Қай кезеңде де ұрпағына қайырымдылық жасап, мейірімділік таныту – қазақ халқының қанына сіңген қасиет. Әсілінде, әлем жүгін әдемілік емес, ар мен ұят, ілтипаттылық пен ізгілік арқалап тұрса керек-ті. Түн ұйқысын төрт бөлген, білегі талып бесік тербеткен анаң да ақ сүті үшін ақы сұраған емес. Сұрамайды да. Сол қасиет сүтпен бірге сүйекке сіңіп, мейірімділік мерейімізді үстем етті. Қайырымдылық жасау үшін асып-тасып бай болудың қажеті шамалы, ең бастысы мейірімді жүрегің мен таза ниетің болса жеткілікті. Кез-келген қиын жағдайда адам баласы әр түрлі бағытта көмек қолын соза алады. Біреулер жаны жабырқау жүргендерді жұбата отырып, күлкі сыйлауы мүмкін, ал біреулер қиын сәтте қол ұшын беріп, көмек жасайды. «Қайырымдылық жасасаң, қайырын көрерсің» дегендей, қайырлы істің ұршығын иірген жерлестеріміз нағыз адамгершіліктің үлгісін көрсете білді. Халқымыздың қанына сіңген игі қасиетіміздің сауабы мол болғай.
       «Жақсының жақсылдығын, айт, нұры тасысын...»,- деген аталарымыз, тәлімі мен тәрбиесін бір сөздің астарына сыйдырып кеткен. Бүгінгі біздің кейіпкеріміз де жүрек кілемі мейірімділік және махаббат жібімен тоқылған, атқарар ісі мен сөзінен ерекше жылулық сезіліп тұратын, «Айналайын баладан» қоғамдық қорының төрайымы Мусина Эльмира Гарифоллаевна туралы болмақ.
       Көзі күндей күлімдеп, баламенен жүрек дүрсілі бір соққан Эльмира Гарифоллаевна 1980 жылғы 24 тамызда Атырау облысы, Мақат ауданы, Доссор кентінде дүниеге келді. Батыстағы Еділден шығыстағы Алтай тауларына дейінгі ұлан ғайыр атырапты алып жатқан Қазақстанның мәңгілік ел болып қалыптасу жолында өзіндік орны бар құтты мекен, берекелі өңірде дүниеге келіп, тарихта таңбасы қалған ұлылардың кіндік қаны тамған топыраққа табаны тиген Эльмира бала кезінен үлкендердің алғысын алып өсті. Үйдің берік болуы алғашқы кірпішінен болатыны секілді, әр жеткіншектің ертеңгі күні үлкен адамзат болып қалыптасуы, бала кездегі отбасынан алған тәрбиесінен. Бұл жағынан келгенде Эльмираның жолы болды десек те болады. Ел ішінде айтары бар, жиын тойларда төрден орын алатын әкесі Гарифолла әділдік пен адалдықты, кісінің ала жібін аттамауды үйренсе, айдың нұры, күннің шуағы жүзінен орын алған анасы Дәметкен қазақ қызына тән ибалықты, инабаттылық пен мейірімділікті бойына сіңіріп өсті.1997 жылы №4 орта мектебін тәмамдаған соң, алға жетелеген арманның соңына еріп, Атырау мұнай және газ институтына оқуға түсіп, 2004 жылы «Инженер программист» мамандығын игеріп шықты. Таным қауашағымызды бір сілкіп алып, тарихқа көз жүгіртсек, заманына қарай қай дәуірде де мамандықтар пайда болып отырған. Асты да үсті де бай қазақ жерінде су бұрқақтай атқылаған мұнай, жаңа ғасырдың табалдырық аттауымен жаңа мамандықтарды алып келді. Міне, осындай болашағы бар Эльмира Гарифоллаевна игерген мамандықтардың бірі – «Инженер-программист» мамандығы еді. Жоғарғы оқу орнын бітірген жылдары елдің еңсесін басып, тұрмыстың құр сүлдері қалған тоқырау жылдарымен тұспа-тұс келсе де, қолына алған істі шыр айналдырып алып кететін ептілігі мен өзіне тапсырылған істі соңына дейін жеткізетін жауапкершілігінің арқасында Эльмира да еңбекке ерте араласты. Еңбексүйгіш, әрдайым ізденіс үстінде болып, білмегенін тануға ұмтылатын жалынды жастың алғашқы еңбек жолы 2001 жылы «Доссормұнайгаз» басқармасына қарасты «Қарашаңырақ» мейрамханасында басталды. Жұмыс күрделілігі мен қиыншылығынан қорықпайтын өжет, бастаған ісін аяқсыз қалдырмайтын қайсар қыз осы мейрамханада 2010 жылға дейін еңбек етіп, «Қарашаңырақ» мейрамханасының жабылуына байланысты, 2010 - 2013 жылдары әр түрлі қоғамдық жұмыстар жасады. 
       «Талаптыға тау да аласа» деген, алдына мақсат қойып, сол мақсатына жетпейінше тыным таппайтын Эльмира Гарифоллаевна 2012-2014 жылы Атырау мемлекеттік педагогикалық университетінде «мектепке дейін оқыту және тәрбиелеу» мамандығын оқып алып, 2014 жылы А. Құнанбаев атындағы орта мектепке тәрбиеші болып орналасты. Міне, осы уақыттан бастап кейіпкеріміздің өмірі күрт өзгеріп, періште көңілді балалармен жұмыс істеу оған қуат беріп, өмірге ынтықтыра түсті. Балалармен жұмыс жасау – үлкен бақыт. Себебі, бала ешнәрсеге алаңдамай мейірімділікке сенеді. Пәк көңілді балалармен қарым-қатынас тәрбиешіге қуаныш, шаттық сыйлайды. Тәрбиеші балаға деген ыстық ықыласын бір сөзбен айтып көрсетіп қана қоймай, бар жүрегімен және жан - тәнімен сезіне білуі қажет. Тәрбиешінің жұмысы күрделі де қызықты. Француз ағартушысы, жазушы Жан-Жак Руссо: «Бала туғанда ақ қағаздай болып таза туады, оның үстіне шыймайды қалай салсаң, қағаз бетіне солай түседі, бала тәрбиесі сол сияқты, өзің қалай тәрбиелесең ол солай тәрбиеленеді», - деген. Әр үйдің еркелерін бір арнаға тоғыстырып, олармен жұмыс жасау оңайға соқпайды. Алайда баланың тілін тауып, тілдесу, жақсы тәрбие берудің өзі бір үлкен ғанибет. Ақ парақ бетіне сызу сызғандай баланың кіршіксіз санасына алғашқы адамгершілік, мейірімділік нұрын сеуіп, білім, өнер нәрімен сусындату мына біздің, тәрбиешілердің еншісінде. Өйткені, бала – кіршіксіз пәк, тап-таза мөлдір бұлақтың бастауы, көзін ашып тұнығына қону үшін қаншама қиын да, қызықты еңбек пен тер төгу керек. Балаларды ана тілінде әдемі сөйлету олардың ой-сезімдерін, оның еркін көркем жеткізе алуға баулу, танымдық қабілеттерін тәрбиеші мақсаттарының бірі. Эльмира Гарифоллаевна да көңілін кір шалмаған періште сәбилермен жұмыс жасай жүріп, олардың бойында бұғып жатқан талант бұлағының көзін аша білді. Мектеп қабырғасында оқып жүрген кезінде-ақ қоғамдық жұмыстарға белсене араласып өскен Эльмира Гарифоллаевна есейіп жұмыс істеген соң да бұл қабілетін жоғалтқан жоқ, қандай қызметте жүрсе де қоғамнан алыстамай, әрдайым өткізіліп жатқан іс-шаралар мен жұмыстарға қатысып, белсенділік танытып жүрді. Мұның өзі, өзін құрметтеген, өзін қоғамның бір мүшесімін деп санаған әрбір жанның өзгелерге қарағанда ерекше бір болмысы. Үкіметтік ұйымдарда белсене жұмыс атқарып келе жатқан Эльмира Гарифоллаевна 2019 жылдан бері жеке кәсіпкер ретінде еңбек етумен қатар, қазіргі таңда «Айналайын баладан» қоғамдық қорының төрайымы, «Шабыт» шығармашылық дамытушылық оқу орталығының жетекшісі, Мақат ауданының іскер әйелдер кеңесі төрайымының орынбасары. 
       Ол 2019 жылдың қыркүйек айында бизнес бастау жоба аясында 505 000 теңге грантының иегері және де 2019 жылдың желтоқсан айында «Іскер ана» жобасына қатысып, грант иегері атанған Эльмира Гарифоллаевна төрайымдық ететін қоғамдық қордың атқарған жұмыстарына шолу жасап өтсек: 2019 жылдың соңында тұтанып, әлі күнге ел шырмауынан шыға алмай келе жатқан ғаламдық пандемия кезінде, ел маска таппай құны шарықтағанда, «Біз біргеміз!» атты жалпыұлттық жоба аясында мектеп оқушыларын еңбекке баулу мақсатында, 150 - ден аса маска тігіп, ауылдың тұрғындарына тегін таратты. Сонымен қатар, тек ауылдың ғана емес, ауданның өзге де қайырымдық іс-шараларына қатысып, селкеу түскен көңілді демеу мақсатында еңбек етіп, жобаларды іске асырып келе жатқан «Айналайын баладан» қоғамдық қорының төрайымы. Азаматтық Альянс ұйымдастырған жобада 500 000 теңге грант иегері аттанып, 2020 жылы әлеуметтік кәсіпкерлік білімін толықтырып, Эмин Аскеровтің курсынан өтті.
       Әрдайым қайырымдық шарасы аясында түрлі жобаларды ұйымдастырып, өткізетін қор балалардың жазғы демалыс уақыттын тиімді пайдалану мақсатында ауылдың осал топ 25 оқушыларына тегін үйірмелер ұйымдастырды. Ол жерде балалар сурет, ән, ағылшын курсы, тігу, пішу, гипспен өнім жасап оны безендіруді үйренумен қатар, «Біргеміз білім» жалпыұлттық жоба аясында ауылдың 60 оқушысын тегін онлайн компьютерлік сауаттылық, құқықтық сауаттылыққа үйретіп, білімдерін шындады. Осындай игілігі мен көмегі мол жұмыстарды жүргізу барысында түрлі пәндік, интеллектуалдық олимпиадалар өткізіп, жүзден жүйрік шыққан, қабілетті жастар алға шығып, тиесілі марапаттармен марапатталды және жүлделерге ие болды. Эльмира Гарифоллаевна төрайымдық ететін қоғамдық қордың жұмысы тек балалармен шектеліп қалған жоқ, тағдыр кемесі тасқа соғылып, қарттар үйін паналап қалған қарияларға арнап, «Қарттарым – асыл қазынам», - деп, қарттар күніне орай тегін тамақтармен қамтамасыз етті. Тағдырынан теперіш көріп, қоғам тарапынан көмек күтіп жәутеңдеп қалған өзге де мүмкіндігі шектеулі жандарға қолынан келген көмектерін көрсетіп келеді. «Жаңа жылға саяхат» атты қайырымдылық акциясы ұйымдастырылды, ауданымыздағы 65 мүмкіндігі шектеулі балаларға жаңа жылдық сыйлықтар, мектептің 40 оқушыларын түрлі онлайн конкурстарға катыстырып, жүлделі орындарға ие болып, сый-сияпаттармен марапаттады.
       - 2021 жылдың қантар айынан бастап, «Рамазан» қайырымдылық дүкені жұмысын бастады. Қоғамдық жұмысқа 1 адам алынды. Тізім бойынша 65 отбасын тегін киім-кешекпен қамтамасыз етіп келеді. «Қайырымды істер марафоны» аясында аз қамтылған, көпбалалы 10 отбасыны азық - түлікпен қамтамасыз етті және де волонтерлік жұмысын да жалғастырып келеді, 2021 жылғы 9 сәуірде 9 балалы отбасыға «Асар Уме» қайырымдылық қорымен бірге ұйымдасып, көпбалалы отбасыға пәтер сыйлады. Әлі де алдағы уақытта тағы да әлеуметтік аз қамтылған отбасыларға ұйымдасып, үй сыйлаймыз ба!? деген жоспарында бар. Казіргі таңда шығармашылық орталықта тегін үйірмеде 25 осал топ оқушылары білім алуда. Ол жерде ауыл жастарының бос уақытын тиімді пайдалану мақсатында, оларды волонтерлік бағытқа үйретіп келеді.
       Қазіргі таңда, 2020 жылы Үздік әлеуметтік жоба аясында 1 миллион теңге грант иегері болып, ауданның ары қарай дамуына үлес қосатын жоспарында бар. Мектеп оқушыларының бос уақытын тиімді пайдалану мақсатында О.Саргунанов атындағы мектептің ауласына «Табиғатты аялайық» атты акция аясында 20 түп ағаш отырғызды. «Қайырымдылық істер марафоны» аясында казіргі таңда тағы да 9 балалы отбасыға үй сыйлайды.
       «Бiлiм беру жүйесiнiң басты мiндеттерiне: бiлiм бағдарламаларын меңгеру үшiн жағдайлар жасау және жеке адамның шығармашылық, рухани және дене мүмкiндiктерiн дамыту, адамгершiлiк пен салауатты өмiр салтының берiк негiздерiн қалыптастыру, жеке басының дамуы үшiн жағдай жасау арқылы парасатты байыту» қажеттілігі айрықша аталып, Қазақстан Республикасының «Білім туралы» Заңында көрсетілген. Осыған байланысты, қоғам алдына оқушының жеке басын үйлесiмдi дамытуға бағыттайтын мiндеттер қойылып отыр. Әрбiр болашақ азаматын жан-жақты тәрбиелеп, бiлiм беру арқылы дамыту ең жауапты iс. Қазіргі таңда балалардың мүмкіндіктерін ескере отырып, өзгелермен теңдей білім алуына барлық жағдай жасалуда.
       «Кентіміздің еріктілер мүшесінде болғандықтан, ауылымыздың инклюзивті және мүмкіндігі шектеулі балалармен жұмыс жасауды жоспарлаудамын. Еңбек қызметім барысында көптеген аудандық, облыстық, республикалық сайыстардан алған жетістіктерім мен тәжірибиелерімді ескере отырып, балалармен жұмыс жасауға еш қиындық туындамайды деп білем. Балалар үшін маңызы мен пайдасы зор болмақ», - деп қор жұмысы туралы ақпарат беріп өткен «Айналайын баладан» қоғамдық қорының төрайымы Эльмира Гарифоллаевна еңбек еткен жылдары, ел игілігі жолында атқарған қызметтері үшін көптеген марапаттарға ие болды. Атап айтар болсақ:
       ✦ 2019 жылы «Еріктілер жылына» байланысты аудан әкімі Ш.Кейкиннің «Алғыс Хаты»;
       ✦ 2020 жылы «Үздік» әлеуметтік жобасы үшін «Алғыс Хат»;
       ✦ Атырау облысының әкімі М. Досмухамедовтің «Алғыс Хаты»;
       ✦ «Шығармашыл ұстаз» төсбелгісінің иегері;
       ✦ 2021 жылы Үкіметтік емес ұйымдар күніне орай «Үздік белсенді үкіметтік емес ұйым» президенті А.А.Семгалиевтың «Алғыс Хаты»;
       «Әр жетістікке жеткен жанның артында жары тұрады»,- деген әдемі тіркес бар, заты әйел болса да үй тіршілігі мен кәсіпкерлік, қордың жұмысына үлгеріп, ісінің нәтижелі болуы үшін үлкен көмегін тигізіп келе жатқан жолдасына деген айтар алғысы шексіз. 2002 жылы Мусин Сәндібек Телманұлымен шаңырақ көтерген Эльмира Гарифоллаевна аяулы жар, бүгінгі таңда 7 баланы дүниеге әкеліп, өсіріп жеткізіп, солардың қызығын көріп отырған алтын құрсақты – «Батыр Ана»!Шаңырақтың ішін шаттыққа бөлеп, дүниеге келген тұңғышы Гаухар Ақтөбе қаласында Медицина саласында білім алып жүрсе, қамшы ұстары, әулетінің жалғасы ұлдың үлкені Темірлан – қобызшы Д. Нүрпейсова атындағы колледжде, музыка саласында тәлім алуда. Қоркыт баба жолымен жүріп, аудан абыройын асқақтатып жүрген жалғыз прима кобызшы ұл.
       Екінші ұлы Батырлан – ағылшын тілін жетік меңгерген, АРЕК технологиялық колледжінің студенті, үшінші перзенті Ерасыл – Кадет сыныбынның озат оқушысы. Адильжан – спорт шебері, қазақ күресінің әр түрлі сайыстар жеңімпазы. Тәңірден көмейінде күміс сөздер күмбірлеген оратор, көркем әдебиеттің көрнекті тұлғаларының шығармаларын, өлеңдері мен Абайдың қара сөздерін оқып, рухани жан дүниесін кеңітіп келеді. Үйдің кенжесі әрі еркесі Райана –2 жаста. Перзенттері шетінен өнерлі, қабілетті оқушылар. Ата-анасының арқасында тәлімді тәрбие, сапалы білім алған перзенттері, өнерге өте бейім болып өсіп келе жатыр. Мақат ауданның абыройын асқақтатып көптеген республикалық, халықаралық байқаулардың, олимпиадалардың жеңімпаздары. Өнегелі отбасының тәрбиесін көрген олардың ата-аналарына ұқсап өз елін, жерін, тілін құрметтеп, еліміздің дамуына өз үлестерін қосатынын азаматтар болатынына сеніміміз мол. 
       - «Жолдасым жоғары деңгейде инженер-механик, «КазТрансОйл» мекемесінде жұмыс жасайды. Мұнайшының немересімін, мұнайшының кызымын, келінімін, жарымын, 110 жылдық тарихы бар мұнайлы мекенде тұрамын. Атам Мусин Тельман Кожагулович Губкин институтын аяктап, берекелі қара алтынды өңірде еңбек еткен мұнайшы. Енем Карабалина Аккерік зейнеткер ұстаз. Ол да 8 балалы дүниеге әкелген, алтын құрсақты – «Батыр Ана»! Өзім 4 ағайындымыз. Ағам, мен, інім, сіңілім. Бәрі ді бір -бір саланың білікті мамандары, ауданымыздың абыройлы азаматтар мен азаматшалары.
       Жұмысыма келетін болсам «Бақытты отбасы» аясында тағы да 9 көпбалалы жанұяға үй сыйладық. Жаратқанның маған сыйлаған бағы шығар, елдің алғысының арқасында 30 «Успешные женщины Казахстана» қазақ елінің табысты әйелдерінің қатарына іліктім. Өте куаныштымын. Істеген еңбектерімнің еленгеніне қуанамын. Мемлекет тарапынан көп деген мүмкіндіктер бар. Тек ізденіс пен талап, арман мен мақсат болса болды. Менің алдыма қойған үлкен мақсаттарымның бірі – қай салада жүрсем де қоғамға пайдамды тигізу. Алдағы уақытта республиканың барлық өңірінде, қалаларында «Ремесленно» шеберлік мектебін ашуды жоспарлап отырмын. Қоғамдық іс-шараларға жиі қатысамын. «Атамекен» палатасы түлегімін, «Әйелдер микробизнесте» жобасының қатысушысымын. Қилы тағдыр кімнің басына өз ауыртпалығын түсірмеген, ауылымызда жүрген әлеуметтік аз қамтылған аналарымызға, отбасыларға үй алуға ұмтылдырып, мүмкіндіктер жасап, кәсіпке баулып, көмектессем бе деген ниетім бар. Алдағы уақытта, өз кезегін күтіп жатқан жоспар көп. Қызмет барысында, жастарымызды коғамдық жұмыска волонтерлік бағытта дайындауда, олардың бойына адами құндылықтарды сіңіріп келеміз деген ниеттемін», - дейді Эльмира Гарифоллаевна.       Ел тарихында, есімін өшпестей етіп қалдырған әйелдер туралы айтар болсақ, мақаламыздың көлемі көтермесі анық. Десек те, заман ауысқанмен адамзаттық болмыс өзгерген жоқ, дәуір өз білігінде айналғанымен қоғамдағы әйелдердің орны уақыт өткен сайын көтерілмесе, абырой биігінен түскен жоқ. Оған дәлел, бүгінгі нарықтық қоғамда нәзікпін демей, ер азаматтың иығына да ауырлық танытар жауапкершілігі мол жұмысты атқарып, күн нұры секілді мейірімділігін төгіп, бір қолымен бесікті, бір қолымен әлемді тербетіп жүрген Эльмира Гарифоллаевна сынды іскер әрі табысты кәсіпкер, асыл жар, алтын құрсақты аналарымыз. Қалай мақтау айтсақ та артықтық етпейтін, жүрегіндегі имандылық нұры жүзінен сәуле болып төгіліп тұрған асыл жүректі, көркем мінезді, жасаған ісін міндетсінбейтін, әр іс-шарасында бала көзіндегі бақыттың табын көріп, бақыт бесігінде тербелетін Эльмира Гарифоллаевна сияқты қоғам белсенділерінің қатары көп болғай!