«Шеге тағаны ұстайды, таға тұяқты ұстайды, тұяқ атты ұстайды, ат ерді, ер елді ұстайды» деген халық даналығы бар ғой. Біз әңгімелегелі отырған Әбілқасым Әбілдаұлы жайлы пікір айтар болсақ, осы қанатты сөз еріксіз ойға оралады. Шындығы сол ол халқына қалаулы, еліне елеулі азаматтардың бірі ғана емес, бірегейі деуге болады. Көп көз сыншы емес пе?! Оның ел-халқына арнаған жұмысы, айналасындағыларға жасаған жақсылығы абыройға бөлеп, мерейін асқақтатып келеді. Ол өзінің еселі еңбегімен, маңдай терімен талай асуларды бағындырған азамат. Бір ауыз сөзбенен түйіндер болсақ, ол нағыз азамат, сегіз қырлы, бір сырлы жан, ағайындарына бауырмал аға. Оған елдің сыртынан айтып жүрген шарапатты әңгімелері мен алғыстары, баталары мен ақ тілеулері дәлел. Ең бастысы өз ісінің нағыз майталманы екенін дәлелдеп, жылдар бойы табанды, нәтижелі еңбегін көрсетіп, сол еңбегіне сай әр кездерде де өзінің лайықты бағасын алып келеді. Бұлардың барлығы да талай жылдағы еңбек пен өмір жолындағы абырой-беделдің жемісі деуге болады.      Мәмбетов Әбілқасым Әбілдаұлы 1963 жылы 16 қаңтарда Сырдария ауданы, Тартоғай совхозы, қазіргі Тұрсынбай датқа ауылында дүниеге келген. Орта мектепті ойдағыдай аяқтап шыққаннан кейін Жамбыл гидромелиоративтік құрылыс институтының Қызылорда филиалына 1981 жылы оқуға түсіп, оны да үздікке 1986 жылы тәмамдап шықты. Еңбек жолын 1980-1981 жылдары Сырдария ауданы, Тартоғай совхозында қарапайым жұмысшы болып бастаған ол, аға мамандардың жанында жүріп, қолынан келген жұмысты бар күш-жігерін салып жасады. Еңбекқор жас ұжымға бірден-ақ сіңіп, аға-апаларының арасында елгезектігімен, іскерлігімен, жылдамдығымен, ширақтығымен, алғырлығымен, ізеттілігімен көзге түсіп, ұжым мақтанышы болды. Қолынан іс келетін жас 1986-1987 жылдары Тартоғай совхозында малшаруашылық техникалары механигі болып жұмыс жасады. Қай іске болмасын білек түре кірісетін жас маман үйренуден, ізденуден жалықпады. Басшылық тарапынан сеніп тапсырылған жұмыстың үдесінен шыға білді. Бастаған ісін аяғына жеткізбей тынбайтын жас, барынша күш-жігерін еңбекке салды. Отан алдындағы борышын өтеу мақсатында 1987-1989 жылдары Совет армиясы қатарында қызмет атқарды. Әскерден келген соң 1989-1991 жылдары Сырдария ауданындағы «Райселхозтехника» мекемесінде бригадир ММО және бас механик болып жұмыс істеді. Өзінің жан-жақтылығымен жұмыс барысында басшылық тарапынан қолдау тауып, 1991 жылы Сырдария аудандық агро-өнеркәсіптік бірлестігінде коммерциялық сұрақтар жөніндегі жетекші маман қызметіне кірісті. Оңды-солын танып, өз жұмысына жатық болған азамат 1991-1994 жылдары «Агропромтехника» бірлестігінің Қызылорда облыстық базасы директорының орынбасары, 1994-1996 жылдары Сырдария аудандық агроөнеркәсіптік бірлестігінде бас инженер, басшының орынбасары қызметтерін бар беделін салып атқарды.
      Мейлі үлкен, мейлі кіші болсын, қаймағын ұйытатын, сол елдің татулығы мен бірлігін, ырысы мен берекесін тасытып отыратын берекелі адам болады емес пе?! Ондай жандар, көп ортасында сабырлы байыппен игі істер бітіріп отыратыны жасырын емес. Ондай адамдар ыстық ықыласымен ел үшін егіледі, халық үшін қамығады. Адамдықты ту етіп, өңірдің өркендеуіне үлес қосып, өзінің саналы ғұмырын туған жеріне арнайды.
      Сөзіне берік, ісіне мығым Әбілқасым Әбілдаұлы қандай қызметте жүрсе де адамгершілік қасиетінің арқасында биік белестерден көрініп, өзінің білімі мен біліктілігі, адалдығы мен іскерлігі бір-бірімен қабысып жататын қызметтің зілбатпан салмағын көтеріп, талай жауапты қызметтерді абыроймен алып келеді. Ол 1996-2005 жылдары Сырдария ауданы «Агропромтехника» мекемесінің директоры болса, 2005-2011 жылдары Қызылорда қаласында «Корпорация Рестром ТС» жауапкершілігі шектеулі серіктестігінің директоры болды. 2011-2018 жылдары Қызылорда қаласында «Иман Ихсан» жауапкершілігі шектеулі серіктестігінің директоры қызметтерін абыроймен атқарды. Ал 2018 жылдан бастап Қызылорда облысы, Шиелі ауданы, Алмалы ауылдық округінің әкімі қызметін атқарып отыр.
      Жауапкершілігі мол, ұжыммен жұмыс жасай алатын, жұмыстың уақытылы әрі сапалы орындалуын ойлайтын азаматтың бос қарап отыратын уақыты да жоқ. Оның ұжымды ұйымдастыра алатын қабілеті жоғары. Қандай да болмасын мақсаттарына қол жеткізе біледі. Басшы ретінде атап өтер ерекшелігі қарамағындағыларға талап та қоя біліп, керек жерінде қолдай да білетіндігі. Тұрғындардың әлеуметтік жайғдайы да күнделікті оның бақылауында. Жолдарды жөндеу, көшелерді жарықтандыру, ауылдың толып жатқан басқа да маңызды істерін қатаң қадағалайды.
      - «Елді басқару ісі оңай емес. Мұнда зор жауапкершілік жүгі бар. Сол жердің үлкенді-кішілі мәдени, саяси, экономикалық өмірін жетік біліп, аймақты жан-жақты өрге сүйреу жолында шаруашылықтың отымен кіріп, күлімен шығуға тура келеді. Тұрғындардың үй-жайы, балалардың оқу мәселесі, көпшіліктің рухани өмірінің деңгейі бәрі-бәрі назардан тыс қалмауы керек. Қысқасы, елдің ішетін ас-суы мен жағатын көміріне дейін мойныңда болады. Осы мәселелерді күні-түні қаузап, дамыл таппайтынымыз рас. Басқарып отырған аумағыңның тыныс-тіршілігі бағытындағы атқарған, яки, алдағы уақытта орындалатын міндеттер туралы елге, жоғары басшылыққа есеп беріп, жан-жақтағы әріптестермен үзеңгі қағыстырасың. Осының барлығы биік біліктілік пен ұшан-теңіз тәжірибені қажет ететіні тағы бар. Сенім артқан ел көңілінен шығу, ел сүйіспеншілігіне бөлену әрине оңай емес. Қызметімді адал атқаруда әкемнен алған тәлімім мол. Әкем – Әбілда Асанұлы ауызы дуалы, елге сыйлы, тыңдата алатын, өзіне қарата алатын керемет жан еді. Көпбалалы жанұяда өстім. Барлығымызға бірдей қарап, қанаттыға қақтырмай, тұмсықтыға шоқтырмай өсірді. Әсіресе, «осы баламнан бірдең шығады» деп маған үміт артты. Аллаға шүкір, халықтың арқасында абыройымыз асқақтап келеді. Бірақ әкемнің елге жасаған жақсылықтарының тым болмаса 50 % пайызына да жетсем екен деймін», - дейді Әбілқасым Әбілдаұлы. Отбасында асқар тау әке, арқасүйер азамат, адал жар, Алланың берген 3 баласын өмірлік серігі екеуі тәрбиелеп олардан немелер сүйіп отыр. Үлкен ұлы – Мәмбетов Абай Әбілқасымұлы, ішкі істер министрлігінде полиция майоры, ортаншы ұлы – Әбілда Мұхтар Әбілқасымұлы, әділет министрлігіне қарасты, аға экспорт құрылыс саласында қызметкер, кенже баласы – Әбілқайырхан Әбілқасымұлы, құрылыс мамандығы бойынша білім алып жатқан 1-курс студенті.
      Иә, Әбілқасым Әбілдаұлы қай қызметте жүрсе де қажырлы еңбегі арқылы адамдардың алғысы мен ризашылығына бөленіп жүреді. Биік парасаттылығымен, ақыл-ой тереңдігімен көпке танымал азамат қашан көрсең де жайнап, жарқырап жүреді. Бұл – жүрегі адал, пейілі таза, өз ісіне мығым, жасандылықтан ада адамның ғана несібесіне тиесілі қасиет дер едік. Қарасаң көңіл тоятын, сөйлессең сөзіне, байыптасаң ісіне риза болатын осы бір азамат қашанда жұлдыздай жарқырап алыстан бірден көзге түседі. Оның адалдығы мен еңбекқорлығын кейінгілерге үлгі етуге болады. Азаматқа керегі, азаматқа лайығы осы ғой. Біз білетін Әбілқасым Әбілдаұлы осындай азамат! Осындай мықты басшы! Осылардың бәрі жүректі жарып шыққан ақ адал сөз. Азаматқа деген ризашылық сезім. Ал ол болса, ел сеніміне қылаудай да нұқсан келтірген емес. Қашанда сергек, қашанда батыл азамат белсенді достыққа, жолдастыққа адалдығын байқатып тұрады. Азаматтың бұл пейіліне разылық танытатындар қарасы да көп. Ақылды, арлы азаматтар өмірдің мәні елге, халыққа қызмет ету ғой. Біз әңгімелеген кейіпкер осындай тұғырлы тұлға. Жұртқа қызметі елеусіз қалып жатқан жоқ. Қайтарымы бар. Ол – ел-жұрттың өзіне деген алғысы мен селкеусіз сый-құрметі. Азамат үшін бұдан артық атақ-дәреже болар ма?!