Қаймағы бұзылмаған, қазақы мекен Оңтүстіктің тумасы Рахиева Айымхан Төлегенқызы – 1947 жылы 5-ші қарашада дүниеге келді. ОҚО (бұрынғы Түлкібас ауданы) қазіргі Бәйдібек ауданы, Боралдай әкімшілігіне қарасты Сарыбұлақ ауылында кіндік қаны тамған Айымхан Рахиева бала күнінен ерекше алғыр болып өсті. Оның нұрға толы жанары түйсігінің бала да болса, терең екендігін меңзеп тұратын. Асқар тау әкесі Базарбаев Төлеген өздері мекен еткен ауылда бірнеше жыл колхоз бастығы болып қызмет атқарады. Ауданға танымал, сыйлы әрі абыройлы Төлеген Базарбаевты барша ауылдастар құрмет тұтушы еді.
      Бала күнінен Айымхан үлкен әпкесі Бибіраушан Төлегенқызы мен оның жолдасы Молыбай Оразалиевтың отбасында тәрбиеленеді. Жанұядағы үлкендердің қызмет бабымен қоныс аударуына байланысты алғаш мектеп табалдырығын өзі туылған ауылында аттаған Айымхан, одан кейін Сарыағаштағы Мұхтар Әуезов атындағы орта мектепте оқуын жалғастырады. Кішкентай ғана ақылды да, алғыр қызды мектептегі сыныптастары да, ұстаздары да бірден жақсы қабылдайды. Үнемі үздіктердің қатарында жүріп, жетістіктерге жиі жетіп жүретіндігі үшін мектеп мақтанышына айналады. Сайрам ауданы, Қарасу елді мекеніндегі «Орджанкидз» атындағы орта мектепті тәмамдап, ұлағатты ұстаздары мен ыстық ұя мектебіне қол бұлғаған жас түлек Айымхан болашаққа деген нық сеніміне қарай қанат қағып кете барады. 
      Жалындаған жас жүрегі оттай лаулап тұрған өжет мінезді Айымхан мектебін бітірген соң, үлкен қалаға келіп, Шымкент Медицина колледжіне оқуға түсуге құжат тапсырады. Алға қойған мақсатына жету үшін бәріне дайын, жауапкершілігі зор, тиянақты ару оқу оқып, ілім ізденуден ешқашан аянбайды. Айымхан Рахиева өзімен қатар құрбыларымен бірге 1965-ші жылы «фельдшер мамандығының» иегері атанып, қолына дипломын алады.
      Әрбір бойжеткеннің борышы тұрмыс құрып, бала сүю екендігін жақсы білетін жас ару жүрек қалауын кезіктіріп, Рысбек деген азаматын тауып, екеуі сөз байласып, некелерін қияды. Рысбектің  әкесі бір жасында, анасы екі жасында, қайтыс болып кеткен. Жолдасының үлкен ағасы Рахиев  Жанибектің және оның жолдасы   Шырайгүлдің қолына келін болып түседі. Содан кейін қызмет бабымен, тұрмысқа шыққаннан соң, Айымхан Омск қаласына  өз мамандығы бойынша қызметке орналасып, ұжымда сыйлы, әрі абыройлы қызметкерге айналады. Ал, жолдасы О.В.Ш. МВД-ні бітірген мамандығымен заң саласында өз мамандығы бойынша жұмыс атқарады. 
      Өзге мемлекетті мекен етіп, қызмет атқарған жас отау 1973-ші жылы ОҚО, Ордабасы ауданы, Темірлан елді мекеніне қоныс аударады. Жастайынан еңбектің дәмін татып үйренген Айымхан қандай қызмет болса да, ұршықша үйіріп әкететін. Осы күнге дейін өзгеге алақан жайып, көмек сұрауды білмеген, ешқашан еңбектен қашқан  емес.      «Тағдырдан қашса да құтыла алмайды»,- демекші Айымхан тағдырдың тартуы солай болып, арқа сүйер азаматынан ерте айырылады. Ол кезде балаларының үлкені әскерден жаңа келген, ал кенжесі – небәрі 2 жаста болатын. Шиеттей он баламен жалғыз қалған Айымхан Рахиева белін бекем буып, өзі еркек, өзі әйел болып әрекет етуден басқа амалы қалмағанын түсінеді. Өмірдің өзіне қарсы аққан ағысына төтеп беріп, қайсар мінезін одан сайын қайрай түседі. Осы күнге дейін басынан өткен қиындықтары адам айтса нанғысыз, бірақ Айымхан сонда да еш мойымай, балаларының алдында көз жасын көрсетпей, ерекше ерлік көрсетіп, әр баласын аяққа тұрғызып, ешкімнен кем қылмай өсіруі үшін аянбай еңбек етіп келе жатқан абзал ана!
      Бас-аяғы 30 жылдай медицина саласында қызмет жасап келген Айымхан Рахиева – 1995-ші жылы бала санымен зейнеткерлікке шығады. Басынан түрлі қиындықты жалғыз  өткеріп келе жатқан Айымхан, зейнеткерлікке шыққан соң, ойланбастан жеке кәсіпкерлікті бастап кетеді. Кәсіп бастау екінің бірінің қолынан келе бермейтін іс қой, Алғашқы жылдары ауыл тұрғындарына біраз қарызданып, өнімнен құтыламын деп, 30 - га суармалы жерді жалға алып, мақта егеді. Табысқа мол кенеліп, пайда тауып қарық болмаса да, Айымхан өзінің табандылығымен кәсібін тоқтатпай, ары қарай жалғастыра береді. Мақта, бидай, қарбыз, қияр егіп, өнімін сатып, әйтеуір әупірімдеп, тиынды-тиынға құрап, жыл өткен сайын алға жылжи бастайды.
      Айымханға мектеп оқып жүргенде қосымша «механизаторлық» мамандығын оқып алғандығының осы кезде пайдасы тиеді. Ешқандай әйел баласы машина айдамаған кезде, Айымхан өзі машина айдап, техникаларды өзі меңгеріп, бәрінің тілін түсіне біледі. Күндіз-түні ұйқы көрмей, демалмастан тек алға жылжуды ойлайтын Айымханның бар мақсаты балаларының ешкімнен кем болмауы еді. Даланың жұмысын далада шаруашылықпен айналысқан адам жақсы біледі ғой. Аптаптағы ыстығы, үскіріктегі суығы, жан шыдатпайтын егістіктің ауыр бейнеті Айымханның денсаулығына кері әсерін берген еді. Бірақ, сонда да төсек тартып жатып қалмай, бар күшін бойына жиған Айымхан
жеңілдеу жұмыс көзін іздестіре бастайды. Ең алдымен кішкене дүңгіршектен бастап, одан кейін аукционға қатысып, жер сатып алады. Соның нәтижесінде «Ай» сауда орталығын, «Ай» тойханасын, «Ай» моншасын ашып, бүгінгі таңда көптеген тұрғынды жұмыспен қамтамасыз етіп, әрі халыққа қызмет көрсетіп отырған жайы бар.
      Айымхан Рахиева қазіргі кезде суармалы егістікпен, жылыжай шаруашылығымен және кішігірім «шлакоблок» цехын ашып, кәсібін дөңгелетіп жүр. Біреуден кейін, біреуден ілгері демекші, қазіргі жағдайы жаман емес. Тірнектеп еткен еңбегін еш кетірмей, балаларының барлығын жоғары оқу орнына түсіріп, әрқайсысына бір мамандық алып берді. Бірі-бірінен өткен білімді, әрі еңбекқор да тәрбиелі. Жастайынан еңбекке баулып, үлкенге құрмет, кішіге ізет көрсетуге, ешкімнің ала жібін аттамай, адал болуға үйреткен Айымханның балалары әрқайсысы өз ортасында сыйлы, әрі өнегелі. Шаруаға икемді, тату, әрі бауырмал. Біріне –бірі қамқорлық жасап, анасының жанына жалау болып, көмектесуге тырысады.Осының бәрі Айымханның ерекше тектілігінің, еңбекқорлығының, адалдығының нәтижесі болса керек. Қазіргі таңда ауыл тұрғындары «үлгілі отбасы, іскер апамыз»- деп, Айымхан Рахиеваның еңбегін бағалап, ескеріп отырады. «Ай апа» атанып кеткен Айымханды айналасының барлығы құрмет тұтып, өзгелерге үлгі етіп отырады.       Біршама белестерді бағындырып, өзінің табандылығының арқасында біраз жетістікке жетіп келген Айымхан Рахиева бүгінгі таңда да қоғамдық істерден қол үзген жоқ. Ауыз толтырып айтарлық атқарып жатқан істері өте көп. Айта кетер болсақ:
      Аудандық ата- аналар кеңесінің төрайымы;
      Аудандық аналар және Ассамблея кеңесінің мүшесі;
      Аудандық қамқоршылық кеңестің төрайымы;
      Аудандық ардагерлер, әжелер алқасының мүшесі;
      Аудандық мәдениет үйіндегі әжелер ансамбілінің мүшесі;
      Аудандық кәсіпкерлер палатасында іскер әйелдер кеңесінің төрайымы.
      Айымхан Рахиеваның бүгінге дейінгі атқарған істерінің еленбей қалған тұсы жоқ. Солардың бір шамасын айта кетер болсақ:
      Ауданда 2015-ші жылдың «Үзді кәсіпкері» атағын алды;
      Бірнеше рет «Мақтау Грамота», «Диплом», «Алғыс  Хаттармен» және «Социалистік жарыстың жеңімпазы» деген медальмен де марапатталды;
      «Алтын алқа» иегері;
      Әлемдік деңгейдегі, халықаралық «Алтын қыран» медалінің иегері;
      «Ауданға сіңірген еңбегі үшін» медалімен марапатталды;
      «Ордабасы ауданының құрметті азаматы» медалімен марапатталды;
      «Халық құрметі» медалімен марапатталды.
      Шариғат кітаптарында: «Бас бостандығы бар, балиғат жасына жеткен, ақыл-есі дұрыс, дені-басы сау адамға қажылыққа бару парыз»,- делінгенін жақсы білетін Айымхан Рахиева 2016-шы жылы Мекке-Мәдинаға сапар шегіп, кіші және үлкен Қажылықтан өтіп, бес парыздың бірін атқарып келеді. Қазіргі кезде «Ай Қажы апа» атанып, еліне сыйлы, абыройлы азаматшаға айналып отырған  жайы бар.
      Балаларын бір-бірінен алаламай, бәріне бірдей көңіл бөліп, болашағының жарқын болуы үшін бар өмірін арнаған абзал ана бүгінде сол балапандарының жемісін көріп отыр. Қырықтан аса немере мен шөбере сүйіп отырған Айымхан апай шөпшектің алақанынан май жалауды армандап отыр. Әр перзентінің амандығын тілеп, үлкен шаңырақтың тұтқасын ұстап отырған, бір қолымен бесік, бір қолымен әлем тербетіп отыратын Айымхан Рахиева сынды аналарымыз аман тұрғанда ұрпақтың әлсіремесіне, болашақтың бұлдырамасына кәміл сенеміз!