Өзінің ұлағатты істерімен, қарапайым да адамгершілік қасиеттерімен көптің құрметіне бөленіп жүрген жандар арамызда жетерлік!
Білімі терең, тұлғасы кесек, өмір көшінде өзгеден ерек, ой байламы бөлек көрініп тұратын Тынышкүл Дәлиева жайлы көп нәрсе айтуға болады. Оның жүріп өткен жолы көпке үлгі, өнеге боларлық. Күні бүгінге дейін өзінің парасаттылығымен, білімділігімен қоғамға еңбегі сіңіп келеді. Оның еліне арнаған жұмысы, айналасындағыларға жасаған жақсылығы ер азаматқа бергісіз дер едік. Сонысымен де ол әрқашан абыройға бөленіп, мерейін асқақтатып отыр. Ол көппен туыс, талаймен дос. Өз ортасымен, жақындарымен сыйлас та, сырлас. Өз ісіне мығым, мамандығына адалдық танытып, соның хас шебері атанған ұлағатты жан, бар күш-жігерін қызметімен бірге отбасының бақытына да арнап, жан жылуын айналасындағыларға аямай төге алды. Бүгінде мерей биігіне, құрмет қадіріне өз еңбегімен, іс-әркетімен жетіп, ұрпақтарына да өзінің білімділігін дарытып отыр. Тіпті ұрпағына ғана емес, елдің де балаларына үлгілі тәлім-тәрбиесімен құрметті жан. Бойындағы кез келген адамға, ағайын-туысқа деген бауырмалдығы, қарым-қатынасы адал. Оның бауырмалдығы тек туыстық негізде ғана көрінеді десек қателескен болар едік. Адамгершілік, имандылық қасиеттерін айқындайтын мінез-құлығының өзі жағымды екенін аңғаруға болады. Жақсыда жаттық болған емес. Өзгені бауырына тарта білу, әр адамды жақын санап қамқорлық көрсету сияқты ізгілік белгілері адамдар арасындағы өзара сыйластықты, бірін-бірі құрметтеу, жақын тұту сезімдерін қалыптастырады емес пе?! Алыс-жақындығына, үлкен-кішілігіне қарамастан, кез келген жағдайда оларға көмектесуге дайын тұру, қол ұшын беру қасиеті де, оның бауырмалдығын аңғартып тұрады. Мұхаммед пайғамбарымыздың бір хадисінде: «Жақсылық жасаңдар, қайырымды болыңдар!» - десе, оны келесі хадисте: «Ақкөңіл адамның тамағы ем болады, ашкөз адамның тамағы дерт болады»,- деп толықтырған екен. Ол осы жолынан айнымай, әрдайым адалдық жолынан таймай келеді.
      Сырбойылық Тынышкүл Дәлиева 1947 жылы 9 қантарда Дауылкөл ауылдық советіне қарасты Ленин совхозында дүниеге келген. 1953 жылы Ленин атындағы совхозда №29 мектептің бірінші сыныбына қабылданады. Мектепте өзінің алғырлығымен, зеректігімен ұстаздарының сүйікті шәкірті болып, барлық сабақты үздікке оқыды. Мектептің қоғамдық іс-шараларына қалмай қатысып, өзінің ұйымдастырушылық қабілетімен, сыныптастарының арасында көшбасшы бола алды. 1964 жылы сол мектептің 11-сыныбын үздікке аяқтады. Өзінің оқыған алтын ұя мектебінде аға пионер вожатый болып жұмыс істеді. Білімге құштар жас түлек арман жетегімен 1965 жылы Қызылорда қаласындағы Н.В.Гоголь атындағы педагогикалық институтына келіп, филология факультетіне оқуға түседі. Өзінің арманы болған алтын ордасында да оқуға деген ынтасымен, қоғамдық өмірге бейімділігімен көш басында болды. Мол тәжірибелі оқытушылардан білім алып, жан-жақты ізденімпаздығының арқасында жоғары оқу орнын 1969 жылы ойдағыдай аяқтап шықты. Қолына дипломын алған жас маман 1969-1971 оқу жылдары №185 орта мектепте оқу ісінің меңгерушісі қызметінен еңбек жолын бастап, 1971-1976 жылдары өзі білім алған №29 орта мектепте қазақ тілі мен әдебиеті пәнінің мұғалімі, бастауыш партия ұйымының хатшысы болып абыройлы қызмет атқарды.
      Көпшілік ортамен тез тіл табыса білетін іскер жан 1976-1979 жылдары «Жосалы» совхозын қамтитын Қызыл Жұлдыз ауылдық Советі атқару комитетінің төрағасы, 1979-1982 жылдары Ақжар ауылдық Советі атқару комитетінің төрағасы, 1982-1983 жылдары Ақжар совхозы партия комитетінің хатшысы, 1983 жылдың желтоқсан айынан бастап аудандық партия комитетінің хатшысы болып ел ағаларымен қатар қызмет етті. Беделді, белді тұлғалармен қатар жүріп, сан қырлы қызметтен тәжірибе жинақтаған нәзік жанды мықты маман, қай салаға болмасын тастай сіңіп, судай батып, тас түйін қызмет ете білді. Оның іскерлігі қай ортада болмасын айтылып, өзінің лайықты бағасын да алды. Мықты маман қай жерге де сіңімді, әрі керек. Ол 1987 жылдан бастап №14 кәсіптік-техникалық училище директоры (кейін 2000 жылдан бастап №12 кәсіптік мектеп) қызметіне тағайындалды. Ал 2007 жылдың ақпан айы мен мамыр айына дейін №12 Қармақшы кәсіптік мектептің кадр бөлімінің меңгерушісі қызметіне келді. 2007 жылдың мамыр айы мен тамыз айының аралығында «Нұр Отан» партиясының Қармақшы аудандық филиалының бірінші орынбасары болып елеулі қызмет атқарды. Сол 2007 жылдың тамыз айынан бастап Қармақшы аудандық мәслихат тексеру комиссиясының төрайымы болса, 2011 жылы қыркүйек айында аудан әкімінің кеңесшісі қызметін абыроймен атқарды. Саналы ғұмырын тек ғана ел игілігі жолында қызмет етуге арнаған жанның марапаттарының өзі бір төбе. Атап айтатын болсақ, ол 1970 жылы комсомолдың «Золотые руки» төсбелгісін омырауына тақты. 1975 жылы Шымкентте өткен педагогикалық оқулардағы баяндамасы жоғары бағаланып, еңбек кітапшасына алғыс жарияланды. 1972 жылдан бастап КПСС мүшесі, 1977 жылдан ауылдық Кеңес депутаты, 1980 жылдан бастап аудандық партия комитетінің мүшесі болды. 1982 жылы «Еңбекте үздік шыққаны үшін» медалімен марапатталды. 2001 жылы облыстық білім беру департаментінің «Қазақстан Республикасы Тәуелсіздігінің 10 жылдығына» мақтау қағазын алды. «Шабыттың шыққан шыңына» номинациясы бойынша жеңімпазы атанды. 2002 жылы Қазақстан Республикасы Білім және Ғылым Министрлігінің «Құрмет грамотасымен» марапатталды. Сондай-ақ аудан, облыс әкімінің және облыстық білім беру басқармасының «Алғыс хаттарымен» бірнеше рет марапатталды. 2005 жылы «Халық қалаулысы» номинациясы бойынша диплом, облыс әкімі жанындағы отбасы және әйелдер істері жөніндегі комиссиясының кәсіптік мектепті дамытудағы атқарып жатқан адал еңбегі үшін «Ризашылық сертификаты» берілді. 2005 жылы Қазақстан Республикасының Президентінің «Құрмет грамотасымен» марапатталды. 2006 жылы Қазақстан Республикасының Президентінің «Алғыс хатымен» марапатталды. 2007 жылы Қармақшы ауданының «Құрметті азаматы» атағын алды. 2008 жылы III дәрежелі «Еңбек даңқы» медалін, 2009 жылы I дәрежелі «Еңбек даңқы» медалін, 2010 жылы «Қармақшы ауданына – 80 жылдық» төсбелгісін, 2011 жылы «Тәуелсіздіктің – 20 жылдығы» медалін алды. Сонымен қатар, облыс, аудан әкімінің алғыс хаттары мен құттықтауларының иесі. 2017 жылы «Қармақшы ауданына – 90 жылдық» төсбелгісімен және аудандық энциклопедияға, 2018 жылы «Қызылорда қаласына 200 жыл» медалімен марапатталып, облыстық энциклопедияға енгізілді.
      Тынышкүл Дәлиева 1990 жылы сәуірдің 3-9 аралығында қаладағы, облыстағы училищелердің бірде-біреуі ала алмаған кезде республикалық химия олимпиадиясын аудан орталығындағы №14 селолық кәсіптік-техникалық училищеде өткізіп, бәйгеге КАВЗ автобусын алды. Училище аты «Қызыл кітапқа» жазылып, тірек мектебіне айналғанын мақтанышпен айтуға болады.
      Қазақстан Республикасының «Білім туралы Заңының» және Қазақстан Республикасы Үкіметінің «Білім берудің мемлекеттік жалпы міндеттік стандарттарын әзірлеудің, бекітудің және қолданылу мерзімінің тәртібі туралы» қаулысының нормаларын басшылыққа ала отырып, 4401001 - «Ауылшаруашылығы техникалары мен жабдықтарын жөндеу және күту шебері» мамандығының типтік оқу жоспарын ұсынып, сол бойынша жасалған бағдарлама білім беру мен тестілеудің мемлекеттік стандарттың ұлттық орталығынан шығарылды. Ол республика бойынша оқу жоспарына енгізілді. Ауыл шаруашылығымен айналысатын аудандарда күні бүгінге дейін
осы бағдарламамен оқытылып келеді.
      Сонан соң мектеп ұжымы оқу-әдіс-темелік құралдарын және тест сұрақтарын ұлттық орталыққа ұсынды. «Ауыл шаруашылығы техникалары жабдықтарын жөндеу, күту шебері» мамандығы бойынша жалпыға бірдей мемлекеттік стандартқа сай бағдарлама жасалып, республикаға таратылды. Қазір ауыл шаруашылығы аудандарда осы бағдарлама оқылады. Көкшетау қаласында 2000 жылы өткен Қазақстан Республикасы бойынша Германиямен бірлескен озық тәжірибені насихаттау барысында кәсіптік-техникалық училищелердегі шығармашылық және мектеп базасы, инновациялық білім негізінде жеткізудегі жұмысы жайлы баяндамасы жоғары бағаланды. «Нұр Отан» халықтық демократиялық партиясы жанындағы Сыбайлас жемқорлыққа қарсы күрес комиссиясының төрайымы болды. 2007 жылдан аудандық мәслихат тексеру коммиссиясының төрайымы, аудандық мәслихат депутаты болып, 2011 жылдың қыркүйек айына дейін қызмет атқарды.
      Бақыттымын деп мақтанба,
      Жақсы киім кигенге.
      Бақыттымын деп мақтанба,
      Сылқым сұлу сүйгенге.
      Бақыттымын деп мақтанба,
      Күректеп ақша жиғанға.
      Бақыттысың! 
            еңбегің еш боп күймесе,
      Бақыттысың!
            жақсыға зияның тимесе,
      Бақыттысың! 
            ұсынғанда қол алсаң,
      Біреуге үлкен, біреуге кіші бола алсаң! - деген өлең шумақтары арқылы Тынышкүл апайымыз өмірдің мәнін, бақыттың бары мен бағын түсіндіріп өткендей. Адамның бақытты болуы үшін көп нәрсе қажет емес екен-ау сірә...
      Тіршілікке нәр беретін әйел-ана дейтін болсақ, әлемдегі жақсылық көзі, адамдық қасиет, ақ тілек мейірбандылықтың бәрі ана деген сөзбен астасып жатады. Ана әрбір адамның жарық дүниедегі ең жақыны, жанашыры, қадірлісі, қамқоршысы, ақ сүтін емізіп аялаған, жанын да 
аямаған ардақтысы. Ел алдында елеулі қызметте жүріп, отбасының жағдайын жасап, дүниеге перзент әкеліп қана қоймай, оларды көзінің қарашығындай қорғап, аялап өсіріп аяғынан тік тұрғызды. Өмір есігін жаңа ашқан баланың бойына елінің рухын сіңіретін, жылауын қойғызатын ана емес пе?! Қауырт қызметпен бірге балаларының амандығын, бақытын ойлап, болашақта абыройлы болуын тілеп, өзінің бойындағы ең жақсы қасиеттерді сіңіре білді. Шаттықты жанұяда үш бала тәрбиелеп, өсірді. Барлығын да жоғары оқу орындарына түсіріп, мамандықтары бойынша қызметке орналастырды. Бүгінде үш баласынан 10 немересі бар. Үлкен ұлы Мұстахи – заңгер, кәсіпкер. Үлкен қызы Гүлфайруз – дәрігер, Денсаулық сақтау ісінің үздігі. Кіші қызы Забира – қалалық соттың судьясы қызметінде. 
      Бүгінде әзиз-ана жаяу көп жүріп, денсаулығын күтеді. Қоғамдық іс-шараларды, жаңалықтарды назарынан тыс қалдырмайды. Елдік іске барынша байыппен қарайды. Елбасының Жолдауларын қалдырмай оқып, отбасы мүшелеріне талдап айтып отырады. Жергілікті басылымдарға өз үнін үздіксіз қосып келеді. Ауыл-аймақ өміріндегі қоғамдық жұмыстарға белсене араласып, жастарға ақылшы, көпшілікке үлгі болып жүрген жанға мықты денсаулық тілеп, ұрпақ қызығын көріңіз демекпіз.