Адамгершілікті, адалдықты, тектілікті, кішіпейілділікті, ар-намысты өзінің бойында ту етіп ұстайтын сала мамандары жетерлік. Ондай жандар өзінің жүрек қалауымен таңдаған мамандығына берілгені сонша, күн секілді адамдарға жан жылуын бөліп, айналасын жарқыратып жүреді. Сондай жандардың бірі де бірегейі заңгер, қорғаушы Мырзатаев  Жаналидин Абубакирұлы.
      Қазақстан Республикасының заң саласында бірнеше жыл қызметтер атқарып келе жатқан Жаналидин Абубакирұлы 1964 жылдың 22 мамырында Оңтүстік Қазақстан облысы, Ленгер ауданы, Жамбыл ауылында дүниеге келді. Әкесі Абубакир медицина саласының қызметкері болса, анасы Мариям Шалқарқызы ұзақ уақыт бойы әкесінің жанында медбике қызметін атқарған. Ата-анасы 8 ұл, 2 қыз тәрбиелеген ұлағатты жандар. 
      Тамырын тереңге жіберген үлкен әулеттің саналы ұрпақтары туралы тарқатып айтсақ, үлкен ұлы Диқанбай Абубакирұлы бірнеше жыл бойы ауыл шаруашылығында қызмет атқарып, өмірінің соңғы жылдарына дейін Шымкент қаласындағы көпсалалы Политехникалық колледжінде сабақ берген. Ұлы Бауыржан Абубарикұлы Шымкент қаласының зауыттарында механик қызметтерін атқарды. Қазіргі таңда Оңтүстікке танымал меценат азамат. Нураллидин Абубакирұлы темір жол саласында жұмыс істеп жүріп дүниеден озған.       Әке жолын қуған қызы Фарида Абубакирқызы Алматы қаласындағы үлкен емханаларды басқара жүріп, қазіргі таңда үлкен бір емхананың бас дәрігері қызметін атқарады. Ұлы Ибраһим Абубакирұлы Алматы қаласында бірнеше жыл білім ордаларында басшы қызметтерін атқарып, қазіргі таңда құрылыс бизнесінде жұмыс істейді. Ұлдары Жомарт Абубакирұлы және Абдыраман Абубакирұлы энергетика саласында үздіксіз қызмет жасап келеді. Қызы Бибігүл Абубакирқызы 1990 жылдан бастап Алматы қаласында сауда саласында үзбей жұмыс жасап келеді. Кенжетайы Ильяс Абубакирұлы Алматы қаласында тұрады. Құрылыс маманы.
      Әкесі Абубакир 1960-1970 жылдары сол кездегі Шымкент облысы, Ленгер ауданының таулы аймақтарында фельдшер қызметін атқарғандықтан, кейіпкеріміз де сол Ленгер ауданы, Майбулақ ауылының мектебінде білім алды. Сары даланың киесі мен қасиетін бойына тұндырып жатқан құтты өлкеде бақытты балалығын өткізіп, талай тарландардың табаны тиген қасиетті топырақта аунап өсті.       Жас та болса бас болып, сыныптың қоғамдық өміріне белсене араласып, мектепішілік спорттық іс-шараларға белсене қатысты. Әке тәрбиесі, ана тәлімімен бойына сіңген өнегелілік, үлкеннің айтқанын бұлжытпай орындау, тілалғыштық, ұстазының берген тапсырмасын уақытылы, тиянақтылықпен орындау Жаналидинді өз қатарластары алдында беделді етуімен қатар, сыныптың көшін алға сүйрейтін оқушылардың бірі етіп шығарды. 
      Ұлылардың тұсауын кескен білім ордасы – қай жеткіншектің де жүрегінді үміт оты тұтанған талапкерлердің де армандарға қол жеткізуіне сеп болар алғашқы сатысы. Арман дейтін алып шың – биікке қанат қаққан, ұмтылысынан қайтпайтын өжет, талапты, еңбекқор ұландардың ғана табан тигізетін орны. Әкесінің қызметіне байланысты одан арғы білімін Карл Маркс атындағы мектеп интернатында жалғастырып, Георгиевка селосындағы орта мектебін бітіріп шыққан Жаналидин Абубакирұлы үкімет және партияның жолдауымен Халықаралық жүк тасымалдау істері бойынша қызмет атқарып 1991 жылдары «Жолаушы» мемлекеттік кіші кәсібі орнында директор қызметіне тағайындалып, бірнеше жыл транспорт саласында жұмыс істеген.
      «Оқу – инемен құдық қазғандай» деген, алдына мақсат қойып соған жету жолында ізденіс пен еңбекқорлығын жанына серік еткен Жаналидин Абубакирұлы өз ісінің кәсіби маманы болып шығу үшін одан әрі білімін жалғастырды. 2008 жылы заң саласында алғашқы жұмыстарын азаматтық істерді жүргізуден бастап, 2014 жылы Шымкент қаласының М.Сапарбаев атындағы гуманитарлық институтын аяқтап, 2017 жылы адвокаттық қызмет атқаруға мемлекеттік лицензиясын алып, бүгінгі таңда тұрғындарға заңдық құқықтық қызмет көрсетіп келеді.       Бастаған ісін аяқсыз қалдырмайтын өзіне сеніп тапсырылған іске деген жауапкершілігі, түсініксіз жайттардың бетін жауып қоя салмайтын, ізденіп, оқып шешімін табатын табандылығы мен қандай күрделі болса да сабырлылық танытып орындап шығатын еңбекқорлығы, еңбек жолын енді бастаған жас маманда ұжымында бедел биігіне көтеріле білді.
      Кейіпкеріміз Жаналидин Абубакирұлы қазіргі таңда Шымкент қаласының адвокаттар алқасының жеке-дара адвокаты. Заңгерлік «Параграф» басылымында және facebook парақшаларында мақалалары жарияланып тұрады. Қазіргі таңда ҚР адвокаттарының кәсіби құқықтарын қорғау жөніндегі комиссиясының мүшесі.
      Жаналидин Абубакирұлы білікті маман, сауатты заңгер, қорғаушы ғана емес, отбасында да аяулы жар, асқар тау әке. Жұбайы Айша Егенқызымен 35 жыл отасып, 2 қыз, 2 ұл тәрбиелеп өсіріп, ұлын ұяға, қызын қияға қондырып отырған бақытты отбасы. Тұңғышы Айгерім Жаналидинқызы – заң саласының қызметкері, Ботагөз Жаналидинқызы - Алматы қаласының адвокаттар алқасының адвокаты болса, үлкен ұлы Даулет Жаналидинұлы жеке кәсіпкерлікпен айналысады. Кенжесі Медет Жаналидинұлы заң саласында қызмет атқарады.      Өз ісіне тиянақты, қай кезде болмасын ізденіс үстінде жүретін, терең ойлы, өзіндік пікірі бар азамат жан-жақтылығымен, жұмысбастылығымен, әр ісін аяғына дейін жеткізетіндігімен ерекше. Халықтың құрметіне бөлену елге ерінбей еңбек еткен адамға тән қасиет десек, кейіпкеріміз сол үдеден шыға білген білікті де білімді маман.       Иә, адал еңбек ету қажеттіліктен тумайды, ол үлкен азаматтық жауапкершіліктен туындайды. Ел сенімін ақтаудың қаншалықты маңыздылығын қолынан іс келетін азаматтардың мойнына алған жауапкершілік жүгінен аңғаруға болады.
      Біз Жаналидин Абубакирұлына одан әрі сәттілік тілеп, оның жоспарларының жүзеге асуына іскерлік қабілет пен мықты денсаулық тілейміз!