Қазақ қызы туралы сөз болғанда, шешендердің тіл ұшына, ақындардың қаламына ілінбеген небір теңеулер қалмайды. Жер астындағы қазусыз жатқан алтыннан, тылсым сырын ішіне бүгіп жатырған күнге дейінгі асыл сөздер, қағаз бетінде өрнектеліп өріліп жатады. Міне, бұл ойдан шығарылған сөз емес, орамалының өзі бес жүз жорға тұратын қазақ қызына берілген бағалар мен асқақ орындарының айғағы. Күндіз күнге қақталып, түн көз ілмей төрт түлік малы мен қызының ары мен намысын қорғаған аталарымыз, қызын оң жақта ұстаған. Әке мен ағадан абырой, ана мен жеңгеден тәлім көрген, қырық үйден тыйым болған қазақ қыздарының арқасында небір әлемді билеген дүлділдер, ақындар мен жыраулар, әншілер мен батырлар дүниеге келді.
      Ардың жүгі арқаға батқанда жанын тасалап қалмаған ерлермен бірге қолына найза лып, тұлпарды тақымға қысып, жауға шапқан қыз Назымдар мен ел билігінде ханға лайықты істер атқарып, қарына қамшы іліп шешім айтқан Тұмар ханымдар, қара күйе жағылса да жар сөзіне қарсы келмей еріне бағынған Бегім Ана қазақтың мақтан тұтар қыздары мен аналары. Өткен ғасырды уақыттың жөргегіне орап тастап, жиырмасыншы ғасырға көз салсақ Ұлы Отан соғысында жанқиярлық ерлік көрсеткен пулеметші Мәншүк пен мерген Әлияның, жау ұшағын өз жеріне кіргізбеген Хиуаздар туралы талай әндер айтылып, кітаптар жазылып, суреттер салынды. Батыр қыздарымыз туралы кітаптар әлі де жазылып, әлі де әншілер әнінде есімдері шырқала бермек. 
      Бүгінгі біздің мақаламызға арқау болып отырған Әбішкеліні Айша (Оразбай Айтжан Ораққызы) анамыз қазақ қыздарының мерейін өсіру үшін еңбек етіп, қазіргі заманға сай бағыт беріп, арын күзетіп келе жатырған асыл жүректі жан. Әйелдерді ақпараттық қолдау жөніндегі «Айша» қоғамдық қорының жетекшісі 1956 жылдың 29 шілдесінде Ақмола облысы, Зеренді ауданы, Жаңаауыл ауылында дүниеге келді. Аялы алақаны тағдырдан  көрген, тағдыр желінен тоңған талай нәзік жандылардың бұрымын сипап, бақытты өмірге бағыт беріп келе жатқан анамыз туралы білмейтін жан кем де кем шығар. Жүрегіндегі мейірім күн нұрынан да жылы Айша анамыз өзгелер секілді он жылдық мектепті тәмәмдаған соң, білім іздеп үлкен қалаға аттанады. Боламын деген баланың талабы мен үмітін болаттан жасалған алам қылыш да кесе алмайды. Алдына үлкен мақсаттар қоя білген ол 1983 жылы Қазақ Мемлекеттік Университетінің журналистика факультетін бітіреді. Жаңалықтың жаршысы болу кім-кімнің де арманына айналған сол бір кездері Айша анамыз да өз мақсатына табандылықпен қол жеткізе білді. 
     Ар-намысын орамал жүзімен көмкерген жас 1983-1990 жылдары жергілікті аудандық гезеттер мен басылымдарда жұмыс жасай жүріп, қоғамдық өмірге де белсене араласып, көктемі егіс кезінде қыздар звеносын басқарды. Қол күші  сол кездері нәзік жанды болсада ерлермен бірге қимылдап, кез-келген қыздың қолынан келе бермейтін істерді атқарды. Таңмен таласа тұрып, күн сәулесімен алтын алқапқа айналған алаңда К-700 тракторымен бидай сеуіп, күзде СК-53 Нива, кейіннен Енисей-1200 комбайндарымен егін орып, астық бастырды. Еңбектің наны қашан да тәтті, әрі берекелі емес пе, ел қатарында жүріп жұмыс талғамаған ол өзінің мамандығына қайта оралды. 
      Қолына алған  істі ұршықша айналдырып алып кететін, пысық әрі алғыр қыздың түн баласы жамылып өлең шумақтарын қағаз бетіне түсіретін ақындық өнері бар болатын. Алдаспан шапса да өлмейтін өнер Айша анамыздың жүрегінде от болып жанып, шығармашылық жұмыстарға жетелеумен болды. Ақыры, 1990 жылы айтыс ақыны ретінде Көкшетау қаласына ауысып, облыстық радиода қызметке орналасты. Ойы ұшқыр, жүзі күн сәулесімен жылтылдаған алдаспандай тіліп түсетін тілі өткір, қағаз бетіне түсірген өлең жолдары сиясы кетпей жатып өз оқырмандарын тапқан ол қызметте де өсіп, 1992-1993 жылдары Республикалық Қазақстан теле-радио кешенінің «Шарайна» ақпараттық бағдарламасының Көкшетау облысы бойынша меншікті тілшісі қызметін атқарды.
     Тілшілік қызметімен бірге еліміздің түкпір-түкпірінен қатысқан аламан додаларда, кіл жүйріктер арасында сауырына қамшы салдырмай топ жарып келген кездері де аз емес. Тілшілікпен қоса шығармашылықты да қатар алып жүрген ақын анамыз 1994 - 1995 жылдары жаңадан ашылған Көкшетау аудандық Бұлақ газетінде және аймақаралық Оқжетпес газетінде «жауапты хатшы» қызметін атқара жүріп, жүзіне мейірім, жүрегіне имандылық нұрын ұялатып 1995-1996 жылдары ҚМДБ-ның Ислам институтында мұсылманша сауат ашты. «Сөз түзелді, тыңдаушы сен де түзел» - деп, ұлы ақын, кемеңгер Абай Құнанбаев атамыз айтпақшы, имандылығы мен ибалығы үйлесім тауып, жүрегіне имандылық құмырасынан зәм-зәм суын толтырған ол тыңдармандарына да руханиятқа толы мағыналы сөздері мен өлең жолдарын арнай білді.
      1996-1997 жылдары «Таң «ТелеКомпаниясында «әйел және уақыт» бағдарламасының «Бас редакторы» болып тағайындалған Айша Ораққызы 1997 жылы дүниежүзі қазақтары қауымдастығының Ақмола филиалына Төраға орынбасары Қ.Найманбаевтың жолдамасымен басшы болып ауысып келіп, ол жерде Октябрь сияқты ағалар отырғанын көріп, кедергі жасамау үшін  Қазақстан телерадио кешенінің Астанадағы Ақшам ақпарат бағдарламасына жұмысқа кірді. Тілін кәлимаға келтірген әрбір мұсылманның жүзіне бақыт нұры ұялап, жан тыныштығы тапқанындай, жүрген жерінде күн сияқты нұр шашып, қызметте түрлі жетістіктерге жетіп, мекемесін мерей биігіне көтерді. 1997-1999 жылдары ол жерде де редактор, журналист-видеооператор міндеттерін  атқарған Айша анамыз сол бір кездердегі қоғамдағы белең алған келеңсіз нәрселдерді жою үшін, отбасындағы әйелдердің құқын қорғап, әр жанұяға иман нұрын ұялатып, бақыт күлкісін есіттіру үшін 1999 жылы «Айша» қоғамдық бірлесітігін құрды. 
      «Мақсаты - бұқаралық ақпарат құралдарының, көрнекі  үгіт-насихат, уағыздың, дәрістің  көмегімен, сондай-ақ   рухани-танымдық, тәрбиелік кітаптар, брошюралар, видеофильмдер шығара отырып, семинарлар,   конференциялар, кездесулер, имандылық салтанаттарын ұйымдастырып отыру арқылы әйел затының мемлекет   құрылысына отбасы, ұрпақ  тәрбиесі арқылы белсене қатысуына жәрдемдесу,  олардың  ұрпақтың   Отан сүйгіштік қасиеттерін дамытуға имандылық дәрістерімен көмектесу,  рухани  сауаттарын   ашу, бизнеске,  ғылымға, қоғам өміріне белсене араласуларына қолдау жасау,   жалғызбасты әйелдердің, көп балалы аналардың, қыз балалардың имандылық жолмен  бақыт табуларына, оқыту арқылы жәрдемдесу» болып табылатын қор торыққан, қиналған, жұмыссыз адамдарды құрылысқа, тазалық жұмыстарына, қолөнерге   жұмылдыра отырып, кәсіп үйренулеріне, жұмыс табуларына, алға қарай Жаратқанға сыйынып, қорықпай алға басуларына қолдау көрсетіп келеді. Әрбір адам өзінің малымен, жанымен, қанымен өз Мемлекетіне көмек беруге тәрбиелеп келе жатырған қоғамдық қор мұқтаждың қажетін өтеп, жалғыссырағанның жаны серік, мұңына сырлас болудан жалыққан емес.
      Жұдырықтай жүрегі мейірім мен иман дейтін зәм-зәм судың тамшыларына толы Айша анамыз 1999 жылға дейін аудандық, облыстық, республикалық басылымдарда, Қазақстан телерадио кешенінде журналистік қызметтер атқарып, дін жолында түрлі жұмыстар жасап, қайырымдылық іс-шараларды өткізіп келеді. Қоғамдық қор тек қана шағын шараларды өткізіп қоймай, әлеуметтік маңызы бар нысандар салып, тұрғындар қажетіне ғимараттар салып келеді. Бұл жағынан Айша қоғамдық қорының II-ші категориялы ҚР Агенттігі берген құрылыс монтаж жұмыстарына Мемлекеттік Лицензиясы бар. 
      Қазір Елбасы Нұрсұлтанның анасы Әлжан ана атындағы қыздар Медресесі құрылыс кешенінің жұмыстарын Қазақстан мұсылмандары діни басқармасының келісім бата хаттарын құрылыс басталарда алып, Астанамыз Нұр-Сұлтан қаласында  және Алматы облысы, Қарасай аудандарында жүргізуде. Бүгінде Астанада 2003-ші жылдың желтоқсанынан бастап,  Медресенің алғашқы нысаны -   Әбіш ата Назарбай мешіті жұмыс жасап келеді. 
      Қазақ жетімін жылатып, жесірін қараусыз қалдырмаған ел. Жау тұлпарының тұяғы ел шетіне келгенде де қыз абройын биік ұстап, жесірін жау қолында қалдырмаған. Қарындастың ары үшін ұлы шайқастар болған. Осының өзі аталарымыздың қайда тіршілік кешсе де, жаугершілік заман болса да, тігерге тұяғы қалмаса да ар-ұятты өлімнен жоғары қойғанының дәлелі. Жерде жетімнің көзінен жас тамса, көкте періштелер күңіренетінін жүрегімен ұғынған аталарымыз тар заманда да бес уақыт намазын қаза қылмаған. Салт-дәстүрін тұрмыста қолданып, дінін берік ұстанып, әрқашан бірлікте, елдікте, абройлы өмір сүрген. 
      Осындай аталарымыздың берік ұстанымын бағыт етіп, қайда жүрсе де қайырымдылық жасап жүретін,  әр ісінде береке мен бақыт күліп тұрған, әділдік үшін, қияс сөз айтпайтын, адами қасиеттерді жоғары қоятын, баланың ғана емес барша ұландардың анасы, бірнеше немеренің ғана емес, барша немеренің әжесі атанған асыл жан, алтын жүректі ана, Қазақстан ақын-жыршылар одағының, ҚР журналистер одағының мүшесі Әбішкеліні Айша анамыз тарих төрінен, адамзат жүрегінен орын алған абзал жан, алаштың анасы, ардақты әже!