Адамзаттың ежелгі арманы бақытты өмір сүру. Мұның мағынасы кең де, терең де екенін бәрі біледі. Ол «тамақтың тоқтығымен, көйлектің көктігімен» әсте шектелмейтін дүние. Әдемілікке қызықпайтын, сүйсінбейтін адам жоқ. Бірақ осы қызығу мен сүйсінудің мөлшері бірдей емес қой. Әдемілікті түсініп, танып бағалаудың да дәрежесі әр түрлі. Мұның себебі тәрбиеде. Әдемілікті ұнататын табиғи сезім туа пайда болғанымен, жүре дамиды. Оның дамуы, бірде жоғары, бірде төмен болуы адамның көркемдік мәдениетіне, көркем өнер туындыларын біліп, ұғынып, ләззат алып дағдылану тәжірибесіне байланысты. Иә, әдемі адамның табиғатына қызықпайтын жан болмайды. Ал әдемі жан дегеніміз парасат-пайымы келіскен, өз ісін жетік білетін, жан-жақты ізденімпаз тұлғаны айқындайды. Мұндай жандар арамызда аз емес. Біз әңгімелегелі отырған Айгүл Баубекқызы өзінің саласының мақтаулысы, ұжымының мықты көшбасшысы. 
      Сәбитова Айгүл Баубекқызы 1964 жылы 20 мамырда Көкшетау облысы, Көкшетау ауданы, Еленовка ауылында дүниеге келген. Ата-анасының қазақы қарапайым тәлім-тәрбиесін алып есейген Айгүл білімге құштар, жан-жақты болды. Үнемі кітаптап бас алмайтын ол, мектепте қатарластарының алды болып, сыныптастарының арасында көшбасшылық қасиетке ие болды. Мектептің қоғамдық өмірінен қалыс қалмай, сыныптың ішінде болатын шараларды ұйымдастыруда сынып жетекшісінің оң қолы болатын. Мектепті ойдағыдай үздікке бітіріп шыққаннан кейін, арман жетегімен қатарластарымен қатар құжатын жинап, Көкшетау кiтапханашылар техникумына оқуға түседі. Аталмыш оқу орнын жақсы тәмамдап шығады. Білімге құштар жан 1994 жылы Алтай мемлекеттiк институтының Омбы қаласындағы филиалын тәмамдап, клуб қызметкерi және хор ұжымының жетекшiсi, мәдениет ұйымдастырушысы мамандығын алып шықты. 
      Еңбек жолын 1982 жылы Көкшетау ауданының мәдениет бөлiмiнде әдiскер болып бастаған жас маман ұжым арасында өзінің еңбекқорлығымен, көпшілдігімен, ұжыммен жақсы қарым-қатынасының арқасында сыйлы болды. Аз уақыттың ішінде аға мамандармен араласа жүріп, саласының қыр-сырын жетік меңгеріп алды. Үлкеннің ақыл-кеңесіне құлақ аса білетін Айгүл Баубекқызы жаңаны үйренуден, жаңашылдықтан еш жатырқамайтын. Үйренуге талпынып, білуге асығатын. Сәт сайын өзгеріп отыратын заманауи өзгерістермен бірге өзінің де білімін жетілдіріп отыруды әдетіне айналдырған. Қашан болмасын қолынан кітаптары түспейді. Қағазы мен қаламы сонау бала кезінен бергі айнымас досы деуге болады. Жаны шығармашылыққа жақын. Ылғи да ой үстінде жүреді. Көп оқып, көп ізденетіндіктен, ол барлығын ойында жазып, әбден пісіріп барып, қағаз бетіне түсіреді. Оның қандай да бір ойы, пікірі болмасын қоғам ойынан шығатыны, өзекті болатыны да сондықтан. Шалалықты, жауапсыздықты кешірмейтін кірпияздығы бар. Мұнысы әрине, өте тамаша қасиет деуге болады. Себебі, бастаған ісін аяғына дейін жеткізбей тынбайтын табанды әрі еңбекқор жан. Бітпей қалған ісіне күйініп, ұйқы көрмейтін кездері де жоқ емес. Бала кезден бергі әдеті де сол. Бастаған ісін аяғына жеткізіп барып миы да, өзі де дамылдайды. Күні бойғы тынымсыз еңбектен жаны да миы да сонда барып тыным табады. Оның осындай қайтпас қайсарлығын жанындағы барлық жақын-жуығы дерлік жақсы біледі.
      Білімді де білікті маман 1985-1994 жылдары Көкшетау ауданының Мәдениет үйiнде басшы лауазымына тағайындалды. Басшылық қызметінде де ол қарапайым қалпынан танбады. Ешқашан біреудің намысына тимейтін, артық ауыз әңгімеге жоқ жан әріптестерімен өте тату әрі түсіністікпен жұмыс жасай білді. Көшбасшысы мықты ұжым да аз уақытта мақтаулы мекеме атанғанын несіне жасырайық! Көптің көңілін таба білетін, елдің сөзіне құлақ асып, әркімнің жүрек түкпіріндегі мәселесін ден қойып тыңдай білетін жанды кімде-кім болмасын жақсы көріп, жақын тартатыны рас қой. Айгүлдей қыздарына сенім артып, оның еңбегін бағалай білген халқы оны биікке бір-ақ көтерді. Айгүл Баубекқызы 2003 жылы Красный Яр ауылы тұрғындарының қолдауымен Көкшетау қалалық мәслихатының депутаты болып сайланып, әлеуметтiк мәселелермен айналысты. Ауылдың тұралап қалған мәселелерін ел ағаларының құлағына жеткізіп, ел мен билік арасында алтын көпір орнатып, түйінді мәселелердің шешілуіне өз ықпалын тигізді. Ел сенімінен шығу да оңай емес әрине. Бұл лауазымы оған онан сайын жауапкершілік жүгін жүктеді. Ер азаматтармен қатар иін тіресе қызмет атқарып, өзіне сенім артқан елдің сенім үдесінен де шыға білді. 
      Ел қалаулысы 2006 жылдың 27 шілдесінен бастап, 2021 жылы 2 ақпаннан осы уақытқа дейiн «Көкшетау қаласының мәдениет және тiлдердi дамыту бөлiмi» мемлекеттік мекемесінде басшысы қызметін атқарса, 2021 жылдың 3 ақпаннан Ақмола облысы мәдениет, архивтер мен құжаттамалар басқармасының басшысы болып абыройлы қызмет атқарып келеді. Адал еңбегінің арқасында талай марапаттармен марапатталды. Ол 2005 жылы «Қазақстан Республикасы Конституциясына 10 жыл», 2008 жылы «Астананың 10 жылдығы», 2014 жылы «Қазақстан мәслихаттарына 20 жыл» медальдарын омырауына таққан. 2012 жылы «Мәдениет саласының үздiгi», 2014 жылы «Золотая звезда», «Балалар үшiн» төсбелгiлерiмен марапатталды. 
      Халықтың құрметіне бөлену – елге ерінбей еңбек еткен адамға ғана тән қасиет емес пе? Бұл жерде, ең алдымен, айналаға адамгершілік қасиет әсер ететіні ақиқат. Өйткені, адал еңбек ету қажеттіліктен тумайды, ол үлкен азаматтық жауапкершіліктен туындайды. Ел сенімін ақтаудың қаншалықты маңыздылығын қолынан іс келетін жан ғана мойнына алады. Оның қаншалықты мықты екенін мойнына алған жауапкершілік жүгінен аңғаруға болады. Айгүл Баубекқызы өзінің саласында шаршап-шалдықпай адал еңбек етіп, абыройлы да беделді болып отырған жан деуге толық негіз бар. Адал еңбегінің арқасында елдің алғысына бөленіп, берекелі де бақытты өмір кешіп жатқан жан жайлы әлі талай қалам тербелетініне бек сенімдіміз. Алла берген абырой биігінен көріне беріңіз демекпіз!