Адамзат жаралғаннан бері жер бетіндегі осы саналы тіршілік иесінің атауына қосылып айтылып келе жатқан «адамгершілік» деген тіркес бар. Адам бойындағы қандай да бір қасиеттің армен безбенделетінін ұғынған ұлтымыз пенделік пиғылдан ауласын аулақ салып, адамгершілігін аласартпаған жанды ардақ тұтып, құрмет көрсеткен... Осы адамдықтың асқарына өздерінің арлы ісімен есімдерін жазған жандардың арасынан ойып тұрып өз орнын еншілеген ауданымызда бір арда азамат бар. Ол – Қыдырбеков Алмас Шарифоллаұлы. Мақаламызды майыздап бастау себебі де сол, есімі ел арасында ерекше құрметке ие болса да, өзінің қызметтік міндетінен тыс өмірдегі өзгелерге жасаған адамшылық істерін, жандары жабырқау жандарға жасаған жақсылықтарын жан-жағына жар салып, жария ете бермейтін осы бір азамат ағаның адами қасиеті, жалпы адамгершілігі жайында әңгімелеу. 
      Ол, 1988 жылы 28 шілдеде қазіргі Қарағанды облысы, Сәтбаев қаласында дүниеге келген. Бала күнінен көзінің нашар көруіне байланысты екінші топтағы мүгедектер қатарында. Кішкентайынан 7 жасына дейін Қарағанды облысы, Ұлытау ауданында әжесінің қолында өсіп тәрбие алған азамат. Қазақта ата-әжесінің тәрбиесін көрген бала басқаша болады, айналасының да көзқарасы оған ерекше болатыны да рас. Өйткені, ауыл үлкендерінің жанында жүріп, олардың өнегелі әңгімесін тыңдап өскен баланың сана-сезімі басқалардан ерекше болып қалыптасады. Сондықтан әжелерді таптырмас тәрбие мектебі дейміз. Әже алдын көріп, тәлімін алған Алмас бала 1995-2006 жылдары Сәтбаев қаласындағы №4 Абай атындағы мектеп-лицейінде білімін алады. Кейін 2011 жылы Алматы қаласындағы Республикалық медициналық колледжіне түсіп, 2013 жылы бітіріп шығады. Сөйтіп, іскерлігімен танылған жас жігіт 2013 жылы Мүгедектер қоғамдастығы «Нығмет» қоғамдық бірлестігін ашып, соның төрағасы болып сайланады. Бұл қызметтің небір ыстығы мен суығын бастан кешіріп, өмірлік тәжірибесі толысқан Алмас азамат 2014 жылы «Қыдырбеков А.Ш» жеке кәсіпкерлігін құрып, массаж кабинетін ашады. Онда Мүгедектер қоғамдастығы «Нығмет» Қоғамдық бірлестігінің базасында мүмкіндігі шектеулі жастарды тегін «Массаж» мамандығы бойынша оқытады. Шыны керек, 18 жасқа толған соң мүгедек жандар қайда барарын білмей дағдарады. Олардың көбі әлеуметтік жәрдемақы ала алмайды, жұмысқа тұрайын десе жағдайлары келмейді, денсаулықтарына орай нарықта қай мамандықты игеруді бағдарлай алмайды, айта берсе, күнделікті тірлікте де мүгедектер кезігетін проблемалар жетіп артылады. Осындай мүмкіндігі шектеулі балаларға арнап шағын орталық ашқан Алмас азаматымыз, мүмкіндігі шектеулі жандарды жұмысқа қабылдап, мүмкіндігі шектеулі жастарға өз қамқорлығын көрсетіп келеді. Бүгінгі күні шағын орталықта 45 бала ем шараларын қабылдап, жақсы нәтижелер көрсетуде. Сонымен бірге, 2020 жылы Қазақстандағы БҰҰ-ның қаржылай қолдауымен Қарағанды қаласында грант жеңіп алып, мүмкіндігі шектеулі жастарды жұмыспен қамту мақсатында «Жиhаз цехы» әлеуметтік жобасын іске қосады. Қала өміріне де белсене араласып және қайырымдылық акцияларына да қатысып тұрады. Тізбелей берсек, тер төккен еңбегінің жақсы нәтижесі осылай жалғаса береді. Осылардың барлығын өз мүддесі үшін жасалған қызметі емес, адамгершіліктің парызының қайтарымына еткен елеулі еңбегі деп білуіміз керек. «Адам ұрпағымен мың жасайды» демекші, Алмас Шарифоллаұлы көп балалы әке. Сондай-ақ «Еңбегіне қарай табысы, Ерлігіне қарай дыбысы», – дегенді берік ұстанған Алмас Шарифоллаұлы атақ пен абыройға тек маңдай термен жетуге болатынын яғни, ауыр жолмен жүре білген жан ғана жеңіске жете алатынын болашақ жастар санасына терең сіңіре білсе екен дейді өз сөзінде. Осы жетістіктерге жету жолында анасының да үлесі зор екенін азаматтың әрбір сөзінен анасына деген перзенттік пейілді аңғаруға болады. Себебі, әкесінен ерте айырылған Алмас пен оның інісі Жандос кішкентайынан аналарының қамқорлығында болып ер жетеді. Анасы әкенің орнын баса алмаса да, отбасының асыраушысы болып, екі қос ұлдарының тірегі болды.
      Қанаттыға қақтырмай, тұмсықтыға шоқтырмай, жығылған да алақанын тосатын адам, Алладан кейінгі екінші қамқоршысы – әр баланың ата-анасы. Сол себепті Алмас анасы Қыдырбекова Роза Рақымбекқызына өзіне жасаған жақсылығы, көмегі, көңілі үшін ризашылығын білдіріп, үлкен алғысын айтады. Бүгінде анасы балалар көз дәрігер маманы. Өз бойындағы адами қасиеттерді балаларының санасына сіңіріп, қызметтегі, жалпы өмірдегі тура жолымен үлгі болған Алмас мырзаның көпшілік білетін бітім-болмысы міне, осындай. 
      Абыройлы азамат жауапкершілігі мол қызметте өз міндетін мүлтіксіз атқарып, адал еңбегімен көпшілік алғысына бөленді деп айтуымызға толық негіз бар. Ол қарапайымдылығымен қадірін арттырған азамат. Сондықтан қадірлі азаматтың есімі қашанда зор құрметпен аталады деп айта аламыз.