«Ел үмітін ер ақтар, ер сенімін ел сақтар» деген әдемі сөз бар ғой қазақта. Ер азамат туып-өскен жерін көркейтіп, оның гүлденуіне үлес қосуды өзінің азаматтық парызы екенін түйсініп, сол жолда еңбектенуге тырысатыны рас. Қандай бір шақ болмасын елімен бірге қуанып, елінің қайғысына қалқан болып, елдік істерге сүйеу болып жүретін азаматтарымыз арамызда баршылық. Әңгімемізге арқау болып отырған сырбойылық азамат Мінуар Қапановтың есімі аймағына тегіс таныс. Парасат-пайымы келіскен, қызмет еткен жерлерінде биік беделі бар, қолы ашық, жомарт берегендігімен де, алысты болжап, әрнәрсенің жайын білетін көрегендігімен де көптің көңілін тауып жүретін азамат. Өзім деп іш тартқан адамнан көмегін аямайтын жан сырт көзге қатал көрінгенімен жүрегі баладай ақ. Өзінің шама-шарқынша қайырымдылық жасаудан жалықпайтын, қалтасындағысымен бөлісуге дайын тұратын қарапайым азаматты жан-жағы сыйлап, құрметтейді. Қандай да бір келелі іс болса ақылдасып, кеңесін тыңдайтындар көп. Басқаның өзінің орнына қойып, жағдайды түсіне де білетін нағыз сегіз қырлы бір сырлының өзі. Жан-жағына, туған-тумасына жайлы. Әрдайым өзгеге жақсылық тілеп жүреді. Ал сонысы өзіне еселеп қайтып та жатады.
      Иә, әркім өз туған жерін жұмақ мекенім дейді. Қандай қызметте жүрсе де еліне пайдалы іспен көрініп, ортасына жарық нұрын шашып тұратын Мінуар нағыз азаматтың өзі. Өйткені, онда азамат бойындағы құнды қасиеттер ана сүті, әке қаны, туған жердің топырағы арқылы дарыған. Оның күні бүгінге дейін жеткен жетістіктері мен биік белестері жылдар бойы жинақталған құндылық деуге болады.
      Қапанов Мінуар 1954 жылы 1 желтоқсанда Сырдария ауданы, Жетікөл ауылында қарапайым отбасында дүниеге келді. Қатарластары секілді бала жасынан еңбекке жақын, оқу-білімге де құштар еді. Ол 1971 жылы Сырдария ауданы, Аманкелді совхозында №42 Ленин атындағы мектепте оқып, ұлғатты ұстаздардан білім алып шықты. Қатарластарының арасында белсенділігімен, ұйымдастырушылық қабілетімен дараланып, көзге түсіп, мақтау естіп жүретін. Мектептің қоғамдық іс-шарасынан да тыс қалмайтын. Үнемі бірінші болуға талпынып, тапсырылған істі жауапкершілікпен атқаратын. Оның табандылығы мен қайтпас қайсарлығы болашағында да биіктерге жетеледі. Мектеп бітірген жас түлек 1971-1972 жылдары Қызылорда қаласындағы «Жилстрой» құрылыс басқармасында жұмысшы болып өзінің алғашқы еңбек жолын бастады. Жас болса да жаңа ортада өзінің елгезектігімен ұжымға сіңіп кетті. Жаңа ғана еңбек жолын бастаған жасқа аға мамандар да барынша қамқор болып, өздерінің тәжірибелік тәлімдерін үйретіп, ақыл-кеңестерін берді. Арманы асқақ, мақсаты белгілі жас 1972 жылы Жамбыл гидромелиоративтік құрылыс институтына оқуға түсті. 1997 жылы жоғары білімді инженер-гидротехник мамандығын ойдағыдай аяқтап, 1977 жылы «Союзгипрорис» жобалау институтының топ жетекшісі, жетекші инженер қызметтерінде болды. 1989 жылы осы бөлімшенің жабылуына байланысты «Қызылордамелиорация» құрылыс пайдалану өндірістік бірлестігінің құрамындағы жобалау-іздестіру бөлімшесінде 1995 жылға дейін жетекші инженер, жобаның бас инженері, 1995-2002 жылдары бөлімшенің жабылуына байланысты Қорқыт Ата атындағы Қызылорда мемлекеттік университетінің мелиорация-гидроэкология кафедрасында аға оқытушы болып қызмет атқарды. 
      Оқытушылық қызметте ол нағыз шәкіртжанды азамат ретінде танылды. Саласы бойынша білімденген жастар онымен жақын пікірлес болып алатын. Қарапайымдылықты жақсы көретін азамат ешуақытта басқаға себепсіз дауыс көтермейді. Тіпті күрделі жағдайдың өзінде түсініп барып, шешім қабылдайтын жан. Адам жанын жақсы түсіне алатындықтан онымен сырын бөлісетіндер көп. Қатарластары да, жастар да онымен ақылдасып отырғанды жақсы көреді. Қызмет бабында да жайлы азамат көпжылдық қызметінде талай жақсы, жайсаңмен дәмдес, дастарқандас болды. Өміріне жақсы жолдас боларлық жандар жинай білді. Сыйластықты, шынайы қарым-қатынасты қатты бағалайды, адалдық пен әділдікті жақсы көреді.
      Білімді де білікті азамат 2005 жылы Қазақстан Республикасы ауылшаруашылығы Министрлігінің «Алғыс хатымен», 2006 жылы облыс әкімі және облыс мәслихатының «Құрмет грамотасымен» марапатталды.
      Ол 2002-2003 жылдары жеке кәсіпкерлікпен айналысты. 2003-2020 жылдары облыстық мемлекеттік «Қызылордасушаруашылығы» кәсіпорнында су шаруашылығы жүйелерін жөндеу және жобалау бөлімінде жобаның бас инженері, директордың орынбасары болып қызмет атқарды.
      Мұндағы қызметінде де үлкен-кіші әріптестерімен бір отбасының адамдарындай жақын болды. Қандай жағдай болмасын жандарынан табылып, қажетті жерінде қатты айтып, жастарға ұстаз бола білді. Қаланың қоғамдық тыныс-тіршілігін назарынан тыс қалдырмай, өзіндік үн қосып отыратын азамат, жаңалықтың жаршысындай деуге болады. Себебі, ол жергілікті және республикалық басылымдарды жаздырып алып оқып отыруды әдетіне айналдырған. Тіпті ұжымдастарын да баспасөз науқаны кезінде бір ауыздан ұйымдастырып, газет-журналға жаздырып, әрдайым ақпарат саласын қолдап отыратын. Шығармашылық жағына да бір бүйрегі бұрып тұратын Мінуар ағамыздың болмысы міне, осындай. Ол бір ғана жұмыспен қарап отырғанды ұнатпайтын, тынымсыз, еңбекқор азамат. Ауырдым, шаршадым дегенді сирек айтады. Онда да «Ауруды еркелетпеу керек!» деп қайсыбір маусымдық ауруларға қасқайып қарсы тұратын қызық мінезі бар. Яғни, ол аурумен бетпе-бет күресе біледі. Күліп жүріп, ас тамағын ішіп, «Болды, мені мазалама, мен ауырмаймын!» деп өзіне-өзі күш-қуат шақыратыны бар. 
      Иә, оны қатарлас, замандастары ғана емес, жастар да қатты құрметтеп жатады. Сондағысы оның бойындағы адамгершілік қасиетінің жоғарылығынан ба дейсің?! 
      70 жасқа әне-міне дегенше жетіп қалған Мінуар Қапанов ағамыз әлі де қоғамдық жұмыстардан қол үзген жоқ. Қажет кезінде шақырған жерлерге барып, өзінің ой-пікірін білдіріп отырады. Елдің жағдайына қатты алаңдайды. Жастарға көбіне жанашыр екенін байқауға болады. 
      Алла қосқан қосағы Исатаева Мадинамен бірге өнегелі отбасында ұл-қыз тәрбиелеп өсіріп отырған бақытты жан. Мадина жеңгей де ағамызға сай жан. Қабағы ашық, әрдайым қонақ күтуден жалықпайтын, дастарқаны жаюлы, босағасы кісіден арылмайтын жанды барлығы жақсы көреді. Үлкен қызы Ақмарал 1982 жылы туылған. Ұлы Ұзақ 1985 жылы туылған. Мәншүк қызы 1987 жылы туылған. Алтынай қызы 1989 жылы туылған. Барлық баласына тәлімді тәрбие беріп, өздері қалаған жоғары оқу орындарында оқытып, жақсы маман етіп, құтты орындарына қондырған бақытты азаматтың ендігі арманы елдің тыныштығы, Қазақ елінің амандығы. Өзіңіз де аманшылықта болып, 100 жасаңыз!