Ұлы Абай: «Адамның адамшылығы – ақыл, ғылым, жақсы ата, жақсы ана, жақсы құрбы, жақсы ұстаздан болады», - деген ғой. Әңгімемізге арқау болып отырған Аяпов Батырхан Қаныбекұлы көпбалалы отбасында тәрбиеленіп, әкенің темірдей тәртібін, ананың мейірімге толы ақылын тыңдап ержетті. Батырхан жайлы әңгіме қозғағанда оның бойындағы адамгершілік қасиеті бірінші орында тұрады. Адамгершілік дегеніміз – адам бойындағы рухани тәрбие көзі. Алдымен ата-анадан бастау алатын осы ұғым ең алдымен тәрбие мен еңбекпен сипатталатыны рас. Сондықтан да, халық даналығында «Ағаш түзу өсу үшін оған көшет кезінде көмектесуге болады, ал үлкен ағаш болғанда оны түзете алмайсың»,- деп бекер айтылмаса керек-ті. Барлық баласына мейірімділік, қайырымдылық, яғни, адамгершілік құнды қасиеттерді сіңіріп, өз-өзіне сенімді болуды үйретіп тәрбиелеген Қаныбек ақсақалдың тәлімді тәрбиесі бүгінде балаларының барлығының жоғары білімді, өз саласының абыройлы маманы, шаңырақтарының өнегелі де берік болып отыруына көп ықпалын тигізді деуге болады. Жұбайы Күланда екеуі қарапайым еңбек адамдары бола жүріп, өнегелі, үлгілі отбасы ретінде өз орталарында сыйлы, беделді жандар болды. Барлығына өздері қалаған жоғары білімді алуларына ықпал етіп, ұлдарын ұясына, қыздарын қиясына ұзатып, алыс-жақын елмен құда-жегжат болды.
      Өнегелі отбасында ержеткен Батырхан Қаныбекұлы бала кезден елмен етене араласып, туған жерінің ой-шұқырына дейін, әрбір отбасын жақсы танитын. Мектеп жасында-ақ өзінің ойлы сөзімен, шешімді көзқарасымен қатарластарынан көш бойы озық жүретін. Қолынан келмейтін ісі жоқ, нағыз сегіз қырлы бір сырлының өзі-тін. Саналы ғұмырының кейінгі жылдарын түйе шаруашылығына арнаған әкесінің еңбекқорлығын көріп есейген Батырхан да басқа бауырлары да ауыл шаруашылығы, оның ішінде мал шаруашылығына қанығып есейді.
      Аяпов Батырхан Қаныбекұлы 1978 жылғы 15 қыркүйекте Оңтүстік Қазақстан облысы, Созақ ауданы, Созақ совхозының 1-фермасы Қақпансор елді-мекенінде қарапайым қазақ отбасында дүниеге келген. Әкесі Аяпов Қаныбек Созақ совхозында (механизатор) трактор жүргізушісі болып 25 жыл еңбек еткен. Еліміз егемендік алған жылдары яғни, 1991 жылдан бастап Созақ совхозының бір отар түйесін қабылдап, зейнет жасына дейін түйеші болып жұмыс істеген. Анасы Райымбекова Күланда Қақпансор елді мекенінде Саттар Ерубаев атындағы жалпы орта мектебінде қарапайым тазалықшы және интернатта жататын малшылардың балаларына нан жабушы болып жұмыс істеді. Кейін совхозда түйе шаруашылығында сауыншы болды. Дүниеге 11 бала әкелген Батыр ана. Отбасында бір әке-шешеден он бір бала, тоғыз ұл, екі қыз көпбалалы отбасынан шыққан.
      Батырханның үлкен әпкесі Рыскүл қазіргі таңда Сарыағаш қаласының тұрғыны, тұрмыста.Жолдасы Дүйсебаев Али екеуі отбасында 5 бала тәрбиелеп, өсіріп бүгінгі таңда төрт немере сүйіп отырған өнегелі отбасы. Ағасы Мейірбек жоғары білімді білікті мал дәрігері, қазіргі таңда Созақ ауылдық округі әкімдігінде мал дәрігері болып қызмет атқарады, жұбайы Саспахова Рая №1 колледжде оқытушы, бүгінде 4 бала тәрбиелеп, өсіріп отыр. Бақыт ағасы – кәсіпкер мұнай өнімдерін тасымалдау қызметтерімен айналысады, жұбайы Топшақова Кенжекүл екеуі 5 бала тәрбиелеп отыр. Мейірқұл ағасы жұбайы Бейсекеева Индирамен төрт бала тәрбиелеп, «ТЕКЕЙ» шаруа қожалығының төрағасы қызметін атқарады. Еліміздің әл-ауқатын арттыру жолында біршама көмектер жасап жүрген танымал тұлға. Бауыржан ағасы «Казатомпром» Ұлттық компаниясында 1 дәрежелі шебер, отбасында жұбайы Карибаева Гүлайым жоғары білімді Смет Кеңесбаев атындағы жалпы орта мектебінде мұғалім, отбасында 4 бала өсіріп отырған үлгілі отбасы.Інісі Ғалымжан – жеке кәсіпкер, жұбайы Кеңес Нұргүл жоғары білімді бастауыш сыныбының мұғалімі, жанұяда 2 бала тәрбиелеп отыр. Біржан жеке кәсіпкер, мұнай өнімдерін сатумен айналысады. Нұржан жеке кәсіпкер, өзінің басқаруында «М Строй Групп» ЖШС-нің құрылтайшысы, ауыл шаруашылық саласында ұңғымалы құдықтар қазып, шөлейтті аймақтарда су көздерін ашып, елдің алғысын алып жүрген азамат. Жұбайы Тұрсынбекова Алия жоғары білімді экономика және менеджмент маманы, отбасында 4 бала тәрбиелеп отыр. Қарындасы Ақерке Таукент кентінде «Гүлдер» балабақшасында тәрбиеші болып жұмыс істейді. Інісі Бекжан жоғары білімді, қазіргі уақытта жеке кәсіпкер «Еділ Мұнай» ЖШС-ның директоры, отбасылы, жары Динарамен бір бала тәрбиелеп отыр.
      Батырхан Қаныбекұлы 1985 жылы Қақпансор елдім екеніндегі С.Ерубаев атындағы 8 жылдық орталау мектебінің табалдырығын аттады. Мектепті ойдағыдай оқыған Батырхан сыныптастары арасында беделді, көшбасшы әрі ұйымдастырушылық қасиетімен ерекшеленіп көзге түсіп жүретін. Арманшыл, өз ойын іске асыруға барын салатын бозбала 1993 жылы Түркістан қаласындағы А.Байтұрсынов атындағы жалпы орта мектебіне ауысты. 1995 жылы аталған мектепте 10 жылдық білімін толығымен аяқтап шығып, 1997 жылы Түркістан қаласында Қожа Ахмет Яссауи атындағы халықаралық Қазақ-Түрік университетіне күндізгі заң бөліміне оқуға түсіп, 2001 жылы ойдағыдай бітіріп шықты. Дипломын қолына алғаннан кейін сол жылы әскер қатарына алынып, Алматы қаласындағы ООБОН №5572 Ішкі әскери бөлімінде Отан алдындағы борышын абыроймен адал өтеді. 2002 жылы әскерден келген соң өзінің отбасылық «ТЕКЕЙ» шаруа қожалығында мал басын көбейту, асылдандыру жұмыстарымен айналысып, қожалықтағы түйе басын 80 бастан 140 басқа, сиырды 100 бастан 150 басқа көбейтті.
      Батырхан Қаныбекұлы 2005 жылы Созақ аудандық сотына сот приставы қызметіне орналасып, 2006 жылы осы соттың қылмыстық және әкімшілік істер бойынша сот хатшысы қызметіне көтерілді. 2007 жылы кеңсе меңгерушісі қызметін атқарды. Мамандығы бойынша көп тәжірибесі бар ол 2013 жылы Созақ ауылдық округі әкімдігіне бас маман заңгері болып ауысты. Ал 2019 жылдың наурыз айынан бастап, Созақ ауылдық округінің әкімі қызметін абыроймен атқарып келеді. 
      Иә, қазақта: «Әкім бол, халқыңа жақын бол»,- деген нақыл сөз әу бастан қалыптасып, айтылып келе жатыр. Батырхан Қаныбекұлы бұл жаңа қызметіне жаңа күш-жігерімен құлшына кірісті. Бірінші күннен-ақ жерлестері Қаныбек ақсақалдың баласы ел басқару ісіне кірісті дегеннен-ақ баталарын беріп, риза болысқаны жасырын емес. Рас, әкім болу – жұмсақ орындықта отырып алып, орынбасарларын, қызметкерлерін жұмсау емес. Әкімдік қызметтің жүгі ауыр. Тұрғылықты жердің тарихын терең білмей, кем-кетігін іздеу де орынсыз. Қырағы көз басшы оны жақсы білетіндіктен, ең алдымен ел-халықпен кездесуде мұң-мұқтаждықтарын естіп-біліп, ең қажеттісінен бастап іске кірісті. Тіпті, ауыл-аймақтың тазалығы да жіті назарға алынатын болды. Көшбасшы ең бастысы ауыл азаматтарының басын қосып, елді берекелі іске жұмылдыра біледі. «Жақсы іс жүзіңді жарқын етеді» дегендей, іскер ұйымдастырушыны ел азаматтары мен тұрғындар қолдап, бар істі бірлесіп атқарып келеді. Ұдайы ізденісте жүретін Батырхан Қаныбекұлының мақсаты ауыл тұрғындары жақсы өмір сүрсе екен дейді. Ауыл әкімдігі қызметінде ауыл халқының әл-ауқатын арттыру жолында біршама жетістіктерге жеткен оның алға қойған жоспарлары да көп.
      Батырхан Қаныбекұлы жоғарыда айтып кеткеніміздей жастайынан еңбекқор, өмірге ғашық болған азамат. Қай кезде болмасын аузынан ауыл-елі түспейтін, жүрегі кең, реті келгенде шын мұқтажға көмек қолын созуға дайын тұратын жомарт жан. Елмен, жақын-жуығымен сыйластығы мығым, жан-жағындағы достары да, әріптестері де, қызметтестері де оның қарапайым қалпына тәнті. Бойындағы ізгілік пен парасаттылық оның адалдығы мен әділдігін паш етіп тұрғандай. Әрдайым өз жұмысына асығып тұратын, бүгінін бір жақсы іспен аяқтауға тырысатын нағыз маман. Өзі қандай болса, жанындағы қызметкерлері де сондай, іскер, өз шаруаларына мықты, сайдың тасындай қаланған жандар. Ал осындай ел басқарушысы бар аймақтың қандай болмағын бағамдай берсеңіз болады! Көп мақтауды ұната бермейтін, сөзден іске дейтін азаматтың өн бойы толы жақсылық. «Бұлақ көрсең көзін аш» дегендей, талантты, талапты жастарды әрдайым қолдауынан кенде қалдырған емес. Білімді, өнерлі, спортсүйер жастарды үнемі демеп отырады. Көпбалалы аналарды қолдап, оларды айтулы мерекелерде арнайы құттықтап, сый-сыяпатын да жасауды ұмытпайды. 
      Отбасында жұбайы Мүсірепова Майра Беркінбайқызы жоғары білімді. Созақ жалпы орта мектеп гимназиясында мұғалім. Көпбалалы отбасынан шыққан Майра Беркінбайқызы бүгінде үлкен әулеттің сыйлы да өнегелі келіні. Батырхан мен Майра бақытты отбасында 5 бала тәрбиелеп, өсіріп отыр. Қыздары Айкерім мен Шұғыла оқу озаттары.
      Іскер азаматтың отбасына аманшылық тілеп, абыройлы қызметте биік белестерді бағындыра береріне сенімдіміз!