құрылысшы-инженер мамандығын алған.1978-1980 жылдар арасында Алматы жоғары партия мектебінде оқып, саясаттанушы дәрежесін иемденген.
      Ғаббас Хисметоллаұлының бүкіл өмірі құрылыс саласымен тығыз байланысты. Еңбек жолын «Гурьевводстрой» тресіне қарасты құрылыс басқармасының шеберінен бастап, кейінгі бес жыл ішінде прораб, жобалаушы инженер, бас инженер лауазымдарында болды. 1974-75 жылдары құрылыс материалдары комбинатының бас инженері қызметін атқарды. Сол жылдары «Гурьевводстрой» тресіне қарасты мекемелердің өндірістік базалары, темір-бетон шығаратын заводтың құрылысы, №37 кәсіптік-техникалық училищенің комплексі, «Водник» деп аталатын поселканың құрылысы жүзеге асты.
      1975 жылдан бастап партия, кеңес қызметіне келді. Гурьев облыстық партия комитетінің құрылыс және қала шаруашылығы бөлімінің нұсқаушысы, Гурьев қалалық партия комитетінің құрылыс және қала шаруашылығы бөлімінің   меңгерушісі қызметтерін атқарды.
      Құрылыс саласының білікті маманы ретінде, осы салаға партиялық басшылықты нығайту мақсатында, Гурьев облыстық партия комитетінің шешімімен 1984 жылы облыстық партия комитетінің құрылыс бөлімінің меңгерушісі қызметіне бекітілді. Осы жылдары Атырау облысы, оның ішінде Атырау қаласында маңызды нысандар бой көтерді. Қала халқына қызмет көрсететін сауда, мәдениет орындары, Полипропилен химия зауыты, үй құрылысы комбинаты, сүт өнімдерін шығаратын зауыт, қазақ драма театры, «Авангард», «Вокзал маңы» шағын аудандардың құрылыстары   жүзеге асты.
      1985 жылы Одақ бойынша Теңіз мұнай кешенін игеру туралы Орталық Комитет пен Совет Одағы Министрлер Кеңесінің қаулысы шықты. Теңізде газ өңдейтін зауыт салу, Құлсары поселкасын 140 мың халқы бар қалаға айналдыру, Құлсары мен Теңіздің  арасында темір жол, тас жолдар салу, алғашында  бес шағын ауданның құрылысын, соған қажетті   микроқұрылымдарын жүргізу міндеттелді. Соған байланысты облыстық партия комитетінің ұйғарымымен Ғаббас Хисметоллаұлы  Жылыой (Ембі) ауданына аудандық атқару комитетінің төрағасы қызметіне жіберілді. Үш жылдың ішінде Құлсарыдағы үш шағын ауданның құрылысы, Құлсары мен Теңіздің арасындағы темір жол, тас жолдар, Теңіздегі 5 мың адамға арналған вақталық қалашық, магистральды су құбыры, нан, сүт зауыттарының құрылысы   т.б. пайдалануға берілді. Бұларды жүзеге асыру үшін «Теңізмұнайгаз», «Теңімұнайгазқұрылыс», «Теңізэнергоқұрылыс» деп аталатын 3 өндірістік, құрылыс бірлестік, 13 құрылыс тресі, ондаған құрылыс басқармалары жаңадан ұйымдастырылды. Қазақстанның басқа облыстарынан жоғардағы қаулыға сәйкес 5 құрылыс комбинаты вахтамен жұмыс жасады, үш ауысымды жұмыс ұйымдастырылды, соның нәтижесінде белгіленген іс шаралар уақытында жүзеге асты
      Ғаббас Хисметоллаұлы Теңіз мұнай кешенінің байлығын игерудің алғашқы кезеңінде ауқымды жұмыстарды ұйымдастыруда тікелей басшылық етті. Аудан экономикасы мен мәдениетінің қарқынды дамуына үлкен үлес қосты. Құлсарыдағы Қамыскөлдің жағасында сәнді үйлер қатар түзеді.
      Өз ісінің шебері болуымен қатар, ұйымдастырушылық қабілеті мен талапшылдығын ескерген, көптің аманатын арқалай алар азаматтығына сенген  жергілікті халық  Ембі аудандық, Гурьев қалалық, Гурьев облыстық  Кеңесінің депутаттығына бірнеше рет сайлады. Ол  депутаттық мандаттың жауапкершілігі мен жүктейтін қызметін жете түсінген азамат. Бүкіл өңірдің гүлденуіне бар күш-қайратын жұмсады.
      Ол 1991 жылы  Атырау облыстық партия комитетінің іс басқарушысы қызметіне қайта оралды. Кейін әкімшілік құрылған жылдары сол іс басқарушылық қызметін жалғастырды.
      1993-1994 жылдары Атырау облысы әкімінің аппарат жетекшісі қызметін атқарды.
      Сол жылдардан бастап шетелдік инвесторлар келе бастады, біріккен кәсіпорындар ұйымдастырылды. 1994 жылы  Болгарияның «Главболгарстрой
      Компаниясымен біріккен алғашқы  кәсіпорын ұйымдастырылып, сол компанияға бас директор болып тағайындалып, 2002  жылға дейін жұмыс жасады. Атырау қаласындағы   орталық дене шынықтыру, сауықтыру кешені   8 айдың ішінде салынып, 1996 жылдың қаңтарында алғашқы Президенттік шырша Ел басының қатысуымен сол нысанда өткізілді. Сол жылдары   «Қазақстанкаспийшельф» компаниясының  кеңсесі мен зертханасы, Атырау мұнай айыру зауытының бірқатар нысандары, жедел жәрдем ауруханасы, балық өсіретін зауыт т.б. құрылыс  салынып пайдалануға берілді.
      2002-2007 жылдары  «Казхиммонтаж холдинг» компаниясының Атыраудағы филиалын басқарды. «Казтрансгаз» компаниясының тапсырысы бойынша  Макат-Индер газ құбыры, Аджип компаниясының Қарабатандағы вахталық қалашығының инженерлік құрылымдары, резервуарлық паркі т.б. салынып, пайдалануға берілді.
      Ғаббас Хисметоллаұлы зейнеткерлікке шыққаннан кейін де облыстық ардагерлер кеңесінің президиум мүшесі, Атырау облысы Билер кеңесінің төрағасы ретінде  қоғамдық бірлікті, ұлтаралық татулықты, мемлекетіміздің негізі болып есептелетін жанұя бірлігі мен татулығын сақтауда, Елбасының жүргізіп отырған саясатын насихаттап, жастар тәрбиесіне, басқа да шараларға ақыл-кеңесін беріп, өз үлесін қосып келеді.
      Ұлағатты аға, өз ісінің білікті шебері- еліміздің экономикасының өсіп- өркендеуіне, оның ішінде құрылыс саласына қосқан орасан зор еңбектері үшін  Қазақстан республикасының «Құрметті құрылысшысы, Атырау облысының және Жылыой ауданының Құрметті азаматы атақтары берілді.
      Бірнеше дүркін облыстық, қалалық, аудандық партия комитеттерінің  мүшелігіне сайланды. 
      Есімі Қазақстанның құрылыс саласының «Құрмет кітабына», «Қазақ жерінің зиялы азаматтары» атты ғұмырнамалық жинақтар сериясы кітабына, «Ардақты ардагерлер мен билер», «Атырау облысы ардагерлерінің 100 есімі» автобиографиялық энциклопедияларына енгізілген.
      Жанұялы, 2 ұл өсіріп, олардан өрбіген  5 немере, 2 шөбере тәрбиелеп отырған құрметті ата.