Жаңа заманның шырағы, береке мен ырыстың білте шамы тек тынымсыз еңбекпен, тың идеямен, адал іспен, кәсіпкерлікпен жанып, лапылдай түседі. Бұл адамзаттың тасқа кітап бетіне түсірген аксиомасы емес, бұл жаһандану дәуірінде, ғылым мен экономика жарықтың жылдамдығында қатты дамып келе жатқан бүгінгі таңдағы заманның тасқа қашап жазғаны. Сондықтан, берекесін кіргізіп, шаруасын шалқайтамын деген әрбір кәсіп иесі осы бір сүрлеумен жүруі заңдылық. Бір адам от жақса, мың адам сол оттан тараған жылумен жылынады. Бүгінде от секілді айналасына жылу шашып, қоғам дамуы үшін жомарттық таныту кез келген азаматтың қолынан келе бермейді. Ал «елім маған не береді деп емес, мен еліме не бере аламын?» деп ойлану, қоғам дамуы үшін игі іс жасау тек нағыз жігіттің ғана қолынан келетін іс. Өмірдің қай арнасына түссе де, қиындыққа мойымай, қайта қайнаудан шыныққан болаттай, қайрала түсіп, қайсарлана түсіп, алдыға сеніммен адымдап келе жатқан, кәсіпкерліктің көк бестісін тақымдап алған кәсіп иелерінің бірі, «Энергомера» ЖШС-і директоры Мұхашов Бекетай Төреахметұлы.
      Азаматтық арымен адами асыл қасиеттерді кәсібінен жоғары қоймаған Бекетай Төреахметұлы 1970 жылдың 8 наурызында Қызылорда облысы, Арал ауданында дүниеге келді. Сыр мен жыр толған Сырдарияның самалына балалық кекілін сүйдіріп өскен бала Бекетай кішкентайынан өзінің тілалғыштығымен, алғырлығымен, қағілез әрі шапшаңдығымен, бір істі бастауға ұмтылып тұратын өжеттігімен көзге түсті. Жарқын болашаққа бастайтын білім ордасының табалдырығын көршілес қонған аудан Әйтеке би кентіндегі Ыбырай Алтынсарин атындағы №421 мектепте аттап, осы іргелі білім ордасынан түлеп ұшты. 1987-1991 жылдары Бузулук гидромелиоративтік техникумын «Өндірістегі бухгалтерлік есеп» мамандығы бойынша тәмамдаған Бекетай Төреахметұлы араға жылдар салып экономикалық білімін көтеріп, 2004-2007 жылдар аралығында Қызылорда қаласындағы «Болашақ» университетінен «Экономика» мамандығын игеріп шықты. 
      Кәсіп ету, екі иығыңды жұлып жеп тұрмасаң, аузыңдағыдан айырылып қалатын бүгінгі заманда еңбек етіп, адал нан табу, бір істің көзін тауып, оны дамытып, шаңырағының ішін береке мен шаттыққа толтыру оңай іс емес. Оған да табандылық, ыждағаттылық пен уақытпен санаспай еңбек ету, ұмтылу, қызметкерлерге деген әділдік пен өз ісіне деген адалдық, жанұяға деген қамқорлық керек. Бірақ, әділдікті ту еткен әке тәрбиесі мен еңбексүйгіштік пен жауапкершілікті, имандылық пен мейірімділікті бойына сіңіре білген ана өнегесін үлгі еткен Бекетай Төреахметұлы қолына алған қай істі де иіріп алып кететін ер мінезді азамат. Экономикалық сауатты, қоғамда болып жатқан өзгерістерді бақылап, керек кезінде халыққа да жомарттық қолын соза білетін нар тұлға кәсіпкерлік саласында қызмет етіп келе жатқан жылдары абырой биігінен түскен емес. Бұл да болса кейіпкеріміздің өз ісінен береке көріп, жанындағыларға да көмек қолын созатын бойындағы қасиетінен болса керек.
      «Энергомера» ЖШС-і ашылған сәттен бастап және қазірге дейін көптеген маңызды нысандардың басы-қасында болып, құрылысын жүргізді. Атап айтсақ мектеп, балабақша, дәрігерлік амбулатория, саябақ, спорттық кешен, өнеркәсіптік аймақ, кәсіпкерлік нысан, жаңа тұрғын аймағы, халықаралық көлік дәлізі, «Батыс Еуропа – Батыс Қытай» нысандары, Арал теңізінің су-реттеу жұмысын электр қуатымен қамтамасыз етті. Солардың ішінде тілге тиек етіп, айта кететіні Қармақшы ауданы, Төретам кентінің «35/10 кВ №22 қосалқы станциясын кеңейту және қайта жаңарту» жобасы бойынша жоғары деңгейде жұмыс атқарылды және қолданысқа берілді. Жүйелі жұмысты көзбен көру үшін және қосалқы электр станциясының жұмысын бақылау үшін ҚР Энергетика министрі Нұрлан Ноғаев пен облыс әкімі Гүлшара Әбдіқалықова келіп, электр станциясының қайта жаңғырту жұмыстарымен танысты және ашылу салтанатына куә болды. Негізінен бұл – Ақай мен Төретамды электрмен қамтамасыз ету үшін қолға алынған жоба. Оған заманауи үлгідегі қондырғылар орнатылды. Соның ішінде баса айтатыны элегазды ажыратқыш, ашық тарату қондырғысын қайта жаңғырту, қуаттылығы 6300 кВА екі дана трансформаторлық қондырғысын орнату, вакуумдық ажыратқыш пен микропроцессорлық қорғаныс бар екі секциялық 10 кВА жиынтық тарату қондырғыларын орнату және жедел диспечерлік басқару пунктінің құрылысы жүрді.
      Табысты кәсіпкер Бекетай Төреахметұлы басшылығымен «Энергомера» ЖШС-нің соңғы екі жылда көптеген нысандарға құрылыс-монтаж жұмыстары жасалды. Халық игілігі үшін атқарылған жұмыстарға назар аударсақ, Қармақшы ауданы, Төретам кентінің 35/10 кВ № 22 қосалқы станциясын кеңейту және қайта жаңарту, Қызылорда облысы, Арал ауданы, Сексеуіл кентінде 300 орындық мектеп салу, Қызылорда облысы, Жаңақорған ауданы, «Налибаевтың Бақытжан» шаруа қожалығын электрмен жабдықтау, «Жаңа электрмен жабдықтау желілерін салу» (2 кезең), шағын ауданда жеке тұрғын үйлер салу кезінде. «Нұрлы көш» Ақтөбе облысы, Мұғалжар ауданы, Қандыағаш қаласы; Қызылорда қаласы, Ақсуат ауылдық округі, Наурыз елді мекенінде электрмен жабдықтау желілерін салу», Қызылорда қаласы СПМК-70 ауданындағы №2 тұрғын үй кварталының инженерлік инфрақұрылымының құрылысы.
      Мұхашов Бекетай Төреахметұлы – үлкен ұйымдастырушылық қабілетке ие, ол іскерлік жауапты міндеттерді шешуде әрқашан стандартты емес тәсілдерді таба алады. Ол үнемі өзін іскер басшы ретінде көрсетіп, батылдық пен принциптіліктің нағыз үлгісі бола білді. Қазалы ауданында өткізілетін қоғамдық іс-шараларға, қайырымдылық қорларға әрқашан үлкен бастамамен қатысады. Үнемі өзін жігерлі және іскер бастамашы ретінде көрсетеді. Ұжымда тек жоғары беделге ие, ұжымдағы қызметкерлерді ынталандыру жұмыстарына үнемі көңіл бөледі. Қызметкерлердің еңбегін және олардың жұмыс нәтижелерін объективті бағалайды. Еңбекті қорғау мәселелеріне ерекше көңіл бөледі. Мемлекеттік құрылымдармен іскерлік кәсіби байланыстарды оңай орнатады және қолдайды, қажетті іскерлік қатынастарды орната алатын кәсіп иесі.
      «Ер дәулеті еңбекте» деген ел экономикасының дамуына өз үлесін қосып, түрлі маңызы бар кешендерді күрделі жөндеуден өткізу, құрылыс жұмыстарын жүргізу саласында еңбек етіп, сапалы қызметін көрсетіп келе жатқан Бекетай Төреахметұлы түрлі мемлекеттік наградаларға ие болып, грамоталармен марапатталды. Атап айтар болсақ:
      ✦ 2010 жылы Қызылорда облысы «Нұр Отан» ХДП филиалы төрағасы бірінші орынбасарының «Құрмет Грамотасы»;
      ✦ 2015 жылы Қызылорда облысының кәсіпкерлік және туризм басқармасының «Алғыс хаты»;
      ✦ 2015, 2016 жылдары Қазақстан Республикасы Президентінің «Алғыс хаты»;
      ✦ Қазақстан сауда кәсіпорындарының «Сауда үздігі – 2018» республикалық байқауында «Үздік ОСО, СҮ, СО» номинациясы бойынша ІІ орын иегері;
      ✦ Қазақстан Республикасы сауда және интеграция министрлігінің «Сауда үздігі – 2019» республикалық конкурсында «Таңдаулы сауда – ойын-сауық орталығы кешені, сауда үйі» номинациясында ІІІ орын иегері;
      ✦ 2021 жылы Қазақстан Республикасы Энергетика министрлігінің «Құрметті энергетик» төсбелгісін алды.
      Мұхашов Бекетай Төреахметұлы «Энергомера» ЖШС-і басшысы қызметінде, өзін іскер, зор ұйымдастыру қабілетімен қатар аса сауатты майталман шеберлігі мен күрделі міндеттерді икемді тәсілдермен шешуді таба білетін маман иесі. Энергетика саласының күрделі әрқилы құрылыс-монтаж жұмыстарының атқарылу процесстерін жете қадағалап, озық технологиялардың енгізілуіне әрдайым атсалысатын кейіпкеріміз ұжымда және облыс көлемінде зор құрметке ие. Ол басқарып отырған ұжым энергетиканың құрылыс-монтаж жұмыстарын Қызылорда қаласы және облыстың барлық аудандарында, Ақтөбе облысының аудандарында да зор сенімге ие болып отыр.
      «Әр жетістікке жеткен ер-азаматтың артында жары тұрады» деген асылдан да қымбат сөз бар, азаматы ел қамында қызмет етіп жүргенде, шаңырағының шаттығын, әулетінің әрін кіргізіп, құтты мекенін оттан да ыстық етіп, ырысын шалқытып отырған аяулы жары Мұхашова Сәуле Мырзабайқызы қазіргі таңда «Шұғыла» балабақшасының меңгерушісі қызметін абыройлы түрде, үлкен жауапкершілікпен атқарып келеді. Ұрпақ жалғастыру – өмір сабақтастығы. Шаңырақтың ішін шаттыққа бөлеп, сәби жұпарын аңқытып келген тұңғышы – Мұхаш Әділет Бекетайұлы әке ізін басып, кәсіпкерліктің қыр-сырын меңгеріп, жеке кәсіптің тұтқасын ұстаған білікті маман. Қазір кезде ол басқарып отырған «ARY-SPA» сауықтыру кешені Қазалы ауданы халқына керемет көңіл-күй сыйлап, әрдайым жоғары қошеметке ие болып жүр. Келіні, үлкен ұлы Әділеттің аяулы жары Сержан Қымбат Қараманқызы отбасында ардақты келін бола білген ол, өткен жылдың қыркүйек айының 2-ші жұлдызы күні отбасына Айару есімді сәби сыйлап шаңырақты нұрға бөледі.
      Қызы – Мұхаш Айдана Бекетайқызы Абай атындағы педагогикалық университетін үздік тәмамдады. Қазіргі кезде Алматы қаласында өз білімін одан әрі жоғарылату үстінде болса, екінші ұлы Мұхаш Арсен Бекетайұлы қазіргі таңда Әл-Фараби атындағы Қазақ Ұлттық университетінің Заң факультетінің 1-курс студенті. Алдына қойған көп мақсаты бар зерек, ойшыл, алғыр азамат. Кенже қызы – Бекетайқызы Аруна Әйтеке би кентіндегі Ержігіт Бозғұлов атындағы №249 мектеп-лицейдің 7-сынып оқушысы әрдайым оқуда жоғары жетістіктерге жетіп отбасын, мұғалімдерін қуанышқа бөлеп келеді. Бекетай Айару Әділетқызы отбасының қуанышы, шамшырағы, алғашқы немересі.
      Түн қараңғылығын жарық еткен айдың нұры секілді, жер өз білігінде жақсы адамдардың игілікті істерімен, жомарт жандардың мейірімділігімен, қайырымдылығымен тоқтаусыз айналып келеді. Кеудесінде парсаттылық пен ұлағаттылықтың оты алаулап, таңдайға түскен тілегінде ел бірлігі, бейбітшілік пен толыққанды өмір жатқан, қолында барын бір ауада тыныстап отырған елмен бірге бөлісетін азаматтардың арқасында өмір – жылы, тіршілік – мағыналы, қоғам – тыныш болмақ. Міне, осындай, атадан туса да адамзаттың ұлы бола білген, бақ-дәулетті ел игілігі мен мүддесі үшін жинаған, кәсіпкерлігін әділдікке, имандық пен әділдікке тіреп, қоғам үшін ел үшін пайдалы іс жасау жолында еңбек етіп келе жатқан Бекетай Төреахметұлы сынды нардың жүгін артса да ауырсынбай көтеріп жүре беретін арқалы арда азаматтар барда, қазақ елінің болашағы жарқын болып, экономикасы қарыштап дами бермек. Бекетай ағамыздың деніне саулық, отбасына амандық, кәсібіне береке мен табыс тілейміз!