Адам баласы танып білуге ұмтылған жер шарында – бір біріне ұқсамайтын неше түрлі мамандық бар. Барлығы да белгілі бір деңгейде қоғамдық рөл атқатарды. Бір біріне ұқсайтын, тіпті үш қайнаса сорпасы қосылмайтын мамандықтар немес бір бірін алмастыра алатындары да жетерлік. Ал ешкіммен алмастыра алмайтын мамандықты білесіз бе, білмесеңіз айтайын ол – әке болу. Балаңызға тек сіз ғана беру керек нәрсені сізден басқа ешкім де бере алмайды. Өйткені Сіз – әкесіз. Балаңызды балапан кезінен ер адамның бойынан табылуы тиіс қасиеттерге баулып қанаты қатып қыран болуына әкенің әсері көп-ақ. «Жақсы әке жаман балаға қырық жыл азық» - деп бекер айтпаса керек, ұяда көрген тәлім, тектілік ер жеткенде өміріне тұтынар қорегі. Ал осы жауапкершілікті мамандықты кім қаншалықты деңгейде атқарады ол әр кімнің өзіне қояр сұрағы.
      Сөз басын әке туралы бастадық, өйткені біздің кейпкер «ат тұяғын тай басар» - деп әкесінің бойына құйған тәрбиесі арқасында үлкен тұлғаға айналған адам. Кейіпкерімізді таныстырмас бұрын әңгімені Сүтен ақсақалдың өзінен яғни кейіпкеріміздің әкесінен бастағанды жөн көрдік. Өйткені жоғарыда айтқанымыздай бүгінгі кейіпкеріміздің жеткен жетістігі мен жинаған абыройы Сүтен ақсақалдың берген тәрбиесінің арқасы деп білеміз.
      Қазамбаев Сүтен – 1906 жылы туылған.  Сүтен әкей ең алғаш еңбек жолын Жезқазған кен байыту комбинатында бастаған. 1928 жылдан 1956 жылға дейін  28 жылын осы шахта жұмысына арнады. Қызметті қатардағы слесарь болып бастады. Жұмыстағы жауапкершілішгі мен еңбекккерлігінің арқасынада 1940 жылдан бастап шахта басшысы қызметіне дейін көтерілді. Қарамағындағы қызметкерлерді басқара жүріп  ел дамуы мен шахта жұмысын алға сүйреді. 
      Аянбай еткен еңбектің арқасында,  соғыс жылдарында әкей басқарған шахта ұжымы ерен еңбегімен бірнеше рет Қорғаныс Наркомының ауыспалы Қызыл туын жеңіп алған. Ел алдындағы адал қызметі мен абыройының арқасында «Қызыл ту», «Еңбек даңқы»   ордендерімен және бірнеше медальдармен марапатталған. 
      1946 жылы Ұлы жеңістің құрметіне Жоғарғы Наркомның шешімімен Жезқазған өңірінде бірінші болып жеңіл Победа автокөлігімен марапатталған адам. Өзі талай жыл еңбек етіп өсуі мен өркендеуіне үлес қосқан Жезқазған комбинатының іргесін қалаушылардың бірі. Ел эканомикасына толағай табыстар әкелген осы комбинаттың білікті басшысы бола білген Сүтен әкейдің атына Жезқазған қаласында  көше берілген. 
      Ер есімі ел есінде деген осы болар.  Енді негізгі тақырыпқа негізгі кейіпкеімізге оралсақ. Осындай ардақты әке тәрбиесін көріп өскен біздің бүгінгі кейіпкер – Қазамбаев Мұрат Сүтенұлы.
      Қазамбаев Мұрат Сүтенұлы – 1952 жылы, Қарағанды облысы Жезқазған поселкесінде дүниеге келген. Мен әкемнің барлық жақсы қасиеттерін бойыма жинап өстім дейтін Мұрат ағамыз  он жылдық мектепті 1970 жылы Жезқазған поселкесінде бітірген. Кейін   екі жылдық  әскери борышын  өтеп келген соң  1972 - 1974 ж.ж. өндірісте электр жүйелерін жөндеу жұмысы бойынша  еңбек жолын басталған. 1974 - 1979 ж.ж. Жезқазған облысы ауыл шаруашылық басқармасының байланыс инженері болып қызмет атқарды. Жұмыс жасай жүріп білімін жетілдірген Мұрат ағамыз  1975 жылы Алматы байланыс техникумын сырттай оқып бітіреді. Қатардағы қарапайым қызметкер болып басталған еңбек жолы 1979 жылдан Жезқазған облысы ішкі істер басқармасындағы қызметке ауысады. Ал 1980 жылы шаңырақ көтеріп от басын құрады. Жолдасы Көкшетау қаласының  тумасы Жаханова Ляззат. Алла берген алтын асықтай үш ұл тәриелеп өсірді.   Үшеуі де жоғары білім алған. Бала тәрбиесәне келгенде әке жауапкершілігін жақсы білетін Мұрат ағамыз Сүтен әкейдің салған ізін жалғады десек те болады. Қазақи таным, салт дәстүр ер жігіттің бойынан табылуы керек барлық қасиеттерді барынша үш ұлына сіңіре білген. Үш ұлына да текті жерден келін түсіріп шаңырағы шаттықа толған Мұрат ағамыз бен Ляззат жеңгеміз бұл күндері жеті немере сүйіп отыр. «Бала өскенше немере өлгенше» - деп қазақ бекер айтпаса керек, үш ұлдан тараған немерелерін жанындай жақсы көреді. Әр қылықтарына тамсанып, әр басқан қадамдарына мақтанып,  сүйсініп отырады. Осындай аяулы ата мен әженің арқасында немерелері де бақытты балалық кезеңдерін өткізуде.
      Жеке тоқталатын болсақ үлкен ұлдары  Данияр біраз жыл Қазақмыс корпорациясында жауапты қызмет атқарды, бүгіндері жеке кәсіпкер. Екінші ұлы Бахтияр «Қорғау-К» ЖШС басшысы, ал үшінші ұлы Дәурен мемлекеттік қызметте. Қай қайсысы болмасын өз мамандықтарының шебері. Қызыметтегі ел мен қоғам, отбасы  алдындағы жауапкершілікті абыроймен алып келеді. Тіл көзіміз тасқа.                  
      Мұрат ағамызға қайта оралсақ 1989 жылы Қарағанды қаласындағы жоғарғы милиция мектебін тәмәмдап,  1989-1992 ж.ж.  аралығында   Жезқазған қаласы ішкі істер бөлімінде жауапты қызметте болады.  Одан кейін Жезқазған облысы Күзет басқармасының басшысының орынбасары, 1995 жылдан бастап сол басқарманың бастығы қызметін атқарады.  1998-2000 ж.ж. Ішкі істер министрлігінің Күзет РММ Жезқазған аймағы бойынша басқарма бастығы. 2000 жылы халықаралық тәжірибе алмасу мақсатында Ішкі істер министрлігінің делегациясы құрамында Мысыр елінде терроризм мен экстремизмге қарсы дайындықта бір айлық курста болды. 2000-2004 жылдары Ішкі істер министрлігінің Жезқазған аймағы бойынша Күзет басқармасының бастығы болып қызмет атқарды.  
      Адал  еңбек абыройлы қызмет арқасында  2004 жылы полковник шенінде зейнеттікке шыққан ағамыз, 2005 жылдан 2017 жылға дейін Ішкі істер министрлігінің Күзет Акционерлік қоғамының Жезқазған аймағы бойынша филиал директоры болып қызметтер атқарды. 2015 жылдан бастап қоғамдық жұмыстарға да бет бұра бастады. Өскелең ұрпақ тәрбиесіне айрықша әсер етуші факторлардың бірі бабалар ерлігі болса сол жолды бүгінгі буынға насихаттау мақсатында   Қазақ хандығының 550 жылдығына арналған республикалық деңгейінде өткен Бұланты өзенінің бойында болған, Бұланты шайқасы мемориалдық комплексті ұйымдастыру жұмысына тікелей араласып, кейін "Бұланты-1727" қоғамдық бірлестігі құрылып, бүгінгі күні сол бірлестіктің төрағасының орынбасары қызметін ойдағыдай алып жүр. Қазақ тарихында Жоңғарлармен Қалмақтармен болған Бұланты шайқасы алғашқы ірі жеңіс. 
      Бұл кезінде аталмай, дұрыс зерттелмей қалған тарихи оқиға еді. Жау жүрек мың бала тарихы да осы жерде, сол жерде болғанын бүгіндегі тарих ғалымдары да мойындап отыр. Шайқас болған жерлерді зерттеу жұмыстары осы  қоғамдық бірлестіктің қолдауымен бірнеше рет жүргізілді, әлі де болса жүргізіледі.  Осы бірлестіктің ат салысуымен Қазақ хандығының 550 жылдығы аталып өтілген жылы сол жерде үлкен іс шаралар ұйымдастырылды, еліміздің түкпір түкпірінен делегациялар келді, егеменді еліміздің зиялы қауымының өкілдері де қатысты. Осы шараларға байланысты Мұрат ағамыз «Бұланты шайқасы және оның Қазақстан тарихындағы орны»   атты ғылыми тәжірибелік конференцияда Қазақ батырлары жайлы баядама жасады.   
      Сонымен қатар Мұрат ағамыз алдыңғы буын мен келер буынның сабақтастығын, өзара үндестігін дамытуды мақсат тұтқан  Жезқазған, Сәтбаев қалалары және Ұлытау өңірінің ақсақалдар кеңесінің төрағасы. Бұл қоғамдық бірлестіктің құрамында аталған өңірлердің белді белді ел ағалары, екі қаламен мен ауданның құрметті азаматтары және Қарағанды облысының құрметті азаматы бар. Қоғамдық бірлестік қала, аудан әкімдерімен тығыз байланыста, бір сөзбен айтқанда билік пен жалпы бұқара арасындағы алтын көпір болып отыр. Жергілікті газет, теледидар арқылы халықтың мұң-мұқтажын алға тартып, оның орындалуын жергілікті атқарушы органдардың алдында да, облыс әкімінің алдында да ашық қойып отырады. Өңіріміздің өсіп өркендеуіне, қазағымыздың ежелгі салт дәстүрін сақтау жолында, жастарды тәрбиелеу жұмысы бойынша, қоғамдық бірлестіктегі аға буын  мүшелері белсенділік танытып жүр. Мұрат ағамыздың бірнеше көкей кесті мақалалары жергілікті және республикалық газеттерге шыққан. Әке Асқар тау және Апыр батыр атты екі кітаптың авторы, екі рет ру шежіресін жинақтап шығаруына үлес қосқан азамат.
      Сөз басында айтқанымыздай әке тәрбиесімен егілген түйнектің жемісін бала бойындағы қасиеттерден аңғаруға болады. Сүтен әкейдің адмгершілік имандылық қасиеттерінен бөлек ер мінезділікті де бойына сіңіріп өскен Мұрат ағамыздың қысқаша өмір жолы осындай. Жүріп өткен жолдарында мемлекет тарапынан, қызмет жасаған басшлық тарапынан да түрлі мараппаттарға ие болды. Еңбегі еленді,төккен тер еш кеткен жоқ. 
      1983 жылы Қазақ ССР Ішкі істер министрінің мақтау грамотасымен басталған жетістіктер 1987 жылы Кеңес одағы Ішкі істер министрінің мақтау грамотасына ұласты.  1989 жылы Кеңес одағы Ішкі істер министрлігінің мүлтіксіз қызмет атқарғаны үшін 3- дәрежелі медалі, 1994 жылы Қазақстан республикасы Ішкі істер министрлігінің 2- дәрежелі, 2001 жылы Қазақстан республикасының 10- жылдығына арналған медалімен, 2012 жылы Қазақстан республикасы Ішкі істер министрлігінің құрмет грамотасымен, Күзет қызметіне 60-жыл төс белгісімен, 2017 жылы Ішкі істер органдарының құрметті ардагері медалімен сосын бірнеше рет Жезқазған, Сәтбаев қалаларының әкімдері, мәслихат хатшысының, облыстық ішкі істер басқармасының құрмет грамоталарымен марапатталды. Енді осы тәжірибесі мен ақыл кеңестерін жас буынның бойына сіңіруге де қажырлы қайрат берсін деп тілейік. Ұлытау өңірі қазақ тарихындағы талай қанды оқиғалармен ұлы жеңістердің куәсі.
      Осы өңірдің өсіп өркендеуіне маңдай терін аямай қызмет жасайтын Мұрат ағамыз секілді азаматтары көп бола берері сөзсіз. Келер ұрпақ мақтана алатын, кейінгі буынның жүзіне ұялмай қарау бұйырсын. Мұрат ағамызға ұзақ ғұмыр берсін. Келер буын мен аға буын арасын жалғап жүрген осындай ағалар аман болсын.