Қазақтың сайын даласының бір бөлшегі, шоқтығы биік Алатауды түрлендіріп, әрлендіріп, сұлуландырып тұрған шығыстан атқан күннің нұры мен жер бауырлап ұшып нөсерлетіп өткен жауын секілді, өзі таңдаған сала бойынша қызмет етіп, ата-анадан тәлім алса да адамзаттың, дүйім жұрттың қамын ойлаған ел ағалары, парасат биігінде кісілігімен, кішілігімен тұрақтап қалған азаматтар баршылық. Олар өздерін қоғамның бір мүшесіміз деп есептесе де, атқарған ісі мен айтқан сөзінде, бүлкілдеп жатқан көмейінен ағып түскен өнегеге толы күміс сөздерінде елдің амандығы, қоғамның бірлігі мен ұлттық болмысы жатыр. Өз ісіні адал, әрі жауапкершілікпен атқарып жүріп те қоғамның ілгерілеуіне, экономиканың дамуына, халықтың әлеуметтік жағдайының көтерілуіне себеп болып келе жатқанын бәлкім, өздері байқамайтын да шығар. Бірақ, көп жылқының ішінде тұнық судың өзін жүзіп жүріп ішкен тұлпардай көзге ерекше көрініп, бойында менмұндалап тұрған адами асыл қасиеттерімен құрмет төріне көтеріліп, уақытпен санаспай, еткен еңбегінің арқасында ел алғысына бөленіп келеді. Міне, осындай аталар аманатын арқалап қауіпсіздік саласында қызмет етіп, кейіннен өмірлік өнегесі және мол тәжірибесінің арқасында басшылық қызметтерді атқарып келе жатқан нарқасқа азаматтарымыздың бірі – Ахетов Абай Қаниұлы.
      «Тура ағаш – үйге тіреу, тура жігіт – елге тіреу» демекші, өмірдегі өнегесімен, адамгершілік қасиеттерімен төңірегіндегілердің сый-құрметіне бөленіп жүрген, тындырымды еңбегі мен адал ісі қызметтес әріптестері мен кейінгі ұрпақтарына әрдайым үлгі болып келе жатқан Абай Қаниұлы 1965 жылдың 4 мамырында Қызылорда облысы, Шиелі ауданы, Керделі ауылдық округінде дүниеге келді. Әкесі – Ахетов Қани Қызылорда пединститутын бітіріп, мектеп директоры, ауылдық советтің төрағасы қызметтерін атқарған педагог болса, анасы – Жакипова Сапия, Қызылорда пединститутын бітірген. Жоғары білімді математик, КСРО және ҚазКСР халық ағарту ісінің үздігі, зейнеткер. Шиелі ауданы, Қарғалы елді мекенінің тұрғыны.      Туған жер туралы айтсақ, арқаланып кететін қазақ емеспіз бе, бүгінгі көпшіліктің алғысы мен марапатына бөленген кейіпкеріміз де талай ғасырдан тамыр тартып, бейбітшілік пен татулықтың, берекенің бастауы болып ағып жатқан Сырдарияның төменгі ағысындағы, рухты ел, жан-дүниесінен туындаған жырларында ұлттың болмысы жатқан қасиетті топырақта балалығын өткізді. Алаштың анасына айналған сыр мен жырға толы өңірдің топырағында балалық табан ізін қалдырып, 1972 жылы Шиелі ауданы, Қарғалы ауылындағы №241 Қ.Әбдіқадыров атындағы қазақ орта мектебінің табалдырығын аттаған бала Абай мектептегі белсенді оқушылардың бірі болды. Түн қараңғылығында жарық нұрын шашқан ай секілді болған білім жолында алғырлық танытып, өзінің ұйымдастырушылық және алғырлық қабілетін таныта білген жас ұстаздарынан да жақсы баға ала білді.
      1982 жылы өмірге қанаттандырған мектебін үздіктер қатарында тәмамдаған Абай сол кездегі саясаттың жетегіне еріп, Қарғалы ауылында жұмысшы болып орналасты. Еңбекке ерте араласқан жанға мектеп бітіре сала қара жұмысқа кірісіп кету қиындық туғызып па...?! Кішкентай кезінен үй шаруашылығында әкесіне қолғабыс танытып, сол кісінің үйретуімен шаруаға ептілігі мен икемділігін арттыра түскен Абай бұл шаруашылықта да өзіне сеніп тапсырылған жұмысты үйіріп алып кетті. «Соқаның жүзін жалтыратқан, көктемгі егістік алқабы» болса, жұмыр жүректі пенденің жүзін жарқыратып, алға ұмтылу мен ертеңгі күнге деген ұмтылыс, өмірге деген іңкәрлік пен құштарлық сыйлайтын, ол – еңбек. Әке тәлімімен адал еңбек етуді құлағына құйып, жұмыс барысында да әке сөзінен таймаған Абай осылайша тіршілік диірменінде айналып кете барды.       Бір қозы туса, жерге бір уыс жусан артық шығатыны секілді, тамырында қан айналып тұрған әрбір жүрек иесінің ешкімге ұқсамайтын тағдыры, өзіндік ерекшеліктері, таланты мен тақа салса да қайтпайтын талабы болады. Мектеп бітіре сала өмір арқанының бір тіні жұмысшы болып бастаумен өрілген Абай Қаниұлы жұмыс жасай жүріп, Кеңес әскері қатарында Отан алдындағы азаматтық борышын өтеп келді. Азамат болып туылған әрбір жан үшін бұл да үлкен мерей. Қатардағы жұмысшы бола жүріп, әскерден шыңдалып, қайралып, тезге салса да сынбайтындай қайсарлықты, төзімділікті серік етіп келген Абай Қаниұлы әскерден келген соң, өзінің сауатының және сенім артуға болатын адалдығы мен еңбексүйгіштігінің арқасында 1988-1989 жылдары Шиелі аудандық қаржы бөлімінде экономист болып қызмет атқарды. 
      Болашағы бар баланың талабын ұштап, қанатын қомдап, белін буатын елдің ұрпағы емеспіз бе, жас болса да күрделі істерді атқарып, сенім артуға болатын азамат екендігін көрсете білген Абай Қаниұлы 1989-1991 жылдары Алматы халықшаруашылығы институтының «Есеп-экономикалық» факультетінің күндізгі бөліміне құжат тапсырып, мектепте алған білімінің арқасында студент атанып шыға келді. Экономист, қаржы саласы мамандығынан ширақылықты, елгезектікті, тиянақтылық пен ұқыптылықты талап ететін, ел экономикасының дамуындағы маңызды салалардың бірі. Бірақ, қыранын қияға сүйрейтін қанатының ұзындығы немесе қаттылығы емес, көз тіккен жерге жеткенше қар мен боранды елемей, қайта қайралған үстіне қайрала түсетін қайсарлығы секілді, есеп саласындағы қабілетін байқап, өзінің де оң жамбасына келетін іс болған соң мұрты тебіндеген жігіт жасындағы Абай да қаржы саласының ішіне еніп кетті.
      Әр саланың өзіндік қиыншылығы, кедергілері мен қызығы, жетістіктері мен марапаттары болатыны секілді, қаржы саласында қызмет ете жүріп, бар ынта-жігерін жұмысқа салған Абай Қаниұлы табандылық таныта отырып, сабырлылық және төзімділікпен жеңіп шықты. Осылайша, қандай іске салса да шешімін тауып, оң нәтижесін табуға тырысатын маман 1991-1993 жылдар аралығында Шиелі аудандық салық басқармасында инспекторлық, аға маман қызметтерін атқарды. Ал, 1993 жылдан бастап Қазақстан Республикасы Ұлттық қауіпсіздік комитетінде қызметке ауысқан кейіпкеріміз экономикалық қауіпсіздік және сыбайлас жемқорлыққа қарсы кү-рес бағыттары бойынша қызметте болды. Одан кейінгі жылдары қызметте сатылай өсіп, 2001-2007 жылдары ҚР ҰҚК Қызылорда облысы және Байқоңыр қаласы бойынша департаментінің Шиелі және Қармақшы аудандық бөлімшелерінің басшысы қызметін абыроймен атқарып, зейнеткерлікке шықты. Қазіргі таңда, ҚР ҰҚК запастағы офицері. Әскери шені – подполковник.
      Құм астында ғасыр жатса да шірімейтін алтын кездіктей, басшылық қызметте болып, қолы тиген іске жан бітіріп жіберетін, тәжірибелі, білікті де білімді басшы бүгінгі нарықтық қоғамда таптырмайтын маман. Әскериден зейнеткерлікке шықса да, заман талабына сай іс жасап, жаңа технологияларды меңгеруге келген, алдына жан салмайтын, бала күнгі тез үйрену қабілеті күннен-күнге ұшталып келе жатқан Абай Қаниұлы 2013-2019 жылдар аралығында Қызылорда облысы әкімдігінің индустриялды-инновациялық даму басқармасында әкімшілік бөлімінің басшысы қызметін атқарды. «Бөрі арықтығын білдірмес, сыртқы жүнін қампайтып» дегендей қандай қызметте болса да, барлық қабілетін салып, лауазымға сай іс-әрекеттер жасап, заң шеңберінен шықпай, қолға алған ісін ілгері жүргізе білген Ахетов Абай түрлі қиындықтарды басынан өткерді. Бірақ, төзімнің темір етігі теңгедей болғанша табандылық танытып, істің оңтайлы сәттерін тауып, тек алға жүріп, сенім үдесінен шыға білді.      Одан кейінгі қызметін 2019 жылдың қазан айынан бастап Қызылорда облысы бойынша Қазынашылық департаментінде әкімшілік бөлімінің басшысы болған Абай Қаниұлы 2021 жылдың қазан айынан бастап осы департаменттің электрондық депозитарий бөлімінің басшысы қызметін абыроймен атқарып келеді. Басшы болу да екінің бірінің қолынан келе бермейтін іс. Қиын шақта да үйіріп алып кететін қабілет, қызметкерлермен тонның ішкі бауындай араласып кету, басшылық етіп отырған саласын ілгерілету, саяси болжам мен нақты жоспарларды құру – басшылықтың бойынан талап етілетін қасиеттер. Бұл қасиеттер кейіпкеріміздің бойынан табыла білді. 
      «Ердің бағы – еңбекпен жанады» дегендей уақытпен санаспай, жар құлағы жастыққа тимей қызмет еткен жылдары Абай Қаниұлының еңбектері еленбей қалған жоқ. Басшылық, түрлі ұйымдар тарапынан алғыс хаттар мен грамоталарға ие болды. Атап айтар болсақ:
      - «Қазақстан Республикасының Тәуелсіздігіне 25 жыл» мерекелік медалімен;
      - «Қазақстан Республикасының Ұлттық қауіпсіздік комитетіне 25 жыл» медалімен;       - II, III дәрежелі «Мінсіз қызметі үшін» медальдарымен;
      - II, III дәрежелі «ҰҚК-КНБ Казахстан» арнайы белгілерімен;
      - «Қазақстан Республикасының Қаржы министрлігіне 100 жыл» медалімен; 
      - ҚР ҰҚК төрағасының «Алғыс хаты»;
      - Қызылорда облысы әкімінің «Алғыс хаты» сынды марапаттардың иесі.    
      «Жетістікке жеткен әрбір ер азаматтың артында жары тұрады» демекші, түрлі лауазымдық қызметтер атқарып халық алдында жүрген Абай Қаниұлының өмірлік жолдасы, шаңырағының бірлігін кіргізіп отырған Баубекова Айткүл Сатпайқызы мұғалім-логопед. 1965 жылы 12 сәуірде Қызылорда облысы, Шиелі ауданында дүниеге келіп, 1972-1982 жылдары Шиелі ауданы № 47 Ломоносов атындағы қазақ орта мектебінде білім алып, 1982-1986 жылдары Гоголь атындағы Қызылорда педагогикалық институты, «Бастауыш оқытудың педагогикасы мен методикасы» факультеті, бастауыш пән мұғалімі бойынша, 2016-2018 жылдары Шымкент қаласындағы Қазақстан инженерлік-педагогикалық Халықтар достығы университетін «Дефектология», олигофренопедагог, мүмкіндігі шектеулі балаларға білім беру мекемелеріндегі мұғалім-логопед мамандығын алып шықты. Одан әрі 2007-2008 жылдары Мектеп, мектепке дейінгі және медицина ұйымдарының логопеді, Қайта даярлау курсынан өткен Айткүл Сатпайқызы қазіргі таңда «Қызылорда қаласының психологиялық-педагогикалық түзету кабинеті» КММ логопед қызметін атқарып келеді. Абыройлы еңбек еткен жылдары:
      - 2021 жылы «Өрлеу» біліктілікті арттыру ұлттық орталығының ұсынысымен С.Қапашовамен бірлесіп, «Логопедияның теориялық негіздерін оқыту әдістемесі» әдістемелік оқулығы 
баспадан шықты;
      - «Тағылым» республикалық ғылыми-әдістемелік журналының «Сөйлеу тілінің бұзылуын талдау қағидалары» тақырыбында мақала, 2019 ж. №3/63/ ;
      - «Тағылым» журналында «Аутизм синдромы бар баланы психологиялық-педагогикалық түзеудің әдіс-тәсілдері» тақырыбында мақала, 2021 ж. №02/ 85;
      - Қызылорда облысы бойынша педагогика қызметкерлерінің біліктілігін арттыру институтының «Хабаршы» журналында «Балалардағы тіл кемістігінің түрлері және оны түзету жолдары» тақырыбында мақала, 2021 ж. №2/68/;       - Республикалық ғылыми-әдістемелік педагогикалық-психологиялық «Дефектология» журналында «Даун синдромы бар балаларды түзетіп-дамыта оқыту» тақырыбында мақала, 2009 ж. №6;
      - Республикалық ғылыми-әдістемелік педагогикалық-психологиялық «Дефектология» журналында «Ақыл-ойы кем балалардың тіл кемістіктерін түзету» тақырыбында 2011 ж. №3 мақалалары жарық көрді. Оған қоса:
      - 2021 жылы Қазақстан Білім және ғылым министрлігі, министр А.Аймағамбетовтың атынан «Құрмет грамотасы»;
      - 2021 жылы Қызылорда облысының білім басқармасы басшысы А.Қасымова «Құрмет грамотасы»; 
      - 2016 және 2021 жылдары «Өрлеу» біліктілікті арттыру ұлттық орталығы, Б.Елеусинов атынан «Құрмет грамотасы» сынды марапаттардың иегері.
      Үш қыз, екі ұл тәрбиелеп өсірген өнегелі отбасының үлкені Каниева Ғазиза Абайқызы Орда» жоғары колледжінде (бұрынғы КазГЮА колледжі) оқытушы болып қызмет атқарса, күйеу баласы Сұлтанбекұлы Дидар Қызылорда облысының Ішкі істер департаменті Жылдам қимылдайтын арнайы жасағының аға инспекторы. Ұлы Каниев Бақыт Абайұлы Әл-Фараби атындағы Қазақ Ұлттық университетінде докторантурасын бітіріп, осы университетте аға оқытушы, «Шалаөткізгіштік құрылғылар жасау» оқу лабораториясының меңгерушісі. Келіні Ханиева Айнұр Қабылжанқызы Әл-Фараби атындағы Қазақ Ұлттық университетінде «Физика-техникалық» факультеті «Қатты дене физикасы және бейсызық физикасы» кафедрасының оқытушысы және докторанты. Одан кейінгі перзенті Қани Ержан Абайұлы Нұр-Сұлтан қаласы, Назарбаев университетінде Студенттермен жұмыс жүргізу департаментінде менеджер, келіні Социалова Анель Мейрамханқызы Нұр-Сұлтан қаласы, «ҚазТрансОйл» АҚ Тарифтік реттеу департаменті менеджер, қыздары Айдана - Сүлеймен Демирел атындағы университеті, «Химия-биология» мамандығы бойынша бакалавр, қосымша Алматы қаласы «Шоқан Уәлиханов атындағы жекеменшік мектеп» ЖШС университетпен «EDU CAREER» білім беру бағдарламасы бойынша куратор (тағылымдама) өтіп жатса, Арайлымы Қызылорда қаласы, Назарбаев атындағы Зияткерлік мектебінің 8-сынып оқушысы. Бес баласынан (3 қыз, 2 ұл) 3 немерені тәрбиелеп отырған ардақты ата-әже.
      Жаһандық үдерістен қалмай, экономикалық дамудың алдыңғы қатарында болып, әлеуметтік салалардың жолға қойылып, азаматтық қоғамның белестерге көтерілуі, зайырлы да құқықты, егеменді елдің демократиясы мен дамығанын көрсетеді. Әр заманның өз сұрқылтайы болатыны секілді, халық пен билік арасында байланыс орнатып, мемлекеттік мүдде мен халықтың әлеуметтік дамуын алдыға салған, қоршаған ортаға, қоғамға, саяси өзгерістерге бейжай қарай алмайтын әр кезеңінің өз көшбастаушысы, жетекшісі, қоғам белсендісі болады. Міне, осындай балалығын еңбекке, жастығын ел қызметіне, азаматтығын халыққа арнаған Абай Қаниұлының өнегеге толы өмірі келер ұрпаққа үлгі. Құм көшіп, теңіз тартылса да, уақыт добы шыр айналса да артына өшпейтін із, өлмейтін сөз, игі істерін сабақ етіп қалдыра білген осындай арда азаматтар көп болғай!