Билік қызметіне келуге әр адамның қақысы бар, десек те оның сол орынға лайықты дайындығы мен білімі, біліктілігі, қарым-қабілеті, мінез-құлқы, адалдығы мен әділдігі, тазалығы секілді толып жатқан талаптарға сай боларлық мүмкіндіктері болуы шарт. Нағыз адамға тән асыл қасиет: турашылдық пен уәдеге деген беріктік, жауапкершілік пен адалдық деп баға берген болар едім. Себебі, бұл мінез әрбір адамның ел алдындағы беделін өсіріп, қадірін арттырады, арман биігіне жетелейді. Әңгіме кейіпкері болып отырған Жорабек Ибрагимұлының бойында осындай асыл қасиеттер тұнып тұр. Ол өз саласында абыройлы қызмет етіп, биік белестерді бағындырып келе жатқан азамат.       Еңбек жолын 1974 жылдан бастаған Нұрымбетов Жорабек Ибрагимұлы Жұлдыз кеңшарында көмекші шопан, 1975 жылдан 1980 жылдар аралығында Қазақ политехникалық институтын бітірген. Білімді де білікті маман 1980 жылдан 1984 жылдар аралығында инженер, аға инженер Қызылорда облысының «Мелиорация және су шаруашылығы басқармасында» жемісті еңбек етті. Ал 1984 -1996 жылдары облыстық ауыл шаруашылығын ауыз сумен қамтамасыз ететін басқармасында өндіріс жөніндегі орынбасары, бас инженер қызметін 1996 жылдан Сырдария аудандық су шаруашылығы, Қызылорда су шаруашылығы басқармасының директоры қызметтерін абыроймен атқарған азамат. Жорабек Ибрагимұлы елден ерек бітім-болмысымен, мемлекеттік қызмет пен қоғамдық жұмысты жылдар бойы қатар алып жүрді. Оның еңбек жолы жастарға өнеге боларлықтай. Оның еңбекқорлығы, қандай шаруаны қолына алмасын тыңғылықты атқаратын ұйымдастырушылық қабілеті, халыққа жақындығы, жаны мен қолының тазалығы, өзіне де, қарамағындағыларға да талапшылдығын үнемі үлгі етіп келе жатқан нағыз сегіз қырлы бір сырлы жан. Сұлу сырдың табиғаты секілді оның да тұла бойы тұнған сыр, мінезі де жайма шуақ. Парасатты, көрген-білгені көп, бастысы саяси сауатты, жаңалыққа жатырқамайтын өзіндік ой-пікірі бар тұлға. Иә, осындай қарапайым ауыл баласының елге танымал қайраткер дәрежесіне жетуі қайсарлығы мен табандылығының, тура жолдан ауытқымауының арқасы екені даусыз. Ал енді осындай қасиеттер оның бойына әкесінің қанымен, анасының ақ сүтімен дарығаны шындық. Рас, тәлім-тәрбие әкенің өнегесімен, ананың ақ сүтімен беріледі. Ата-анасы қарапайым ауыл жұмыскерлері болса да, ауыл-аймағына сыйлы, ағайын-туысына қадірлі, балаларына үлгілі тәрбие бере білген жандар еді. Ардан аттамай, шындықтың жүзіне тіке қараған шыншыл азаматтың ұрпағы Жорабек Ибрагимұлы өзі ес білгелі ешкімге қасақана соқтықпаған жан. Түзу жолмен жүріп, өз ұрпағына да ата-бабасының қасиетті тәрбиесін сіңіре білген азамат. Ол әрқашан өз алдына айқын мақсат қойып, соған жеткенше тыным таппайтын, еңбекқор, өз-өзіне талап қоятын адам болып қалыптасты. Бойындағы жақсы қасиеттері кейін қай қызметте болған кезінде алдынан шықты. Бала күнінде жақсы қызметте болуды армандаған ол мектепте де көшбасшы бола білді. Оқуын үздік аяқтап, жоғары оқу орнын озат тәмамдап, елге пайдалы болатын іспен айналысты.
      Жорабек Ибрагимұлы су шаруашылығы маманы ретінде қала төңірегіндегі егін шаруашылығына аяқ су жеткізіп берудің жаңа тәсілдерін, суды үнемді пайдаланудың жолдарын, қала ішіндегі аяқ су жүретін ішкі су жүйелерінің бүгінгі талапқа сәйкес салынуына жұмыс жасап, ықпал етіп келеді. Сондай-ақ, қала ішінде Қызылжарма жер асты суын пайдалану мақсатында қазылып жатқан түтікті құдықтар мен салынып жатқан су жолдарының сапалы және өз дәрежесінде жұмыс атқаруына маман ретінде бақылау жасай білді. Қала бойынша таза Қызылжарма жер асты суын пайдаланып отырған халықтың 40-50 пайызы болса, соны 95 -96 пайызға жеткізу жөніндегі ой-пікірін әркез билікке ұсыныс ретінде жеткізіп отырды және бұл ойы да бүгінгі күні іске асырылды.
      Ол қызмет таңдаған адам емес, керісінше, қызмет оны іздеп тапты. Қандай қызметке барса да жоғарыдағы басшылардың ұйғарымымен болып жататын. Атаққұмарлықтан, мансапқұмарлықтан бойын ада ұстады. Есесіне елінің қалаулысы болды. 2007-2011 жылдары №18 Наурыз сайлау округі, 2012 жылдан №6 Мұнайшы сайлау округтері бойынша Қызылорда қалалық мәслихатының депутаты және 2016 жылдан бастап №23 Тасбөгет сайлау округінен облыстық мәслихат депутаты, 2021 жылы қалалық мәслихат депутаты болып сайланды. Депутат ретінде сайланған округтегі облыс және қала әкімдігімен бірлесе отырып, әлеуметтік мәселелерді шешуде тиянақты жұмыстар жасауда тұрғындармен үнемі кездесулер ұйымдастырып, көптеген мәселелердің оң шешімін табуына ықпал етті. Ұзақ жылдар бойы халықпен қоян-қолтық қызмет атқарғанын, еңбекқорлығын ғана емес, бойындағы көп жақсы қасиеттерін де ел-халқы әрдайым бағалап келеді. Халқымызда: «Жақсыға талас көп»,- деген әдемі сөз бар емес пе?! Өзін істе танытқан, қайда қиын болса, сонда жұмсалып, сенімді ақтаған Жорабек Ибрагимұлына қандай марапат берсе де құп жарасады. Дәйекті дәлелі өзі сайланған Тасбөгет кентіне 40-50 жылдың көлемінде негізгі көшелерге күрделі жөндеу жүргізілмегенін билікке жеткізе отырып, облыстық бюджеттен 987 млн қаржы бөлінуіне ықпал етіп, 16 (он алты) көшені бүгінгі талапқа сай салынғаны. Одан бөлек облыстық бюджеттен сметалық жобасына 25 млн қаржы бөлдіріп республикалық бюджеттен жабық спорт комплексін салдыруға ықпал етуі. Өзі қызмет атқарған жылдарда елдің жоғары бағасын алған тірліктер тындырды. Осы үшін оған берілген төсбелгілердің санында шек жоқ десек те болады. Ол Қазақстан Республикасының «Ерен еңбегі» төсбелгісін, «Қазақстан Республикасының Тәуелсіздігінің 10,20,25 жылдығына» байланысты мерекелік төсбелгілерін омырауына таққан. Елбасының «Алғыс Хатымен», республикалық «Нұр Отан» партиясының «Алғыс Хатымен», Қазақстан Республикасының «Құрметті депутаты», «Нұр-Отан партиясының үздігі» төсбелгілерімен марапатталған. Сонымен қатар, ол Қызылорда қаласының «Құрметті азаматы». 
      Иә, Жорабек Ибрагимұлы қандай қызмет атқарса да ол адамгершілік жолынан еш тайған жоқ. Әр жылдардағы мінсіз әрі жемісті еңбегі ескерусіз қалған емес. Оның мағыналы өткен бір күні мен сағаты жылдан қымбат. Осыдан да болар, ол сан алуан шаралардың қалың ортасында жүреді. Елдің сенімін ақтап, атқарған жақсы істерімен де кеңінен танымал азамат жомарт жүректі, қолы ашық, қайырымды азамат. Қолынан келсе қайсыбір жанды болмасын демеп жіберуге бар. Табандылығымен іске асқан игілікті де сауапты шаруаның ұйымдастырушысы, демеушісі ретінде де ел арасында беделі биік. Өзін былай қойғанда басқаның қамын көбірек ойлайтын ол уақытты қадірлей біледі. Қарбалас жұмыс күнінен кейін рахаттанып демалу үшін ел сияқты теледидардағы қызықтарды қарамайды, оның бала кезден бергі адал серігі еңбек пен кітап. Таза ауада бой сергітіп, сонан соң кітап оқып, ұйқыға кетеді. Ара-тұра өз бөлмесінде сағаттап отырып, күнделік жазатыны бар. Ел адамы болғаннан кейін елдегі оны-мұны есте қалған сәттерді жазып отыратын әдепкі әдеті. Өзіне аға тұтқан талай зиялылармен араласа жүріп, олардың ақыл-кеңестерін, өмірлік тәжірибелерінен молынан бойына сіңірді. Сол қасиеттерді өзінен кейінгі жас мамандарға да үйретуден жалыққан емес. Көш бастай жүріп, талай түйінді мәселелердің шешілуіне мұрындық бола білді. Күні бүгінге дейін облыстың, оның ішінде су шаруашылығының өсіп-өркендеуіне түбегейлі үлесін қосып келеді. 2011 жылы су шаруашылығы маманы ретінде «Қазақстандағы су шаруашылығы объектілерін жаңа тәсілдермен жобалау жөнінде» республикалық семинар өткізуді іске асырды. 2016 жылы Байқадам гидроузелінде автоматтық жүйесі бойынша су шығынын есепке алып отыру енгізілді. Облыстың экологиялық жағдайын жақсартуда үнемі тұжырымды ой-пікір жеткізіп, оның іске асуына атсалысып келеді. Көктем, қыс кезінде Қызылорда қаласының тұсынан Сырдария өзені арқылы өтетін мол суды төтенше жағдайсыз өткізуде өзінің білікті, білімді маман екенін үнемі көрсетіп келеді. Соның бір көрінісі биылғы жылы елімізге келген пандемияға байланысты республикалық бюджеттегі қаржылар қысқартылған болатын, соның ішінде Қызылорда облысының экологиялық жағдайын жақсарту мақсатында бөлінетін суды жеткізіп беру қаржысы қысқартылатын болды. Осы мәселені дәйекті дәлелдермен Президентіміз Қасым-Жомарт Тоқаевқа ел ағалары арқылы жеткізіп, жоғарыдағы бөлінетін қаржының сақталып қалуын қамтамасыз етті. Осындай түйінді мәселелердің қала, облыс көлемінде оң шешімін табуда ой-пікірін жеткізе білетін азамат ретінде ел, халық жақсы біледі. 
      Елге пайдалы, жастарға ұқтырар өнегесі мол игі істердің басы-қасында жүрген азаматтың пайдасыз нәрсеге ысырап етер уақыты жоқ. Оны жақындары да, сыйлас достары да, әріптестері мен жерлестері жақсы біледі. Қайраткер азаматтың ғұмыр жасы ұзақ, денсаулығы мықты, отбасы аман, қызық-қуаныштары әрдайым мол болуын Алла нәсіп еткей. Алда да абырой биігінен көріне бер, қадірлі азамат!