Елге ел қосылса – құт… Иә, осы бір қанатты сөздердің астарында қаншама мән, қаншама мағына, бастысы өз Отаныңа деген өшпес махаббат жатыр. 
      Қазақ елі талай-талай оқиғалардың куәсі болған ұлан-ғайыр дала мен құзар шыңның, асқар таулардың куәсі. Қазақтың кең байтақ жері – біздің сан буын бабаларымыздың кір жуып, кіндік кескен жері. 
      Қазақ жері – атадан қалған байтақ мұрамыз, баға жетпес байлығымыз, алтын босағамыз. 
      Қазақ халқы – тамырын жеті қабат жер астына жіберген бәйтеректей, өзегін тарихтың тереңіне тартып, осынау қасіретті де қасиетті дарқан даласынан табан аудармай, дауылдармен алысып, тағдырымен қарысып, өсіп-өркендеп келе жатқан жаужүрек те жасампаз халық. Бұл сөздерді айтуымыздың өзінде үлкен мән жатыр себебі, осынау сөздердің мән-мағынасын жіті түсініп, жүрекпен сезініп, туған өлке Отанымызға оралып, ел игілі үшін аянбай еңбек етіп жүрген азаматшалардың бірі – Ерсейітова Шахарман Әбілқасымқызы бүгін біз сөз ететін жарқын кейіпкеріміз. 1962 жылы Өзбекстан Республикасының Хорезм облысы, Үргеніш қаласында туып-өскен. Шахарман ханым көпке үлгі-өнеге боларлық отбасында тәрбиеленген. Сөзіміздің дәлелі кейіпкеріміздің әкесі Әбілқасым Құрманұлы кішкентай кезінен ата-анасынан айырылса да, қоғамда, өмірде өз орнын тапқан, халыққа адал қызмет ете білген тұлғалардың бірі болған. Ұзақ жылдар бойы Хорезм облысында экономика саласында басшылық қызметінде жұмыс істеп, Әбілқасым мырзаның бастамасымен өзі тұратын Прогресс кенті жыр алабы Жамбыл Жабаев атындағы кент болып өзгереді. Ер азаматқа лайық, ел азаматының жүгін арқалап, өз тілінде алғаш Хорезм қаласында қазақ тілінде оқытатын мектеп ашады. Бұл мектептің түлектерінің басым дені: қазақ, орыс және өзбек тілдерін еркін меңгеріп шыққан азаматтар.
      Үргеніштегі қазақ мектебінің түлектері бүгінгі таңда еліміздің Оңтүстік өңірі Алматы, ел астанасы Нұр-Сұлтан, көне тарихи қала Тараз, шұғылалы Ақтау, кенді Қарағанды қалаларында өмір сүріп, қызмет етуде.
      Шаһарман ханым мектеп табалдырығын тәмамдағаннан кейін Ташкент мәдениет институтында дәріс алып, біраз жылдар бойы Ташкент қаласында орналасқан Мемлекеттік әлем тілдер университетіндегі ғылыми кітапхана директорының орынбасары қызметін абыроймен атқарады. Атажұртқа оралу кімнің болсын көкейінде маза бермейтін асыл армандардың бірі десек артық айтпағандығымыз болар. Ұзақ жылдар бойы аңсаған арманға қол жеткізу көптің қолынан келе бермейтін үлкен іс. Міне, осы бақытқа кенелгендердің бірі Шахарман ханым. Кейіпкеріміздің айтуы бойынша: отбасыммен, Отаныма оралып, өз еліміз үшін еңбек етсек деген арман көкейімізде болғанмен, «көзіміздің тірісінде бұл бақытқа қол жеткізеді екенбіз деп ойлаған емеспін», - деседі. Бұл бақытқа Шахарман ханым 2007 жылы мемлекеттік квота бойынша жанұясымен бірге еліміздің Батыс өңірі Атырау қаласына, жолдасы Абдулла, қызы Айсұлу және екі ұлымен оралып қол жеткізеді. Кейіпкеріміз Батыс өңірі Атырау қаласына көшіп келу туралы шешіміне бір сәтте өкінбегенін жасырмайды. Шахарман ханым мен Абдулла мырзаның ұлдары бүгінде ел игілігі үшін қызмет атқаруда. Үлкен ұлы Нұрсұлтан Қазақстан Республикасының қаржы Министрлігінің Мемлекеттік кірістер комитетінде еңбек етсе, ал кіші ұлдары Ислам көліктік бақылау инспекциясында жұмыс атқарады. Қазіргі күні кейіпкерімізді ақ жаулықты әже атандырып отырған Айзере, Хантөре, Алихан есімді үш немересі және Жұлдыз есімді келіні бар. Қызғалдақтай қыздары Айсұлу тұрмысқа шығып, екі баланың анасы атанып отыр. Бүгінде Шахарман ханымның жұбайы Абдулла мырза «Жұмыспен қамту - 2020» бағдарламасымен 3 гектар жерді мемлекеттен жалға алып, бақшалық өнімдер өсірумен айналысуда. Ескере кететін ерекше жайт, Шахарман ханымның тек өзі ғана емес отбасы мүшелері де қоғамдық шараларға белсене қатысып, қолдарынан келгенше көмек қолын созып атсалысып жүретіндері бар. Сөзіміздің дәлелі, кейіпкеріміз отбасымен «Атырау адалдық алаңы» жобасы аясында ұйымдастырылған «Парасатты отбасы» облыстық байқауына қатысып, жүлделі ІІ орынды иеленді. Жалпы байқаудың мақсаты отбасы құндылықтарын ұлықтау, құқықтық сауаттылықты арттыру, патриотизмді қалыптастыра отырып, ел азаматтарын оның ішінде, болашақ ұрпақ жас өрендерді ынталандыра түсу. Бұл жоба аясындағы мақсат өз деңгейінде жүзеге асқан сыңайлы. Кейіпкеріміз әлеуметтік желілерде, қоғамдық ортада ұйымдастырылған іс-шараларға, челлендждерге де белсене қатысып отырады. Сонымен қатар, Шахарман ханым жас өрендермен етене жақын тіл табысып, заман көшіне ілесіп жұмыс атқара білетіндігіне таңырқай қарайтындар аз емес екендігін де жасырмаймыз.
      Кейіпкеріміз Шахарман ханым Отанымызға оралғаннан кейін қол қусырып, қарап жатпай, игі істер атқару аясында, қазақ бауырларының арасынан табылу мақсатында, аты аңызға айналған қазақтың батыр қызы ұшқыш Хиуаз Доспанова атындағы коғамдық бірлестігін құрып, жетекшілік етіп келеді. «Хиуаз» қоғамдық бірлестігі Атырау облысында 2013 жылы заңды түрде құрылған. Қоғамдық бірлестіктің басты мақсаты - Қазақстан халқының салт-дәстүріне сай мәдениет пен мемлекеттік тілін өркендету, қоғамда әйелдердің белсенділігін арттыру болып табылады. Үкіметтік емес ұйымдар мүшелері елдің нағыз патриоттары. Шахарман ханым 2010 жылдан бастап Іскер әйелдер қоғамының белді мүшесі, мемлекет кейіпкеріміздің қоғамдағы белсенділігін бағалап, тәуелсіздік күніне орай Елбасы Нұрсұлтан Назарбаевтың «Алғыс хатымен» марапатталып та үлгерді. Бұл марапатты облыс әкімі Бақтықожа Ізмұхамбетов өзі табыстады.
      Ел көңілінен шығып үлгерген «Хиуаз» қоғамдық бірлестіктің 7 жыл тәжірибесі бар: қазақ халқының салт-дәстүр, әдет-ғұрып оқу орындарында колледж, мектептерде Наурыз мерекесінде қолөнер, шеберлік сағаттарын облыстық шараларда дәріптеуде белсенділігін көрсетеді. «Қызға қырық үйден тию», «Тәрбиенің тал бесігі» қыздарымызды қазақи дәстүрде ізеттілікке, ибалылыққа баулып, олардың бойына туған жерге, өз ұлтына деген сүйіспеншілік сезімін сіңіру бағытында жұмыс жасайды. Осы тұста, жастарды ұлттық қолөнерге баулу бағытында «Қолөнер» үйірмесі құрылды. 
      Қоғамда үлкен рөл атқаратын, енелер мектебі - отбасылық құндылықтарға ерекше маңыз беріп, отанасының мәртебесін дәріптейтін жағымды іс-шараларда белсенділік танытатын қоғамдық ұйым. «Әжелер» фольклорлық ансамблі құрамында 16 құрсақ көтерген батыр аналарымыз – ұмытылып кеткен халық әндерін дәріптейді. Зейнеткер Бисенбаев Тұрлан - жырау домбыра үйірмесінің жетекшісі. Ұлттық музыкалық домбыра аспабын ұлықтау, балалардың ән-күй тыңдау арқылы әуендік сезімталдығын арттыру, өнер иелерін құрметтеуге тәрбиелейді. Жас маман Игамбердиева Жұлдыз «Сурет» үйірмесіне жетекшілік етеді.
      2018 жыл «Хиуаз» қоғамдық ұйымы үшін берекелі жылдардың бірі болды. Себебі, Атырау облысы әкімінің жанындағы әйелдер істері және отбасылық-демографиялық саясат жөніндегі комиссияның шешімімен Атырау облысы, Ауыл әйелдерінің І слетінде «Үздік үкімет емес ұйым» номинациясымен «Хиуаз» қоғамдық бірлестігі марапатталып, құрамында еңбек етіп жүрген аналарымыз бен қаракөз қыздарымыздың еңбегі өз кезегінде бағаланды.
      Бұл ұйымнан бөлек Шахарман ханым 2015 жылдан бері Саламат Мұкашев атындағы Атырау политехникалық жоғары колледжінің кітапхана меңгерушісі қызметін атқарып келеді. Кітапхана қызметінде ел тәуелсіздігінің маңызын жас ұрпаққа насихаттау, түсіндіру, жастарды ұлтжандылыққа тәрбиелеу мақсатында көптеген шаралар ұйымдастыруымен де кейіпкеріміздің есімі елге танылып жүр. 
      Еңбектің еленгені болар Шахарман ханым бірнеше мадақтау мен мақтау, алғыс хаттардың иесі атанып жүр. Бұл да бір көңілге ерекше демеу көрсетерлік дүниелердің бірі деп білеміз. Айта өтсек, кейіпкеріміз 2011 жылы ҚР Тәуелсіздігінің 20 жылдығына арналған облыстық «Қазақтың қол-өнері» мәдени шарасының «Алғыс хат» иегері атанса, 2012 жылы Дүниежүзі қазақтар қауымдастығының Атырау филиалының Наурыз мерекесіне орай ұйымдастырылған облыстық шарадан «Алғыс хат» иемденді.      2012 жылы ҚР Тәуелсіздігінің 20 жылдығына арналған Кеңөзек аудандық әкімшілігінен арнайы «Алғыс хат» алса, 2013 жыл Облыстық VI Азаматтық Форум аясында өткізілген әлеуметтік маңызды жобалар байқауынан Атырау облыстық ішкі саясат басқармасының басшылығынан «Алғыс хаттың» иегері атанды.
      2017 жылы VII Облыстық Азаматтық форумдағы үкіметтік емес ұйымдардың жобалар жәрмеңкесіне қатысқаны үшін дипломмен, 2018 жылы VIII облыстық Азаматтық форумдағы үкіметтік емес ұйымдардың жобалар жәрмеңкесіне қатысқаны үшін дипломмен марапатталады. 2018 жыл. «Ұлттық мұралар-ұрпақ қазынасы» атты шараға жастардың ұлттық құндылықтары мен мәңгілік мұраларды танып, рухани тұрғыдан жетілуіне, ел келешегінің туын көтерер жалынды жастарды тәрбиелеуге үлес қосқаны үшін Атырау қаласы әкімінің тарапынан «Алғыс хат» иемденсе, 2018 жылы Елбасы Н.Назарбаевтың «Болашаққа бағдар: Рухани жаңғыру» бағдарламалық мақаласы аясында Атырау төрінде өткізілген «QAZAQ FEST-2018» этнофестивалінде ұлттық құндылықтарымызды дәріптеуге қосқан зор үлесі үшін бірлестігіміз «Алғыс хатпен» Атырау облысы жастар саясаты мәселелер басқармасынан марапатталады. Атырау облысы І слетінде 2018 жылы Атырау облысы әкімінің жанындағы әйелдер істері және отбасылық демографиялық саясат жөніндегі комиссиясының қорытындысында Атырау облысы бойынша жылдың «Үздік үкіметтік емес ұйым» номинация жеңімпазы болып Ерсейітова Шахарман Әбілқасымқызы марапатталады. Нұр-Сұлтан қаласы 2019 жылы Қазақстан Республикасы Ақпарат және қоғамдық даму министрлігі Д.Абаев Үкіметтік емес ұйымдарға арналған сыйақының лауреаты «Мәдениет пен өнерді дамыту» номинациясы бойынша «Хиуаз» қоғам бірлестігі марапатталды. Міне, кішкене ауыл ішінде құрылған қоғамдық ұйымның дүйім жұртқа атауы тарап, болашақ жастар қыз-келіншектер үшін пайдасы зор екендігі дәлелдене түскендей.
      Қазақ қызына тән инабаттылық пен ибалылықты бойына жиып, жан дүниесіне нәзіктік пен имандылықты толтырып, мойнына жауапкершілік пен сабырлылықты арқалаған ерекше жан Ерсейітова Шахарман Әбілқасымқызы. 
      Сізге, сіз негіз болып отырған «Хиуаз» қоғамдық ұйымына тәнті болып отырғанымызды жасырмаймыз. Өзіңізге әлемдегі барлық жақсылықты тілеп, ғұмырыңыздың арайлы да шуақты шақтары мол болсын дегіміз келеді. 
      Отбасыңызға амандық, қызметтік жолыңыз-
ға табыс, қоғамдық ұйымыңызға шығармашы-
лық шабыт тілейміз!