Жастайынан зейінділігімен, жігерлігімен, тиянақтылығымен көзге түсіп топ жарып, адал еңбекпен толысып есейген шағында іскер де білімді маман, беделді де талапшыл басшы болып, саналы өмірін халқына, еліне қызмет етуге арнап, оның игілігін арттыру жолында беріле қызмет еткен, солайша, абырой биігіне көтеріліп, отбасының тау тұлғалы әкесі, жарының арқасүйер тірегіне айнала білген бүгінгі кейіпкеріміз – Қорғанбек Досықайұлы жайында сөз қозғасақ. Бүгінде сексеннің сеңгіріне шығып, еңбегінің зейнетін көріп отырса да сол тың, ширақтығын сақтаған қалпы елінің ертеңіне деген бар жанашырлығын, ынта-жігерін танытып жүрген жан жайлы сөз ету біз үшін үлкен мақтаныш демекпіз.
      Қорғанбек Досықайұлы 1942 жылдың сәуір айының бірінші жұлдызында Авань елді мекеніне қарасты қазіргі арайлы Ақбасты ауылында дүниеге келген жан. Кейіпкеріміз балалық шағын аталмыш аймақта өткізіп, 1949-1959 жылдар аралығында Авань орта мектебінде білім алады. Мектеп қабырғасын тәмамдаған жан шаңырақ көтеріп, үлкен өмірге қадам басады. Жары Нұрпейісова Гүлжамилә Кәрімқызы (Боқан елі, атақты Әбдіжәміл Нұрпейісовтың қарындасы) екеуі бүгінде көптің көзіне мәңгілік махаббаттың, тұрақтылық пен адалдықтың символы іспеттес көрінеді. 62 жыл бір шаңырақтың астында тұрып, өмірдің ыстық-суығының қандай екендігіне көз жеткізіп, еш уақытта мойымай, алға бірге қадам басып, бүгінде он екі құрсақты «Алтын алқа» иегері атана білген жанның әрдайым жас ұрпаққа өмір жолы үлгі бола бермек. Кейіпкерлеріміз бүгінде ұрпағымен мақтанады. Қорғанбек мырза мен Гүлжамиля ханымның жылы-жұмсағынан дәм татып отырған, ел азаматтары мен азаматшаларына айналған отыз бес немересі, жиырма алты шөбересі бар. Қорғанбек мырза еңбек жолына ерте араласып, сан салалы жұмыстарды атқарған. Кейіпкеріміз 1963 жылы Құланды ауылдық кеңесінде хатшылық қызметтің тізгінін ұстап, іс-тәжірибе жүзіне келгенде қаншалықты жауапты екендігін дәлелдей түсіп, 1971 жылға дейін Авань балық зауытында слесарь қызметін қатар алып жүреді. Еңбек жолының келесі кезеңі Қорғанбек мырза үшін 1971-1973 жылдары Құланды ауылдық кеңесінде бас есепші қызметін атқарумен есте қалады. Есеп-қисапқа аса ұқыптылықпен қарап, аудан өмірінде орын алып жатқан қандай да болмасын қоғамдық іс-шаралардан қапы қалмаған кейіпкеріміз – адал еңбектің нағыз көрінісі іспеттес.
    Кейіпкеріміздің батылдығы, табандылығы, өзіне сенімдігілігі, әр нәрсені алдын ала ойластырып, дұрыс шешім қабылдай алуымен себеп болса керек. Осындай жауапкершілігі мен шебер қызметтерінен кейін 1994 жылдан бастап зейнеткерлік жасқа дейін Ақбасты елді мекені, Құланды ауылдық округінің әкімі қызметін атқарады. Елді мекенді аббаттандыру, тіпті аз деген мүмкіндіктердің өзін Қорғанбек мырза қалт жібермей, ұтымды пайдаланып отыра білді. Осы салада 12 жыл үздіксіз еңбек еткен кейіпкеріміз бүгінде бейнетінің зейнетін көріп отыр-ған жан. Қазіргі таңда Қорғанбек Досықайұлы – Ақбасты ауылының тұрғыны, құрметті азаматы, ардақты ақсақалы. Көненің көзіндей, асылдың сынығындай болған Қорғанбек Досықайұлы көпке батылдығымен, қайсарлығымен үлгі. Сүбелі еңбектің нәтижесі өз кезегінде елеусіз қалған емес-ті. Сөзіміздің дәлелі, ол 2004 жылы Арал қаласының аудан әкімі Н.Т.Мұсабаевтың алғыс хатымен, 2005 жылы Қызылорда облыс әкімі И. Адырбековтың арнайы алғыс хатымен, 2005 жылы Арал қаласының аудан әкімі Н.Т.Мұсабаевтың құттықтау хатымен марапатталады.
      Міне, осындай азаматтарды, атап айтқанда, бейнетінің зейнетін көріп отырған азаматтарды көргенде, қашанда жастарымызды отансүйгіштікке баулитын бірден-бір өмір мектебі деп ұтымды еңбек жылдардың куәгері атанған әрбір кейіпкеріміздің лайықты ізбасарлары ретінде жастарымызды Жаңа Қазақстанның болашағы үшін,еліміздің ертеңі үшін аянбай еңбек етуіміз керек деп түсінеміз.
       Қорыта келе, бүгінгі күннің мақтанышы, өткен күннің куәгері Қорғанбек Досықайұлы, басыңызға байлық, жанұяңызға амандық тілейміз. Сіздерден төгілген шапағатты шуаққа барша қазақстандықтар бөленіп, абыройларыңыз асқақтай берсін!