Қасиетті қара жер аман болса, аналар жайлы әңгіме мәңгі таусылмасы анық. Адамзат баласының әдептілігі мен жан-дүниесінің сұлулығы ең алдымен балаға ақ сүт беріп, әлпештеп өсірген ана жүрегінің жылуынан басталады. Бала бойындағы ең жақсы қасиеттер де ең алдымен анадан тарайды. Оны барынша құрмет тұтып, қастерлеу әрбір баланың борышы. Ана махаббатын сөзбен айтып жеткізу мүмкін емес. Ананың мейірімі жан-жағына өзінің шуағын төгеді. Осы шуақпен жылынып, асыл ананың құшағында мейірім алып жүрген барша адамзат аналарды мәңгі ардақтап, аялай білсе, бұдан асқан бақыт жоқ шығар. Бүгінгі кейіпкеріміз Имангалиева Маржан Әбдірасылқызы аяулы ана, білікті қызметкер. Оңтүстік Қазақстан облысы, Ордабасы ауданы, Бөген ауылында дүниеге келген. 
      Білім – ақылдылық пен парасаттылықтың белгісі. Білімді адам – жарық шам секілді. Білімсіз – қараңғы түн сияқты. «Халықпен халықты, адаммен адамды теңестіретін нәрсе білім», - деп ұлы жазушымыз Мұхтар Әуезов айтқандай, еліміздің басқа мемлекеттермен экономика, мәдениет, саясат жағынан тең дәрежеде тұрып, олармен бәсекеге түсе алуы мамандардың білімді де білікті болуын талап етеді. Үздіксіз іздену, даму – бүгінгі күннің басты талаптарының бірі.
      Ата-әжесінің еркесі болып өскен Маржан Әбдірасылқызы бүгінде балалықтың тәтті естеліктерін сағына еске алады. Б.Кенжебаев атындағы орта мектепті 2004 жылы үздік бітіріп, қалаға оқуға аттанады. Мұхтар Әуезов атындағы Оңтүстік Қазақстан Мемлекеттік университетінде, Орталық Азия университетінде оқып, С.Сейфуллин атындағы Қазақ агротехникалық университетінде білімін жалғастырады. Қазіргі таңда экономика ғылымдарының магистрі, PhD докторант. 
      Алғаш еңбек жолын Алматы қаласындағы «Қазақ үні» газетінде редактор қызметінен бастаған. Телевизия мен газет – жалпы бұқаралық ақпарат құралдары болғанымен, өзіндік ерекшеліктері бар. Кейіпкеріміз бастапқыда іштей қобалжу болғанын жасырмады. Дегенмен, сенім артқан әріптестерімен тіл табысып, редакцияның алдындағы міндеттерді орындауға кірісіп кетеді. Газетте екі жылдай еңбек етіп, 2007 жылы Шымкент қаласына ауысады. «Айғақ» медиа-холдингінің алғашқы дикторы, бағдарламалар бөлімінің редакторы қызметін атқарады. «Інжу-Маржан», «Бізде қонақта» бағдарламаларының авторы әрі жүргізушісі болды.
      «...Өткірдің жүзі. Кестенің бізі. Өрнегін сендей сала алмас. Білгенге маржан, Білмеске арзан...», - деп сөз құдіретінің ғаламат құбылыс екеніне Ұлы Абайдан артық ешкім баға бере алмас, сірә. Өз заманында қара қылды қақ жарған Қазыбек, әділ төрелік айтқан Әйтеке, тура айтып туғанына жақпаған Төле бидің өзі даудың бетін де, жаудың бетін де сөз шеберлігімен қайтарды емес пе? «Адамдармен сөйлесе білу – бұл тауар. Мұндай өнер үшін мен бәрінен де көп ақы төлер едім» деген екен Дж.Рокфеллер. Жас та болса үлкен аудиторияны қаратып, өзін еркін ұстап, сөйлеу әлеуетінің мықтылығы мен күштілігін көрсете білді. Өз мамандығының, халықтың алдындағы жауапкершілікті сезінген кейіпкеріміздің бағдарламалары, дайындаған дүниелері әлі де телеарналардың алтын қорында сақтаулы. Сол кездері қосымша қызмет ретінде ірі компаниялардың баспасөз хатшысы болып та кәсіби шыңдалған.
      Маржан Әбдірасылқызы 2008 жылы Айғақ телеарнасынан облыстың атынан Алматы қаласында Халықаралық Медиа Форумға қатысады. Сол шарада жас журналисті Тұңғыш Президент Қорының директоры Дариға Нұрсұлтанқызы қызметке шақырады. Көп ұзамай жас аруды Алматыға алдыртып, «Қазақстан Республикасы Тұңғыш Президенті – Елбасы Қоры» Қоғамдық қорында бірнеше сала бойынша иық тіресе еңбек етеді. «Іс тетігі білікті маман қолында» екені бесенеден белгілі. Өз кəсібінің қыр-сырын жетік меңгерген Маржан Әбдірасылқызы білімді де білікті маман ретінде таныла біліп, лауазым биігіне сатылай көтерілген. Әрине, қызмет, жүрген ортаңның деңгейі жоғарылаған сайын қойылар талап, жүктелер міндет, атқарар шаруа да ауқымды болары заңдылық. «Қазақстан Республикасы Тұңғыш Президенті – Елбасы Қоры» Қоғамдық қорының жобалары мен қызметі қаншалықты маңызды екені айтпаса да түсінікті. Еңбек, тек адал еңбек қана абыройға жеткізетінін жас кезінен-ақ көңіліне тоқып, көкейіне түйіп өскен өрімдей қыз өзіне сеніп тапсырылған осынау міндетті үлкен жауапкершілікпен еңсере білді. 
      2012 жылы «Қазақстан Республикасы Тұңғыш Президенті – Елбасы Қоры» Қоғамдық Қоры жанындағы Әлемдік экономика және саясат институтының Н.Назарбаев орталығында жауапты қызметті қоса атқарды, осы уақыттарда Парламентте депутаттың көмекшісі де болды. Заман талабына сай жаңа бағдарламаларды игеріп, жұмыс тиімділігі мен сапасын арттыру міндетін басты назарда ұстады. Жауапты қызметтің ауыр жүгін арқалай жүріп, бойына біткен адамгершілік асыл қасиеттерден еш айнымай, Маржан Әбдірасылқызы өзінен кейінгі жас мамандарға білгенін үйретіп, бағыт-бағдар беріп, сауатты маман ретінде қамқорлық танытып отырады. Дана халқымыз «Алмас қанжарды жұмсақ қайраққа қайрайды», «түсі жылыдан түңілме» деп тегін айтпаған. Табиғатынан кішіпейіл, жүзінен шуақ шашып жүретін кейіпкеріміз байыпты да байсалды мінезі мен жұмыстағы табандылығының арқасында өз ортасына сыйлы, ұжымында зор құрметке ие. Ұлағатты жанның ел игілігі жолындағы атқарған еңбегі де елеусіз қалған жоқ. Әр жылдары облыс, аудан әкімінің мақтау қағаздарымен марапатталып, арнайы алғысқа ие болуының өзі еселі еңбектің жемісі деп түсінеміз. 
      Шәкірт тәрбиелеуге де өз үлесін қосып келе жатыр. С.Сейфуллин атындағы Қазақ агротехникалық университетінде телестудия меңгерушісі, Қаржы Академиясында аға оқытушы болып студенттерді білім нәрімен сусындатып, үлкен өмірге бағыттайды. Қазақстан Республикасы Парламенті Сенатының жанындағы жастар кеңесінің мүшесі. 2019 жылдың тамыз айында Қазақстан Республикасы Парламенті Сенаты Аппараты Сенат Төрағасының Хатшылығында бас кеңесші болып тағайындалады. Сол жылы күтпеген жаңалықтарға толы болады. Қазан айынан бастап, қызметі жоғарылап Қазақстан Республикасы Парламенті Сенаты Төрағасының кеңесшісі болады. Қызметте тұрақталып көп жылдар бойы жұмыс жасап келе жатқан бүгінгі аяулы ана әр қызметіне жауапкершілікпен қарайды. Өзінің кәсіби біліктілігін үнемі жетілдіріп отырады. Ұжымдастарымен қарым-қатынаста қарапайым, сыпайы және сыйлы. Өзінің сабырлы мінезімен әріптестерін баурап, жаңа келген мамандардың үйренуіне зор ықпал етіп, қоғамдық жұмыстарға белсене ат салысады. Көмек сұрай келген әріптестеріне уақытының шектеулігіне қарамастан түсіндіріп, қол ұшын созып, бағыт беріп отырады. Қызметтестерінің айтуынша Маржан Әбдірасылқызының тиянақты тірлігі мен білімі, сабыры мен асып-таспайтын қарапайымдылығы еріксіз сүйсіндіреді.
      Қайырымдылық пен қамқорлық қашанда қазақтың бойында бар қасиет. Кейіпкеріміз пандемия кезінде халықтың мұң-зарына қолдау көрсету мақсатында Қазақстан Республикасы Денсаулық сақтау Министрлігі Міндетті әлеуметтік медициналық сақтандыру қоры басшыларының кеңесшісі болып, әлемді шарлаған індет кезінде ауыр жағдайды көзбен көріп, қарапайым халыққа қолдан келгенше қолдау көрсетеді. Маржан Әбдірасылқызының тікелей тапсырмасымен ауруханалардың жағдайлары түзеліп, талай жанның өмірі сақталып қалғанын өзі айтпаса да айналасы біледі. Халық пен билік арасындағы көпір болып, әлеуметтік желі арқылы да ауыр жағдайларын жеткізген талай жанға, балаларға көмектесті. Қазіргі таңда Нұрсұлтан Назарбаев Қоры – Елбасы Академиясы директорының кеңесшісі қызметін атқарып, жастарға жол ашар талай жобаны басқарып, білім, ғылымның басы-қасында жүр. Елбасының тапсырмасымен «Елбасы жолы» экспедициясының жетекшісі ретінде жалынды жастарға өнеге көрсетіп, тарихымызды танытып, ел аралап өрелерін өсіруге ықпал етті. 
      Жетістікке жету – сарқылмас сабыр мен темірдей төзім әкеледі. Қайтпас қажыр-қайрат пен зор ізденіс және де ең бастысы өз ісіне деген шексіз сүйіспеншілік арқылы ғана қол жеткізер құндылық. Еңбек еткен адамның қор болмайтыны белгілі. Бүгінде өзінің еңбексүйгіштігінің арқасында бел жазбай еңбек етіп, ұжымның мақтанышына айналып отырған Маржан Әбдірасылқызының жеткен жетістіктері бір төбе. 
      Ол өзінің туып өскен ауылының, ауданының, елінің мақтанышы. «Ордабасы аруы – 2002» байқауының Гран-при иегері, осы ауданның алғашқы аруы. Телеарнада журналист болып жүргенде туған ауданына қатысты талай түйіткілді мәселені көтеріп, оң шешімін табуға күш салған. Оқуға құштар кейіпкеріміз жастайынан өнерге де қабілетті. Бала кезінен мектептің, аудан, облыстың білім, өнер сайыстарында жеңімпаз болған Маржан Әбдірасылқызы керемет дауыстың иесі. Көптеген байқауларға қатысып, мыңнан жүйріктердің ішінен топ жарды. «Шәмші әндері» фестивалі, «Арай» ән байқауы, «Нұрлы нөсер» фестивальдерінің лауреаты атанды. 
      Үлкен аудитория, кең сахнаның киесін білетін кейіпкеріміз республикалық, облыстық тележобалардың қатысушысы. Сол кездің өзінде «Хабар» арнасында өткен «Бұрымды ару» сайысының жеңімпазы деп танылған. Оның ғылыми-танымдық мақалалары республикалық, халықаралық басылымдарда жарияланып тұрады. 
      Кітап – адамзат баласының баға жетпес асыл құндылығы. Ғылымның қайнар бұлағы. Білім мен мәдениеттің биік белестеріне жетелейтін тәрбиелік құрал. Әлішер Науаи: «Кітап – ақылына ақы сұрамайтын алтын қазына» десе, Дени Дидроның «Адамдар кітап оқуын қойса, ойлауын да қояды» деген сөзі бар. Толстой өз кезегінде «Жақсы кітап оқу – ақылды адаммен сырласқанмен бірдей» деп пікір білдірсе, Абай атамыз: «Артық ғылым кітапта, ерінбе оқып көруге» деп шегелейді. Маржан Әбдірасылқызы жан азығынан, рухани байлықтан қол үзген емес. Қазақстан Республикасы Тұңғыш Президенті – Елбасы Қорының қолдауымен шыққан «Мұқағали», «Шер», «Жамбыл», «Темірбек Жүргенов» секілді көптеген кітаптардың редакторы. Қазақстан Республикасының Тұңғыш Президенті – Елбасының Интеллектуалды Павильонын әзірлеу жұмыстарына белсенді қатысты. Цифрлық сауаттылық – бүгінгі заман талабы. Ол 2010 жылы цифрландыруды Оңтүстік Кореяның Сеул қаласында оқыған. 
      «Ана – үйдің берекесі, бала – үйдің мерекесі» деген ғибратты сөз бар. Сол айтпақшы, білікті маман ғана емес, ең бастысы үйдің де, түздің де шаруасын бір кісідей дөңгелетіп жүрген аяулы ана. Ата-әжесінің тәлім-тәрбиесін, әкесі мен анасының мейірім, парасатын алған қаршадай бауырмал қыз бүгінде құрметті қызметкер, білікті басшы, аяулы жар, ардақты ана. Ұлттық «Мерейлі отбасы» байқауының жеңімпазы болып танылған Имангалиевтер әулетінің келіні, үлгілі отбасының ұйытқысы, ата-енесінің жолын жалғастырушы. Отбасының тірегі, белгілі ғалым Бауыржан Имангалиевпен бірге ұл-қыздарын тәрбиелеп отырған бақытты ана. Қыздары Ай Ару мен Адина анасының шуағы болса, ұлы Айбатыр оның қуаты. Осының өзі ана үшін баға жетпес байлық, теңдесі жоқ бақыт! 
      Мәртебелі қызметтің тұтқасын ұстап, ел игілігі жолында аянбай еңбек етіп жүрген адамдар жайында сыр шертудің өзі бір ғанибет. Бүгінгі әңгімемізге арқау болып отырған жан еселі еңбегімен абырой биігіне көтеріліп, білікті маман, тәжірибелі қызметкер атанған жан. Өрге жетелеген еңбек асуларын табандылықпен бағындыра білген бүгінгі кейіпкеріміздің өнегелі өмір жолы көпке үлгі. Маржан Әбдірасылқызының деніне саулық, бала-шағасына амандық, отбасына береке тілейміз. Еңбегіңіз жана берсін!