Француз философы Г.Мабли «Біздің бойымызға біткен қасиеттердің ішіндегі ең маңыздысы және ең ізгісі – парасат» - дейді. Қазақ қоғамында парасаттылық адам бойында кездесетін асыл қасиеттердің біріне айналып, адамгершілік пен өнегелілік тұрғысынан жоғары бағаланған. Иә, парасаттылық адамның бойындағы ең тамаша қасиет. Адамның ақылдылығы, білімпаздығы, мәдениеттілігі, көрегенділігі, зерделілігі, өмірден түйгені осыған келіп саяды. Біз әңгімемізге арқау еткелі отырған Айгерім Нығыметқызы өзінің инабаттылығымен, мейірімділігімен, белгілі бір ұстанымының болуымен, әр істегі талғамымен дара тұлға. Оның жұмысқа беріліп кірісетін қасиетінің өзі кейінгі жастарға үлгі боларлықтай. Қызметін жетік меңгерген, көп сөзден гөрі, іске жақын жан сөйлейтін әр сөзін ойланып, ақыл таразысына салып айтады.       Ауыз су тұтынушыға дейін жету барысында көптеген сатылардан, кезеңдерден, сынақтардан өтетіні белгілі. Солардың ең негізгісі, су жеткізудің жобасын әзірлеу жұмыстарына айрықша басымдық берілетіні түсінікті. Судың тағдыры сол жоба-сметалық құжаттарына байланысты болады. Су жеткізу жұмыстарының жобасын жасайтын өңіріміздегі таңдаулы, кәсіпорын ретінде қалыптасқан «ҚызылордаВодГазПроект» ЖШС-ның басшысы Нығыметова Айгерім Нығыметқызы жайында көп нәрсе айтуға болады. 
      Нығыметова Айгерім Нығыметқызы 1951 жылы 15 ақпанда Алтай жерінің Шығыс Қазақстан облысы, Қатоңқарағай ауданында дүниеге келген. 1958 жылы мектепке қабылданып, мектепті өте үздікке аяқтап шықты. Мектеп қабырғасында өзінің алғырлығымен, сурет салатын қабілетімен ерекшеленіп, мектеп мақтанышы болды. Мектеп қабырғаларына сурет салып жүретін, салған суреттері қабырға газетіне шығатын, тіпті портрет те салатын. Суретші боламын деп те армандаған жанның өнерге де таласы бар еді. Ән айтқанды жақсы көреді, музыканы жаны сүйеді. Осылайша, мектепті үздік бітірген жас түлек бірден-ақ еңбекке араласып, өзінің талпынысының арқасында ұжым ортасында инабаттылығымен, керемет ақжарқын мінезімен мақтаулы болды. Қызу еңбекте өзіндік орындары бар, еңбек тәжірибесі мол аға-апаларының жанында жүріп, ақыл-кеңестерін тыңдап, шыңдалған жас 1968-1970 жылдары өзі тұратын совхозда белсенді әрі беделді еңбек етті. 
      Өз саласында мақтаулы, мықты адамдардың ұрпаққа көрсететін үлгісі және адамдардың тәлім-тәрбиелігі, үлгілігі, саналығы ережелерінің жиынтығы ретінде көрінеді. Ұрпаққа өнеге көрсететін иманды, зерделі, инабатты кісілерден адамдар жақсылық пен қайырымдылықты, адамгершілік пен ізеттілікті үйреніп, оны өздеріне үлгі тұтады. Қазақ қоғамындағы ұлттық өнеге көріністері адамның бойында кісілік, инабаттылық, парасаттылық секілді асыл қасиеттердің қалыптасуына игі әсер ететін ұлттық тәлім-тәрбиенің қайнар көзі болып саналады.
      Құжаттарын қолына алып, арман жетегімен 1970 жылы Жамбыл гидромелиоративтік-құрылыс институтына оқуға түсіп, 1975 жылы толық курсты оқып, инженер-құрылысшы мамандығын алып шықты. 1975 жылы инженер-сантехникалық тобының Қызылордадағы «Южгорсельпроект» бөлімі, 1992 жылдан ол «ПроектСервис» ЖШС болды. 1980 жылы аға инженер қызметіне жоғарылап, 1964 жылы жетекші инженер, 1987-1992 жылдар аралығында топ жетекшісі болды. 1992-2002 жылдары бас маман болып осы аталған мекемеде қызмет етті.
      Ал 2001 жылдан бастап жеке кәсіпкерлікпен айналысып, «Нигметова» ЖК директоры болды. 2004 жылдан қазіргі уақытқа дейін «ҚызылордаВодГазПроект» ЖШС директоры қызметін абыроймен атқарып келеді. «Таза су», «Ауыз су», 2010 жылдан бастап «Ақ бұлақ» бағдарламаларымен жұмыс жасаған. Осы бағдарламалар арқылы облыс бойынша, яғни, Арал, Қазалы, Қармақшы, Тереңөзек, Шиелі, Жаңақорған аудандары бойынша біршама жұмыстарды атқарады.
      Осы қызметінің негізінде қол жеткізген жетістіктері де жетерлік. Атап айтсақ, «1982 жылғы Социалистік жарыстың жеңімпазы» белгісімен марапатталды. Сонымен бірге, оның омырауында бірнеше төсбелгілер жарқырап тұрғанын мақтанышпен айтуға болады. Қазақстан Компартиясы Қызылорда облыстық комитетінің, облыстық атқару комитетінің және Қазақстан комсомолы облыстық комитетінің Грамотасы. Еңбектегі жоғары көрсеткіштері үшін және қоғамдық өмірге белсенді қатысқаны үшін «Құрмет грамотасымен», «Ұлы Октябрь революциясының 71 жылдығына» орай «Құрмет грамотасымен» марапатталды. Сонымен қатар, Жаңақорған және Қармақшы аудандары әкімінің «Алғыс хаттары» бар. 2008 жылы «Құрылыс күні» кәсіби мерекесіне орай, Қызылорда облысы әкімінің атынан «Алғыс хат» алды. «Жыл көшбасшысы – 2014», және «Жылдың үздік көшбасшысы – 2015», «Қазақстанның Құрметті құрылысшысы» медалі бар. «Еңбек даңқы» ордені, «Қазақстан Республикасы Тәуелсіздігіне 20 жыл» мерекелік медалінің және Ұлттық сертификат иегері. 
      Әрдайым жауапкершілік жүгін терең сезінетін ол құрмет пен абырой биігінен көрініп келе жатқан жан. Ер азаматтың көтерер жүгін арқалап жүрген жан расында қандай марапатқа да лайықты. Ылғи да аянбай тер төгіп, елдің игілігі жолында қызмет көрсетіп келеді. Оның жайдары жүзінен жан дүниесінің сұлулығын бірден байқайсыз. Мінезі ақжарқын, кіммен болса да тез тіл табысып кететін білікті көшбасшы. Онымен болған уақыт барысында мұнда жұмыс істейтіндердің де үнемі тыным таппай ізденіс үстінде болатындығын байқауға болады. Расымен де, оның өмір жолы кейінгі жастарға өнеге боларлықтай. Өйткені, оның еңбекқорлығы ерекше. Өзімен әңгімелескен кезде адам баласын бақытқа жеткізетін тек ғана біліктілігі, өз жұмысына деген тиянақтылығы екендігін айтудан бір жалықпайды. Қандай қиындық болса да қабақ шытпай, сабырлылық танытып, биязы қалпынан айнымайды. 
      Тараз қаласында оқып жүріп, Қызылорданың жігітіне тұрмысқа шығады. Шығыстың қызы Оңтүстіктегі Сыр еліне келін болып түскен кезде салт-дәстүрінде, табиғатында өзгешелік көп екенін байқайды. Қазақы өлкеден өз бақытын тапқан жан осы елдің салтына да, дәстүріне де сіңісіп, үйренісіп кетеді.
      - «Хан болсын, қара болсын, адамгершілік деген асыл ұғымды естен шығармауымыз керек. Адам адамдығымен биік! Мансап мәңгілік емес, ештеңе де мәңгілік емес. Өз басым көппен бірдей қарапайым болғанды ұнатамын. Асып-тасып, менменсіп, әлдекімге дауыс көтере берудің өзі артық. Қызмет бабында түрлі жағдайлар орын алады. Алайда, артық-кем кеткен жерім болса, өзім бірінші болып түсінісуге тырысамын. Сонымен қатар, әр басшы өз ісінің білгірі, өз саласының кәсіби маманы болуы тиіс. Әркімді өз ішкі «Мені» жігерлендіріп тұруы керек деп есептеймін. Ішкі түйсігі терең, өзін де, өзгені де бағалай білетін қасиетке ие болса, кімде-кім болсын өз абыройын түсірмейді. Әркім өз тағдырын өзі қалыптастырады. Сондықтан, ретсіз сары уайымға салыну өмірге құлшынысты өлтіруі мүмкін. Әр адамның тыныш, бейбіт өмірде оянуы оның ең бақытты сәті деп ойлаймын. «Көп сөзден мағыналы іс артық», - дегенді өмірлік ұстанымым етіп еңбектеніп келемін. Нәзік жанды барлығына үлгеруі керек деген ұғым да бар. Алайда мені, менің еңбегімді бағалай білетін отбасым бар. Аллаға шүкір, отағасымен бірге екі ұл тәрбиелеп, өсірдік. Тәп-тәтті немерелеріміздің қызығына тоймай, күніміздің қалай өтіп кеткенін де байқамаймыз. Алла адамға бақ берсе, үйіп-төгіп береді. Менің байлығым – отбасым, сонан соң сүйікті жұмысым», - дейді кейіпкеріміз. 
      Иә, әрбір адамның өзіне ғана тән ғұмыр жолы, тіршілік баяны болады. Соның ең маңыздысы еткен еңбегінде, татқан зейнетінде, алған асуында, жеткен биігінде екені анық. Көптің адам бойынан іздейтіні адами келбет, әдемі қасиет. Өзінің өнегелі өмір соқпағында сыйластық пен достықтың ұлағатын ұлықтап, үлкенге құрмет, кішіге ізет болар ұлттық салт-дәстүрлерді үкілеп келе жатқан Айгерім Нығыметқызы көпшіл жан. Сырлас-пікірлес достары да көп. 
Бедел биігіндегі жанға мықты денсаулық пен отбасы байлығын тілейміз!