Облыс көлемінде жүзеге асып жатқан әрбір нәтижелі жұмыстардың артында біз біле бермейтін жандар бар. Олар күні-түні тынбай қызмет атқарып, өңір төңірегінде орын алған төтенше жағдайлар, тіптен мерекелік кезеңдерде орын алатын салтанатты шерулердің қауіпсіздігінің өзінің тиісті деңгейде жоспарланып, жүзеге асырып отыратын өз ісінің мамандары бар. Олардың қатарында нәзік жандылардың бары да жасырын емес-ті. Отбасы бақыты мен қызмет барысын ұштастырып жүретін ел азаматшаларының қатарын толықтырып жүрген жан Оспанова Камшат Айбасқызы.
      Камшат Айбасқызы Сыр өңірінде 1980 жылдың қаңтар айының 12-жұлдызында дүниеге келген. Кейіпкеріміз өн бойына қайсарлық пен іске деген тиянақтылығы ата-анасынан дарыған. Тағдырдың тұлға үшін дайындап қойған тосын сыйлары жетерлік. 1997 жылы Камшат ханым әкесі Оспанов Айбас пен анасы Оспанова Қазынадан бір мезетте айырылып қалды. 
      Балалық шағын аталмыш өлкеде өткізген жан 1987-1997 жылдары аралығында №43 Жақыпбек Махамбетов атындағы орта мектепте білім алады. 1997-2001 жылдары Қызылорда қаласында орналасқан іргелі оқу орны агротехникалық колледжде ветеринар мамандығы бойынша білім алып шығады. Өзінің білімі мен біліктілігін жетілдіре түсу жолында кейіпкеріміз 2006-2011 жылдары Болашақ университетінде заңгер мамандығы бойынша білімін жетілдіреді.
      Алғашқы қызметтік жолын 2006 жылы мамыр айының 13-жұлдызында Қызылорда облысы әкімі аппаратының «Жұмылдыру және шұғыл жұмыстар орталығы» коммуналдық мемлекеттік мекемесінде шұғыл аппарат және мониторинг бөлімінің жоғары санатты бас маманы болып қызмет атқарады.
      Қызмет барысында ауыс-түйістер болатындығы заңдылық. Камшат ханым да жас маман ретінде білек сыбана кірісіп, өз ортасында іскерлігімен танылып, 2009 жылы ақпан айынан бастап 2012 жылдың қазан айына дейін Ішкі Істер органында полиция батальонында қызмет атқарады. Аталмыш жылдары Камшат ханымның ерен еңбегі өз кезегінде бағаланып, 2009 жылдың наурыз айында Алғыс хатпен, 2009 жылдың маусым айында арнайы грамотамен, 2009 жылдың желтоқсан айында ақшалай сыйлыққа қол жеткізеді.
       Кейіпкеріміз 2013 жылдың маусым айынан бастап Қызылорда облысы әкімі аппаратының «Жұмылдыру және шұғыл жұмыстар орталығы» коммуналдық мемлекеттік мекемесінде шұғыл ақпарат және мониторинг бөлімінің жоғары санатты маманы болып қызмет атқарады. Бүгінгі таңда кейіпкеріміз аталмыш қызмет барысында еңбек еткеніне 17 жылдың жүзі болды. 
      2018 жылы Камшат ханым отбасын құру, отанасы атану бақытына қол жеткізді. Өмірлік жары Сағатов Абай Рамазанұлы 1980 жылы сәуір айының 10-жұлдызында дүниеге келген. Абай Рамазанұлы Камшат ханымның әрбір ісіне, бастамаларының барлығына дерлік қолдау білдіріп, арқа сүйер болып жүргені ақиқат. Ол 2016 жылдан бастап Масло ЖШС фирмасында қызмет атқарып келеді. Абай мырза мен Камшат ханым 2020 жылдың 9 мамыр күні бір қызғалдақтың ата-анасы атану бақытына ие болды. Аделина Абайқызы болашақта анасындай қайсар, әкесіндей еңбекқор азаматша боларына сенім білдіреміз.
      Қызметін жоғары бағалап, жауапкершілік таныта білген жан отбасы мен еңбек жолын ұштастырып жүр. Аделина 10 айлық уақытында Камшат ханымның қайта еңбек жолына оралғанының өзі – көп нәрсенің айғағы іспеттес. Бүгінде ел азаматшасының қызметтік жолдағы ерен еңбегі еленіп, өз кезегінде 99215 әскери бөлімі командирінің полковнигі К.Ойықбаевтың Алғыс хатымен, «Жұмылдыру және шұғыл жұмыстар орталығының басшысы» Е.Бейсенбаевтың арнайы Алғыс хатымен, Қызылорда облысының әкімі Н.Нәлібаевтың Алғыс хатымен, Қызылорда облысының бұрынғы әкімі Қ.Көшербаевтың Алғыс хатымен марапатталды. 2022 жылы облыс әкімінің Алғыс хатына және ақшалай сыйлығына ие болды.
      Камшат Айбасқызы өз кезегінде елімізде орын алған Қаңтар оқиғасында елдің тыныштығын үшін 4-5 күн ауысымсыз қызмет етті. Көптің қолынан келе бермейтін бұл ерлігі еш уақытта ұмытылмақ емес. 
      Өз ісінің шебері болу – әр адамның арманы. Өмір жолында адам қандай бел-белестерден болмасын еш тоқтаусыз өтері анық. Арман жолын мақсатқа айналдыру – бір бөлек дүние болса, өз мақсатыңызға жету үшін іс-әрекетіңіздің қарқын алып, дамуы – өзінше бір төбе. 
      Өз елінің экономикасын көтеру, халықтың əл-ауқатын жақсарту, тұрмыс салтымызды дұрыс жалғастыра білу үшін əрбір адам еңбектене білуі керек. Осыны түсініп, елі үшін жан аямай қызмет атқарып жүрген Камшат Айбасқызына еңбегіңіз жана берсін демекпіз!