Ардақты азамат
![]()
Жақсының жалғасындай, асылдың тұяғындай, ортасына сыйлы да құрметті азаматтар арамызда аз емес. Әкенің темірдей тәртібі, ананың аялы алақаны, өсіп-өнген ортасының үлгісі адамзат баласы үшін өмірлік азық болмақ. Тектілік әке қанымен, ана сүтімен даритын асыл қасиет дейтін болсақ, кейіпкеріміз Каримбаев Матжан Өтепұлы сондай жақсының көзі, тектінің жалғасы. Сабырлы, байсалды мінезді азамат әкесінің атына кір келтірмеген, "Майдангердің баласымын" деп, сол атқа лайықты бола білген ер.
Каримбаев Матжан Өтепұлы 1946 жылы 1 мамырда Гурьев облысы, Мақат ауданы, Доссор кентінде қызметкерлер отбасында дүниеге келді. Әкесі Өтеп 1913-1970 жылдары өмір сүрген. 1939 жылы Атырау мұнай техникумын бітірген. Ұлы Отан соғысына қатысқан, соғыстан жараланып қайтқан соң, 1945-1947 жылдары Қазақстан коммунистік партиясы Мақат аудандық комитетінде нұсқаушы, өнеркәсіптік-көлік бөлімінің меңгерушісі, 1947-1950 жылдары БКП Ок Байшонас мұнай кәсіпшілігінің парторгы, 1950-1953 жылдары Қазақстан Коммунистік партиясы Мақат аудандық комитетінің хатшысы, 1953-1955 жылдары «Қазмұнайбұрғылау» тресі басқармасының орынбасары, 1955-1973 жылдары Құлсары бұрғылау
![]()
кеңсесі директорының орынбасары қызметтерін абыроймен атқарған азамат. Оның есімі «Қазақстанның мұнай энциклопедиясы» кітабына енгізілген. Қазақ КСР Жоғары Кеңесінің Құрмет грамотасымен және медальдарымен марапатталған. Анасы Ханшайым Мұхамеджанова 1923-1975 жылдары өмір сүрген. 1941 жылы бастауыш сынып мұғалімдерін дайындайтын курстан өтіп, Доссор, Мақат, Байшонас кәсіпшілігінде, 1953 жылы Гурьев мемлекеттік педагогикалық училищесін бітіріп, Гурьев қаласындағы №6 мектепке, Құлсарыдағы Н.А.Островский атындағы орта мектепте бастауыш сыныптарға орыс тілінен сабақ берген ұлағатты ұстаз. Халыққа білім беру саласында сіңірген еңбегі үшін 1965 жылы «Қазақ КСР халық ағарту ісінің озық қызметкері», «Ерлік еңбегі үшін», «В.И.Лениннің туғанына 100 жыл толуы құрметіне» медальдарын омырауына жарқырата тақты. «Жылыой жылнамасы» кітабына есімі енген. Каримбаев Матжан Өтепұлы отбасында жеті ағайынды. Ата-анасы қызмет ете жүріп, балаларына өте жақсы тәлім-тәрбие берді. Әрқайсысының қарым-қабілетіне қарай, таңдаған жоғары оқу орындарында оқып, білім алып, сала мамандары ретінде еңбектенулеріне ықпал етті. Балалары
![]()
ата-ана үмітін ақтап, елдің елеулі азаматтары қатарынан көрініп, ұрпақтарының қызықшылықтарын көруде. Матжан Өтепұлы өзінің еңбек жолын 1963 жылы Құлсары мұнай барлау экспедициясының тампонаж цехында слесарь болып бастады. Экспедиция Гурьев облысы аумағында іздестіру-барлау жұмыстарын жүргізген. Білім алуды көздеген жас 1965 жылы И.М.Губкин атындағы Мәскеу мұнай-химия және газ өнеркәсібі институтына оқуға түсіп, оны 1970 жылы «Тау-кен инженері» мамандығы бойынша ойдағыдай аяқтап шықты. Институтты бітірген соң өз қалауымен Қазақ КСР Геология министрлігіне жіберілді. Онда Гурьев ірілендірілген мұнай барлау экспедициясында жұмысын бастады. Бұл жерде білімді жас Құлсары мұнай барлау экспедициясына тағайындалды. Осылайша, институттан соң өзінің бұрынғы ұжымына дипломды маман болып оралып, еңбек жолын бұрғышының 4-дәрежелі көмекшісі болып жалғастырды. Еңбек тәжірибесі жинақталуына қарай біртіндеп бұрғышы, бұрғылау шебері, аудандық технологиялық қызметтің аға инженері, техникалық бөлім
![]()
бастығы, бас технолог болып, кейіннен Оңтүстік Ембі терең бұрғылау мұнай барлау экспедициясының бас инженері лауазымына көтерілді. Тәжірибелі азамат 1984-1986 жылдары Ауғанстан Демократиялық Республикасына шет елдік іссапарға жіберілді. Тортай ауданында бұрғылау шебері болып еңбек ете жүріп, осы кен орнын алғаш ашушылардың бірі болды. Тортай ұңғымасында 1976 жылы 2349 метр тереңдікте мұнай көзі анықталған. Бұл кен орнында 2797-2349 метр тереңдікте 6 мұнай қабаты анықталды. Оңтүстік Батыс Үлкентөбе, Биікжал, Адай, Шөлқара, Равниная, Ұялы, Қарақыз, Қисынбай ауданы қазіргі уақытта «Жылоймұнайгаз» МГӨБ өндірістік учаскелерінің бірі болып табылады. Матжан Өтепұлының бұл ұжымдағы еңбек өтілі 28 жылды құрайды. 1991 жылы маусымда Оңтүстік Ембі терең бұрғылау мұнай барлау экспидициясы және «Тенгизнефть» МГӨБ басшылығының келісімі бойынша «Тенгизнефть» МГӨБ бұрғылау бөліміне ауысты. 1993 жылы 6 сәуірде «Тенгизшевройл» БК құрылуына байланысты ТШО компаниясының бұрғылау бөліміне жетекші маман болып ауыстырылды. Өз саласын бес саусағындай терең меңгерген тәжірибелі маман қазіргі уақытта Теңіз, Королевское кен орындарында бұрғылау бөлімі жұмысын жақсарту, ұңғымалардың авариясыз жұмыс жасауы бойынша шетелдік мамандармен бірлескен жұмысқа белсене араласады. Мұнай саласындағы бас мамандармен еңбек тәжірибесін бөлісуге ерекше көңіл бөледі. 2006 жылы мамыр айында 63 жасқа келуіне байланысты құрметті зейнеткер атанды. Бірақ оған қарамастан қазіргі уақытта ұжымда жемісті еңбек етіп келеді. Ел алдында абыройлы еңбегі лайықты бағасын алып, «КСРО Геологиясына 100 жыл» значогымен марапатталды. Есімі 2005 жылы қайта басылған «Қазақстан мұнай энциклопедиясы» кітабына, 2008 жылы «Жылыой жылнамасы» кітабына енді. 2006 жылы Теңіз кен орнын игерудің 15 жылдығы құрметіне арналған значогін омырауына тақты. 2013 жылы «Тенгизшевройл БК 20 жылдығы» және осы ұжымдағы еңбек өтілінің 20 жылдығы құрметіне арналған үш гауһарлы значокты иеленді.
![]()
Матжан Өтепұлының орнықты ойлылығы, іскерлігі, байқағыштығы, білімдарлығы, азаматтығы мен адамгершілігі, көсемдігі мен шешендігі, абзалдығы мен ағалығы, арлылығы бір бөлек әңгіме. Оның мінезінің ерекшелігі – адамның көңіл кілтін таба білетіндігі. Әділетті, шынайылықты жан сүйеді. Қайнардай таза мөлдір көңілімен, кең жүрегімен, мейірімділігімен жақындарын ғана емес, қалың көпшіліктің көңілінен шығып жүретіні анық. Азаматтық тұлғасы мен адами қадір-қасиеті, кемел келбеті мен кісілігі, биік болмысы оның жоғары парасат иесі екеніне еріксіз бас идіртеді.
-Еңбек адамды қуанышты сезінуге, өзіне деген сенімділікке жетелейді, бақытқа, байлыққа жеткізеді. Әрқашан өз ісіме адал болып, еңбектің тәтті дәмін татып келемін. Нағыз бақыт шүкіршілікте ғой. Адал еңбекті бағалап, қадірлеуді ата-анамыздан бала кезімізден бойымызға сіңіріп өстік. Әкеміз күн ұзақ еңбектен шаршап келсе де, үйге келген соң да дала еңбегінен қол үзбейтін. Сонда әкеміздің қайраттылығына, қайсарлығына, еңбекқорлығына, дариядай ақылына тәнті болатынбыз. Анамыз көпбалалы, құрметті, сыйлы жан болды. Ол
![]()
да белі бүгілмей еңбектен рахат тапқан жан. Анамыз өте мейірімді, қамқор еді. Өзгенің баласының басынан сипап, құшағына қысатын. Үнемі дастарханы жайнап, есіктен кірген жанға ас-дәм таттырмай жібермейтін. Үйге келген әрбір адамды құтты қонақ деп дастарханын жайып жататын. Үлкендері кішілеріне қамқор болып, бірінің айтқанын бірі істейтін. Ата-анамыздың осындай өнегелі істерінің, ақылдарының арқасында бой түзедік. Балаларымызға да соны айтып түсіндіріп, ата-ана жолымен тәрбиелеп келеміз. Адамның ниетіне қарай береді дейтін сөз бар ғой. Анама қарап, болашақ жарым анама ұқсайтын келін болса дейтінмін. Мамандық таңдауда қателеспеген мен, жар таңдауда да жолым болған азаматпын. Жұбайым Роза Ғалиқызы 1948 жылы туылған. Педагог. Қазіргі уақытта зейнет демалысында. Мерейлі отбасында үш бала тәрбиелеп, өсірдік. Үлкен ұлымыз Әлібек 1972 жылы туылған. Отбасылы, 3 баласы бар. «Жылоймұнайгаз» МГӨБ техникалық бөлімінде жетекші маман болып қызмет атқарады. Екінші ұлымыз Асылбек 1980 жылы туылған. Отбасылы, 4 баласы бар. «Неборс» компаниясында бұрғышы болып еңбек етеді. Теңіз кен орнында жетекші бұрғылау жұмыстарын жүргізеді. Кенже қызымыз Зарина 1985 жылы туылған. Тұрмыста, 3 баланың анасы. Аллаға мың да бір шүкір, еңбегіміздің жемісін көріп келеміз, -дейді Матжан
![]()
Өтепұлы. Қазақы қасиеттері бойына дарыған, адамгершілігі мол, өмірде қарапайымдылығымен, зиялылығымен, таудай биік, даладай асқақ пейілімен көпке үлгі болып отырған ардақты азаматқа мықты денсаулық тілейміз!
![]()