Көңіл шуағына мейірім төгілген аяулы жанның өмірден алар несібе жемісі – алтын босағасы мен сүйкімді перзенті. Адамзат жүріп өткен небір ауыр жол, алмағайып заманнан ұрпағын аман-есен бүгінгі күнге жеткізген әйел-ана құдіретін жырмен өрнектеп, әнмен әлпештеп, сөзбен айтып тауысу мүмкін емес. Ана – болашақтың демеушісі, ұлттың жебеушісі, сәбилердің бақыты. Ана – барлық қиындықты жеңетін сарқылмайтын күш, тіршіліктің қайнар бұлағы. Осынау ақиқаттың дәлелі ретінде қазіргі заманда әйелдер қауымы қоғам мен мемлекет ісіне келгенде ер азаматтардан кем белсенділік танытып отырған жоқ. Осындай қайсар да еңбекқор жандардың бірі әлемдік сұлулық сайыстарына қатысып, топ жарып жүрген сұлу әйел,«Алмаз» қайырымдылық қорының басшысы, «Атамекен» Қазақстан Республикасы Ұлттық кәсіпкерлер палатасының «Іскер әйелдер» кеңесінің мүшесі – Едилова Динара Ерсаиновна. 
       Ол – халыққа батырлығымен танылған Батыс өңірінің тумасы. Кешегі тарих толқынында, Сыр бойында өмір сүрген, Алты алашқа аты мәлім, аузы дуалы ел ағасы, сөз зергері – Жақайым Жетес бидің қанынан тараған асыл текті ұрпақ...
       Еліміздің әрбір өңірі өзіне ғана тән ерекшеліктерімен айшықтанып тұрады ғой. Сәйкесінше, Динара өскен Ақтөбе өңірі – ежелден бір өңір ғана емес, бір ұлттың да тақиясына тар келмейтін талантты ұл-қыздарды сыйлаған аймақ. Мұнда елін жаудан қорғап, қасық қаны қалғанша шайқасқан батырлар, сөз жауһарын терген ақын-жыраулар, ел бірлігін сақтауға атсалысқан билер шоғырланғандығымен көзге түседі. Олар – қазақ тарихының шаңырағына бір-бір уық болып қадалып, оның көкжиегін кеңейтіп, топырағын құнарландырған жандар. 
       Кейіпкеріміздің асқартаудай әкесі мен аяулы анасы білім қуған жас күнінен отбасылық өмірге қадам басып, қым-қуыт тіршіліктің сара жолын ерте аттады. Яғни, жанұялы жастар оқып жүріп, отбасын асырау үшін жұмыс та жасады. Сондықтан, Динара сәби күнінен Темір ауданындағы нағашы әжесінің қолында өсті. Зерек те, зейінді қыз 4 жасына дейін асыл қамқоршысының тәлімді тәрбиесін, өнегесін бойына сіңіріп, балғын қанаттарын қатайтты. 
       Ең алғаш Ақтөбе қаласындағы №30 орта мектеп табалдырығын аттаған Динара білімге құштарлығымен, жаңашылдықты бойына қабылдауға әзірлігімен, мектептің қоғамдық өміріндегі жұмыстарға белсенді араласуымен ұстаздар қауымының көңілінен шығып, зерделі зеректігі мен алғырлығын көрсете білді. Алғырлығымен, тиянақтылығымен көзге түскен оқушы қыз мектептің қоғамдық жұмыстарына да белсене араласып, онда өткізілетін әрбір іс-шараның басы-қасынан табылатын.Ата-анасының үлгілі тәрбиесін бойына сіңіріп, болашақта еліне қызмет етуді көздей жүріп, білім-ғылымға жол ашқан, алдыңғы өміріне бағыт-бағдарды анықтап берген сүйікті мектебі мен ұстаздарына деген шексіз алғыспен орта мектепті жоғары деңгейде бітіріп шықты. Еңбекқор әрі сәнқой бикеш Динараның тағы бір әуестене айналысатын ісі – сұлулық байқауларына қатысу болатын. 2003 жылы Алматы қаласында өткен «Wella» компаниясы ұйымдастырған байқауда сән үлгісін көрсетуші ретінде қатысып, ең үздіктер қатарынан көрінген. Осы байқаудан кейін бір басылымның бейнесі болуға Германиядан ұсыныс түседі. Бірақ, адамның дегені бола бермейтіні бесенеден белгілі. Тағдырдың жазуымен асқар тау әкесі өмірден өткесін жоспарларынан ауытқуға тура келеді. 
       Басына түскен қиындықты қайыспай көтере білген қайсар қыз білімін жоғарылатуға ұмтылады. Мақсатына жету жолдарындағы қадамдарды бұрыннан-ақ он ойланып, жүз толғанып нақты шешімін шығарып қойғандықтан, мамандық таңдау қиындық тудыра қоймады. Ардақты да жауапкершілігі зор ауыр мамандықты жаны қалаған, оқушылық кезеңінде жинаған білім қорына сүйенген жасөспірім болашағын құқықтану саласымен байланыстыруды мақсат тұтып, заңгерлік мамандыққа түседі. 
       Оқу-білімге ынталы, әрбір ісіне мұқият, алғырлығы жағынан қатарластарынан оза шапқанға дағдыланған балауса Динараға жоғары білім бағдарламасын меңгеру қиынға соға қоймады. Мақсаты айқын, оған жететін қадамдары нық жас әрбір күннен, әрбір ұстаздан болашақ кәсібіне қажетті тәжірибені бойына жинай берді. Бастаған ісін аяқсыз қалдырған кезі де болмапты. Осылай өзінің жан-жақтылығын байқата отырып, жоғары білім ордасын жақсы аяқтап шықты.
       Қыз баланың осы өмірдегі басты мақсаты – ошағының түтінін түтетіп, асыл жар, аяулы ана атану екендігі мәлім. Өмірдің жазылмаған заңына бағынып, арқа сүйер азаматы Мирланды кезіктірген жас қыз 2006 жылы 2-курста оқып жүрген кезінде тұрмысқа шығады. Кездесулері де бір қызық болған еді. Бойында бірнеше өнер тұнып жатқан қыз жасөспірім шағында журналистікпен айналысып, табыс табатын. Суретін газет бетінен көрген болашақ жұбайы дәмханадан Динараның өзін көргенде өз көзіне өзі сенбей, достарынан қыздың телефон нөмерін алып, төрт айдай тек телефонмен араласқан екен. Қазіргі таңда Арсен, Дәулет, Дулат атты алтын асықтай үш ұл мен Медина есімді қылықты қыздың ардақты ата-анасы.2009 жылы оқуын аяқтағаннан кейін әңгімелесу мен тестілеуден өтіп, алғашқы еңбек жолын Әйтеке би аудандық сотында сот орындаушы қызметінен бастайды. Бойындағы жастық жігерімен сүйікті ісіне құлшына кіріскен жас маман ұжымға тез үйренісіп, қызметінің қыр-сырына бойлай еніп кетеді. Жастайынан бойына жиған жауаптылығы, тындырымдылығы, әрбір ұсақ-түйекке де мән беретін мұқияттылығы Динараны әрқашан ерекшелеп тұратын еді. Бұл қызметті 4 жыл абыроймен атқарады.        Ана – әрбір адамның өміріндегі ең жақыны, жанашыры және қамқоршысы. Ана болу – бүкіл өміріңе жететін ұлы рухани тылсым күш және ерен еңбек. Өз баласын бағып - қағуда ана өзін-өзі ұмытып, барлық күш-жігерін сарқа жұмсайды. Кейіпкеріміздің балаларына деген мейірімі арқылы балаларының қызығушылықтары оянып, жүректері мейірленген еді... Тұрмысқа шығып, ана атанған соң сұлулық шыңын бағындыру арманымен қош айтысқан аяулы жан 
       Динара көңіл түкпірінде аялаған балалық мақсатын қайтадан орындау мүмкіндігі туындарын ойлаған да емес еді. Мінекей, содан бері аяулы жар, ибалы келін, адал дос бола білген көпбалалы ана отбасылық өмір жолында да толағай табыстарға қол жеткізді. 
       2016 жылы Ақтөбе қаласында тұрмыстағы аруларға арналған «Миссис Ақтөбе» байқауы жайлы жарияланады. Асыл азаматы жан жарының армандарын білетіндіктен, қатысып көруге ұсыныс тастағанда, жар таңдаудан қателеспегеніне қатты қуанған Динара бірден байқауға қатысуға шешім қабылдайды. Бағы жанып, сүйкімді ару байқаудың «Миссис Фотомодель» номинациясын иемденеді. Бұл жылдың қуанышты жетістіктері мұнымен бітпестен, «Асыл ана» жобасында «Мама Social» номинациясының жүлдегері атанады. 
       Осы жағымды жетістіктермен шабыттанған аяулы ана сұлулық байқауларына қайтадан қатыса бастайды. Бұл ісін жалғастыруына жақын жандарының қолдауы мен құрбыларының көмегі қатты әсер етеді. Сол достарының бірі – танымал дизайнер әрі модельер Дана Наби Динараның сұлулығы мен білімі елімізді халықаралық сұлулық байқауында танытуға қабілетті деп санағандықтан, «Миссис World Wide-2017» байқауын ұйымдастырушыларға суреттерін жібереді. Жиырма үміткердің ішінен Динараны таңдап алғанын естігенде, күтпеген жағымды жаңалыққа бәрі таң қалады. Сұлу ананың жалғыз шарты – суға түсуге арналған киіммен шығудан бас тартады.                      Ұйымдастырушылар бұл шартына келіскен соң, байқауға дайындықты бастап кетеді. Ең алдымен, спорттық жаттығуларға дұрыс тамақтануды қосу арқылы бес келі артық салмақтан арылады. Құрбысы Дана Наби байқауда киіп шығатын киімдерінің бәрін өзі тігіп шығады. Барлық дайындықтан соң, Сингапур мемлекетінде өткен тұрмыстағы арулардың байқауына аттанады. 
       Ең сұлу ханым атағына әлемнің 27 елінен келген арулар таласады. Бірінші күннен-ақ Динара сұлу ең мықтылардың қатарынан табылып, халықтың көзайымына айналады. Әрине, сахна төрінде жарқырап шығудың артында қаншама еңбек жатқаны, қандай қиындықтар болатыны тек арулардың өзіне мәлім екені белгілі. Барлық қиындықтардан еңсесін тік ұстап шыға білген Динара Ерсаиновна Сингапур аспаны астында қазақ әнін әуелетіп, өнерден құралақан еместігін байқатып, жергілікті жұрттың ықыласына бөленеді. Байқау нәтижесінде «Ең үздік ұлттық киім» санатында номинант атанып, «Ұлт бейнесі» («Лицо нации») тәжін жеңіп алды. 
       Ақтық сайыстан соң бірінші орын жүлдегерінің өзі Динараға келіп, оның бәріне ұнағанын, осымен тоқталмай, алға жылжи беруі керектігін айтып, жігер береді. 
       Ақылына көркі сай арудың тағы бір қыры – қайырымдылық жасауды игі іске балап, мұқтаж жандарға үнемі көмек қолын созудан жалықпайтындығы. Соның дәлелі ретінде бірнеше жыл бұрын өзі ашып, қазіргі таңда қызметін сәтті жүргізіп келе жатқан «Алмаз» қайырымдылық қорын айтуға болады. Қор денсаулығында ауытқуы бар балаларға қайырымдылық жасап келеді. Осыдан-ақ оның алтын жүректі, бірсөзді әйел екендігін көре аламыз. Ол – ер адамдардай тік мінезді, бірақ өне бойы шынайы, нағыз қайырымдылыққа толы жан. Оның мұқтаж адамдарға жасаған жақсылығының жарқын бейнесін жадымызда сақтау арқылы кейіпкерімізді оқырмандарымызға үлгі тұта аламыз. 
       Олай болса, шаңырағын шаттыққа бөлеген ұлықты үш ұл мен қылықты қызының аяулы анасы, отағасы мен отбасының қолдаушысы, өз ісіне ерекше ықыласпен қарайтын іскер жанның ел мен қоғам алдындағы абыройының арта беруіне тілектеспіз.