Қоғамның белді азаматтары туралы адамдар әсте әртүрлі ойлайды. Әсіресе елге қызмет етіп жүрген әкімдер туралы халықтың ойы екіге бөліп жарылады. Қарапайым халықтың көпшілігі жоғары лауазымды қызмет аспаннан салбырап түсіп, сол адамның басына оңай қона қалатындай ойлайды. Әрине, бұл қате пікір. Әдетте, әкімдер туралы әңгіме бола қалса жақтырмай, тек әкімдердің жаман жақтарын, сүрінген уақыттарын тізбектей жөнелетін адамдар жоқ емес. Әкімнің де әкімі бар. Әкім болу оңай деймісің мына заманда?! Жұмыс болған соң, қызығы мен шыжығы, оның күнгейі мен көлеңкесі де қатар жүреді. Дегенмен, таразы басына адамның атқарған жұмыстарын салып жібергенде жақсылығы басым түсетін жандар аз да емес. Солардың бірі – Еркін Бейсенов. Бүгінде халықтың ақ батасын алып, ыстық ықыласына бөленіп жүрген Еркін Бейсеновты біршама жұрт танып жатады. Ол – Көксу ауданы, Қабылиса ауылдық округінің әкімі. Еркін Аманбайұлы туралы ойланасың, толғанасың. Өйткені, адамдардың есінде өткені емес, өскені, халқына еңбек еткені ғана жүреді. Өмір заңы солай. Еркін Аманбайұлы өзінің еңбек жолында халқына адал қызмет етіп, біраз мәселелердің шешімін тапқан ер азамат. Қызметі өссе, ол адал еңбегі мен қара жұмыстың, ащы терінің арқасы.
      Әкім болу да, ол қызметті көтеру де қиын. Тақ пен бақты бірдей ұстап тұру көп саясаткердің қолынан келе бермейтіні хақ. Азаматтың да, азаматы бар. Бойында қарапайымдылық қасиетін сақтап, жүрегі имандылыққа толы, халық, Елбасы алдындағы жауапкершілігін басты міндеті деп білетін Еркін Аманбайұлы туралы айтсақ артық болмас.
      Бейсенов Еркін Аманбайұлы 1970 жылы 16 қаңтарда Талдықорған облысы, Киров ауданы, В.В.Куйбышев атындағы колхозда дүниеге келген. Еркін Аманбайұлы 1977-1987 жылдары В.В.Куйбышев атындағы орта мектебінде білім алады. Одан әрі Отан алдындағы борышын Ленинград қаласында өткереді. Еркін 1991-1996 жылдары АЗВИ Алматы зооветеринар институтында білім алып, мамандығы бойынша зооинженер қызметін атқарады.
      Ол көпбалалы отбасынан шыққан. Әкесі – Аманбай Нұрғалиұлы, анасы – Нұрбиша Әбдіхалыққызы. Еркін 1992 жылы шаңырақ көтеріп отбасын құрады. Жұбайы Эльмира Қуанышбайқызы 1971 жылы Талдықорған облысы, Киров ауданы, Октябрь ауылында туылған. Қазіргі таңда «Сарыой» кафесінің меңгерушісі болып жұмыс жасайды.
      Еркін халқына адал әкім, отбасына қамқоршы әке, тірек бола білді. Отбасында төрт қыз, бір ұлды тәрбиелеп отырған асқар тау әке, бүгінде қыздарын ұзатып, құтты ұясына қондырған. Отбасының басты қызметі баланы тәрбиелеу. Отбасы тәрбиесі – бұл жалпы тәрбиенің ең басты бөлігі. Ата-ана өмірге ұрпақ әкеліп, оны саналы азамат болып өсуі үшін қажет жағдай жасайды. Баланы салауатты өмір сүруге, адал болуға тәрбиелеу, жақсылықты үйретуге, жамандықтан жиренуге үйрету, бойында жастайынан мәдени құндылықтар мен адамгершілік қасиеттерді қалыптастыру үшін ата-ана аянбай еңбек етеді. Баланың дұрыс өсіп-жетілуі ең біріншіден отбасындағы әке мен ананың арасындағы қарым-қатынасқа байланысты болатыны бәрімізгі белгілі. Сондықтан отбасында тек мейірімділік пен жылулық алып өскен ұл мен қыздан жақсы азамат шығады.
      Үлкен қызы Дана Еркінқызы 1993 жылы Ақтекше ауылында дүниеге келеді. Бүгінде отбасы құрған. Екінші қызы Ақбота Еркінқызы 1996 жылы Ақтекше ауылында туылған. Оның да өз отбасы бар. Үшінші қызы Жұлдыз Еркінқызы 2000 жылы Ақтекше ауылында дүниеге келген, отбасылы. 2003 жылғы ұлы Сәкен Еркінұлы 2003 жылы Ақтекше ауылында туған, қазіргі таңда Алматы қаласындағы Нархоз университетінің 2 курс студенті. Кенже қызы Еркежан Еркінқызы 2011 жылы Алматы облысы, Көксу ауданы, Ақтекше ауылында туылған. Бүгінде Еркежан «Ақын Қабан Жырау» орта мектебінің 5-сынып оқушысы.
      Еркін еңбек жолын 1996 жылдан «Сарыой» жеке шаруа қожалығының басшысы болып бастайды. Мал шаруашылығы мен егін шаруашылығын дамыту үшін біраз еңбек қылады. 2011 жылдан бастап бүгінгі күнге дейін Қабылиса ауылдық округі әкімінің қызметін атқарып келеді. Мемлекеттік қызметте өз қамы үшін емес, мемлекет игілігіне жұмыс істеуді басты міндетіне ала отырып, осы жылдар аралығында округтің өркендеуіне қосқан үлесі мен еңбегі аз емес. Оған халқы да куә.
      Әкімдік еңбек жолында ауылының білім ошағының «Ақын Қабан Жырау» орта мектебінің қоршауын жасатып, ашық спорт алаңын жаңарту жұмыстарын жүргізген. Округтің мәдениетін көтеру, ауыл жастарын өнерге баулу мақсатында мәдениет үйіне күрделі жөндеу жұмыстарын жүргізіп, жасөспірімдерге арналған күрес залын ашты. Қара жұмысқа әбден піскен ауыл балалары енді күрес залында шынығып, шеберліктерін шыңдайтын болады. Жарқын болашақта дәл осы залда күрестің әліпбиін үйреніп, биік шыңдарды бағындыратын ауыл азаматтары шығатынына сеніміміз мол. Еркін Аманбайұлы мұнымен тоқтап қалмай, ауылдағы күрделі мәселелердің бірі су мәселесіне де араласып, өз үлесін қосты. Ауыз су қазіргі елімізде өршіп тұрған мәселелердің бірі. Мемлекет тарапынан бұл мәселені шешу үшін түрлі шаралар іске асырылып жатқаны да белгілі. Қарапайым халықтың суға зар болып отырғаны билік тарапын да алаңдатулы. Сонымен бірге сөзбен емес іспен мәселені шешуге барынша атсалысып ауыл әкімі «Су ырыстың көзі» демекші ауылға «Ақ бұлақ» бағдарламасы аясында таза ауыз су құбыры да тартылып, күрделі су мәселесінің шешімін таба білді.
      Сонымен қатар, «Қиын сәтте дана адам көпірлер салады, ал ақылсыз бөгеттер салады» деген даналықты ұстанған азамат Көкбастау ауылының өзеніне көпір салды. Көпір салу сауапты істердің ең үлкені. Оның қажеттілігін ел-жұрт жақсы біледі. Барар жеріңде ағынды су кездесіп, көпір болмаса, жолың кесілетіні сөзсіз. Сол себепті, көпірдің ел дамуында алар орны айрықша. Одан қалды «Білтесіз шырақ жарық шашпас, Әрекетсіз жігіт ілгері баспас» деген мақалды ұстана отырып ауылдың 7 көшесіне түнгі жарық шамдары орнатылды. Кешкілік ауылдың сәні кіріп, көшелері жарқырап ауылға ерекше көрік берді. Сонымен қатар, қызмет барысында күрделі жол мәселесі оң шешімін тапты десек те болады. Еркін Аманбайұлы округтің 8 көшесіне асфальт төсенішін төседі. Осылайша ауылдың өркендеуіне зор үлесін қоса отырып, заман талабына сай ауыл тұрғындарына ғаламтор, ұялы байланыс қолжетімді болуы үшін «Beeline» ұялы байланыс операторының мұнарасын орнатты.
      Еркін Аманбайұлының әкім болып қызмет еткен еңбегі еленіп, 2014 жылы Алматы, облысы, Көксу ауданы әкімі Ғ.Тоқпейісовтен «Алғыс хатпен», аудан әкімі Т.Досымбековтен «Алғыс хатпен», 2021 жылы Қаблиса ауылының атынан «Қаблиса» командасы Талдықорған қаласында өткен мини футболдан ІІ орын алғаны үшін Грамотамен марапатталды.
      Қазақта «Әкім бол, халқыңа жақын бол» деген сөз бекерге айтылмаған. Ақ жағалылар ішінде қара халықпен жұмыс істейтіндер – әкімдер. Әсіресе, аудан басшылары, ауылдық округтің әкімдері тікелей халықпен жұмыс жасайды. Олардың мұң-мұқтажын біліп, жоқ-жітігін түгендеп отыратындар да солар болуы тиіс. Бүгінгі заманда ел басқару оңай емес, көптің көңілінен шығу қиын. «Әкім бол, халқыңа жақын бол!», - деген осы шығар. Жол, ауыз сумен қамтамасыз ету, қоғамдық көлік және өзге де мәселелер, біреуі шешілсе, екіншісі пайда болатын мәселелер қатарына жатады. Оларды сәл де болса шешіп, халықтың көңілін табу да оңай емес екені белгілі.
      Халықтың сынына ұшырап, өкпе-назын тыңдап, саясаттың ыстығына да, суығына да шыдайтын әкімдерді, бір сәтке болсын түсініп, барынша қолдауға тырысайық. «Көшбасшы болмаса, ел оңбайды» демей ме дана халқымыз. Әкім болу әр адамның ісі, халқына жақын болу нар адамның ісі. Сондай нар тұлғалы азаматқа, ел қамын ойлаған адал жанға айналуды азаматтық парызым деген тұлға ғана елінің ертеңіне сара жол салары анық.