Адамның құрметті болуы оның адамгершілігімен, елге жасаған адал еңбегімен бағаланаты рас. Жалпы адам өз өмірінде таңдаған кәсібімен, мамандығымен өсіп-өркендейді. Жақсы мен жаманның аражігін бағамдап, жан-жағына қарап, бой түзейді. Дұрысында өзінің қарым-қабілетіне қарай өзін өмірге бейімдейді. Тіпті дос-жаранын да сол еткен қызметінің айналасынан табады. 
      Жасайтын ісіне сүйіспеншілікпен қарап, оны өмірінің бір бөлшегіне айналдырып, шыңына жеткен адамдарды өз ісінің хас маманы деп әспеттейді. Ондай азаматтарға халық та құрметпен қарап, мақтаныш етеді. Өзінің таңдаған кәсібіне деген жауапкершілігі мен адалдығы, еңбекқорлығы мен іскерлігінің арқасында кейіпкеріміз Әділхан Жүнісқұлұлы ұжымында қадірлі де сыйлы азамат. Бұл Әділханның бойындағы әкесінің тәлімді тәрбиесінен келген қасиет деуге болады. Өйткені, бала күнінен еңбекке құштар қылып тәрбиелеген әке, адал еңбекпен тауып жеген нанның тәтті болатынын санасына сіңіргендігінен деуге болады.
      Адал еңбегінің арқасында көптеген жетістікке қол жеткізіп, өзіне де өзгеге де пайдасын тигізіп келе жатқан азамат өзгелер қызыға қарайтындай, қолынан келетін істі дөңгелентіп, берекесі мен мерекесін келтіріп отыр. «Еңбек түбі береке» екенін жанындағылардың жадына сіңіре де біледі. Байсалды да байыпты қалпымен үлгілі болып, кейінгілерге жол көрсетіп, іс тәжірибесімен әріптестері арасында да беделі биік болып келеді. 
      Әрбір адамның өмір жолына қарайтын болсақ, оның қандай ортамен араласқанын, қандай кәсіппен айналысқанына баса назар аударатынымыз шындық. Ал қолға алған ісін жан-жағына көрсетіп, оның бастау қайнарының көзін басқаларға үйретіп, қанатын қатайтып, жігерін жанып көпшілікке паш етер болса нұр үстіне нұр болары сөзсіз.       Еңбекке икемді, қолынан іс келетін азаматты «Сегіз қырлы бір сырлы» деп елі мадақтап жатады емес пе?! Әділхан Жүнісқұлұлы, міне сол сөзге әбден лайықты азамат. Оның бойындағы тамаша қасиеті де сол адал еңбекқорлығы. Қай кезде болмасын жанындағылардың ыстық ықыласына бөленіп жүреді. Жаңалыққа жақын азамат ретінде ауыл-елінің барлық іс шараларынан тыс қалмай, өзінің де көзқарасын білдіріп отырады. Тағы бір қыры жан-жақтылығы. Бір орында отырып алып, тапсырма беруді жаратпайды. Үнемі ақыл-кеңесін айтып, көппен кеңескенді жөн көреді.
      Қарапайым ғана ауыл баласы ретінде кез-келген шаруаға мығым Әділхан Жүнісқұлұлы әр істің жайын білетіндіктен, ауыл жастарын мықты, жүректі, өтірік-өсектен аулақ болып, ең алдымен қара еңбекпен шыныққанын қалайды. Себебі өмір баспалдағын қарапайым еңбектен бастаған жастың үлкен өмірге төзімді, дайын болып баратынын жақсы біледі. Үнемі еңбектен қол үзбей, көпке қызу еңбектің үлгісін көрсетіп келе жатқан азаматтың расында беделі бекем, мерейі үстем десек артық айтпаған болар едік.      Омаров Әділхан Жүнісқұлұлы «Эльдарада» шаруа қожалығының жетекшісі ретінде көпке таныс тұлға. Ол 1953 жылы 27 сәуірде Шу ауданы, Белбасар ауылында қарапайым отбасында дүниеге келген. Әкесі Жүнісқұл ауыл-еліне сыйлы, еңбекқор азамат болды. Анасы ағайын-туысына жайлы, дана да инабатты жан еді. Ата-анасының тынымсыз тіршілігін, сабырлы да шыдамды қалпын көріп есейген Әділхан да бала күнінен шымыр болып есейді.
      Әділхан Жүнісқұлұлы 1969-1970 жылдар аралығында Шоқан Уалиханов атындағы орта мектебінде білім алды. Алғыр оқушы ретінде мектептің қоғамдық өміріне белсене араласып, қатарластары арасында беделді болды. 1972-1974 жылдар аралығында әскер қатарында болып, отан алдындағы борышын адал атқарып келді. Оқу-білімге құштар болған жастың арманы жоғары білім алып, ауыл-еліне қызмет ету болды. Сол алға қойған мақсатымен 1980-1986 жылдары Жамбыл қаласындағы Су шаруашылығы иниститутына оқуға түсіп, оны ойдағыдай тәмамдап шықты. 
      Адам өзінің ісімен, жөнді әрекетімен бедел жинайды. Өзі жүрек қалауымен таңдаған саланы меңгеріп, сол арқылы ел мақтанына айналып, халық құрметіне бөленетін болса, ол үлкен бақыт. Әрбір адал ниетті адам өз ғұмырының мәнді де мағыналы, атқарған ісінің жемісті де табысты болуын қалайды. Адал еңбегімен, қалтқысыз қызметімен ғана ел-жұрттың алдында абыройы артады, беделі биіктейді, сый-құрметке бөленеді. Мұндайда туған-туысына, жора-жолдасына қадірлі болады. Айналасына жақсы жандар үйіріліп, оның тамаша үлгісін алады. Әділхан Жүнісқұлұлы әрдайым осындай деңгейден көрініп, ортасына құрметті болып келе жатқан азамат.      Білімді азамат 1974 жылдардан бастап ауыл шаруашылығының әртүрлі салаларында абыройлы қызмет жасады. Өзінің іскерлігімен, шапшаң ойлылығымен, қандай да қиын шаруаны дер уақытында орындай алатындығымен мықты маман болды. Тәжірибелі маман 1976 жылдан зейнет жасына дейін Жамбыл облысы Шу ауданындағы Тасөткел су қоймасы пайдалану басқармасында жұмыс істеді. Су шаруашылығының қыры мен сырын бес саусағындай жақсы білетін азамат 1982 жылдан атаулы мекемеде бөлім басшылығына тағайындалды. Білікті басшы ретінде әрбір жас маманның қарым-қабілетін ашуға мол мүмкіндік берді. Дұрысын айтқанда ол жақсы тәлімгер бола білді. Әрбір жас маманның саласына деген қызығушылығын арттырып, ынта-ықыласын шыңдап, тынымсыз жұмыс жасауға тәрбиеледі. Су шаруашылығындағы өзекті мәселелер мен қойылатын талаптар да жоғары екені белгілі. Ол басшы ретінде қоғам алдындағы борышын адал атқаруға мейлінше тырысты. Бұл жолдағы ісі ылғи алға басып, жаңару мен жаңғыруға бет бұрып отырды. Білімді басшы көп ізденді, елдік істе ешқашан артқа шегініп қалмай, тек алға батыл қадам басуды ғана басты ұстанымы етті. Сәйкесінше саласы бойынша білімін арттырып, біліктілігін көтеріп отырды. Өз мамандығын шексіз сүйетін, өз ісінің жоғары шебері болған азамат айтылған сынды да көтере білді. Елдің, сырт көздің сын айтуы заңдылық деп білді. «Сын айтылмай, мін түзелмейді», бұл ретте өз тарапынан айтылған сыннан қорытынды шығарып үйренген азамат, әрбір ісін мінсіз атқаруға да тырысты.       Әділхан Жүнісқұлұлын мықты сыншы деуге болады. Аса қатты қатал болмаса да өзінің ұстанымына сай ұжыммен жұмыс жасай білудегі ерекшеліктерінің арқасында талай жастың мықты маман болуына ықпал етті. Көпжылдық тәжірибесінің арқасында ол шебер сыншы, білімді де білгір көшбасшы атанды. Осындай жаңалыққа құлшыныс, үздіксіз ізденіс арқасында 1988 жылдан 2016 жылдар аралығында Тасөткел су қоймасы пайдалану басқармасының бастығы болып, зейнет жасына дейін абыройлы қызмет атқарды.      Табаны күректей 42 жыл су шаруашылығында қызмет еткен азаматтың еңбегі жоғары бағаланды. Лайықты деген марапаттарға ие болды. Ол «Қазақстан Республикасы тәуелсіздігіне 20 жыл», «Қазақстан Республикасы тәуелсіздігіне 25 жыл» мерекелік медальімен марапатталды. Қазақстан Республикасы «Ауыл шаруашылығы ардагерлер кеңесі» ҚБ-нің «Құрметті ардагері» төс белгісімен және «Жамбыл облысына еңбегі сіңгені үшін», «Шу ауданына сіңірген еңбегі үшін», Д.А.Қонаевтың 110 жылдық мерекелік медалін омырауына тақты. Сонымен қатар «С.Естемесовқа 100 жыл» мерекелік медалін, «Қазақстан су шаруашылығының үздігі» төсбелгісін алды.
      Еңбеккер азамат «Шу ауданының Құрметті азаматы», Мойынқұм ауданы әкімінің «Құрмет грамотасы», Жамбыл облысы мәслихатының «Құрмет грамотасы», Жамбыл облысының әкімінің «Құрмет грамотасы», Шу ауданы әкімінің «Құрмет грамотасы», Қазақстан Республикасы Ауыл шаруашылығы министрлігі «Казсушар» шаруашылық жүргізу құқығындағы республикалық мемлекеттік кәсіпорнының «Құрмет грамотасы», Шу ауданы Мәслихатының «Құрмет грамотасы», Шу ауданы әкімінің «Құрмет грамотасы», «Нұр Отан» партиясы Шу ауданы филиалының «Құрмет грамотасы» иегері. «Облысқа сіңірген еңбегі үшін» белгісінің иегері, «Су шаруашылығының үздігі» атанды. 
      Қазіргі таңда «Эльдарада» шаруа қожалығының жетекшісі болып отырған Әділхан Жүнісқұлұлы елінің елеулі, халқының қалаулы азаматы ретінде есімі кеңінен таныс. Шаруаның жайын жақсы білетін азамат өңірінде бірнеше адамды жұмыспен қамтып отыр. Жүрегі жұмсақ, жаны жомарт, қолы ашық азамат қайырымды істерді өзінің азаматтың парызы санайтындықтан, үнемі қолынан келген көмегін мұқтаж жандарға көрсетіп келеді. 1976 жылы Ойшиева Эркин Ойшықызымен отбасын құрып, бүгінгі кезде 3 ұл, 1 қыздан 16 немере сүйіп отырған бақытты азамат. 
      Ойшиева Эркин 1954 жылы 7 қарашада Қырғыз Республикасы Ош облысы Ноокот ауданында дүниеге келген. 1962-1972 жылдар аралығында Жаналыш орта мектебінде білім алды. 1972-1974 жылдары Өзбекстан Республикасы Самаркант сауда техникумын тәмамдап, 1977 жылы Қазақстан Республикасы Жамбыл облысы Шу ауданындағы Тасөткел су қоймасы пайдалану басқармасында есепші болып еңбек жолын бастады. 1993 жылдан Тасөткел су қоймасында бөлім бастығы қызметіне ауысты. 44 жылдық еңбек өтілімен 2018 жылы құрметті зейнет демалысына шықты. 2014 жылы Қазақстан су шаруашылығы Қауымдастығы «Су шаруашылығының үздігі» белгісімен, 2012 жылы № 67 бұйрығымен Қазақстан су шаруашылығы кәсіпорындары мен ұйымдары Қауымдастығы" ЗТБ «Су шарушылығы саласының кәсіби қызметкері» белгісімен, Д.А.Қонаевтың 110 - жылдық мерекелік төс белгісімен марапатталды. Сондай-ақ Шу ауданы мәслихатының «Алғыс хатымен», «Таразсушар» РМК атынан «Құрмет грамотасы», Қазақстан Республикасы Ауыл шаруашылығы министрлігі «Казсушар» шаруашылық жүргізу құқығындағы республикалық мемлекеттік кәсіпорнының «Құрмет грамотасы», Шу ауданы әкімінің «Құрмет грамотасы» иегері. Қазіргі таңда «Эльдарада» шаруа қожалығында жұмыс атқарады.
      Елі үшін еміреніп, жұрт үшін жүгіріп қызмет еткен азаматтың ерен еңбегі қашан да елеулі болады. Халықпен бірге жасап, әлеуеттің артуында аянбай қызмет еткен азаматтың бүгіні жарқын, ертеңге деген сенімі мол. Әділхан Жүнісқұлұлының өмірде көрген-түйгені мол азамат. Ол өзімен қызметтес болып, бір жүрген азаматтарды да еске алып, бүгінде сол жылдардың естелігін еске алып отырады. Өңірінде әсіресе өз саласында адал да абыройлы тер төгіп, еңбегін аямаған жан жұмысының жемісін бергеніне қуанады. Бүгінгі жасап отырған кәсібін балаларына да үйретіп, ұрпағының ел қатарлы өсіп-өнуі жолында өзінің игілікті ісін жалғастырып келеді.
      Әрдайым Алла берген ырзығыңыз ортаймай, отбасыңыз аман, деніңіз сау болып, абырой биігінен көріне беріңіз деген игі тілегімізді білдіреміз.