Еліміз тәуелсіздік алып, азаматтық қоғамның қалыптасуы құқықтың маңызын арттыра түсті. Қазіргі таңда заңгердің көмегіне жүгінбейтін әлеуметтік саланы табу мүмкін емес. Олар заң шығару, орындаушы және сот билігінде, прокуратура мен адвокатурада қызмет етеді. Кәсіпорындарда, әлеуметтік-мәдени, ғылыми-зерттеу, білім беру мекемелерінде, коммерциялық құрылымдарда, қоғамдық бірлестіктерде құқықтық бөлімдер, бюролар ашылған, заңгер қызметіне арнайы штат бөлінген. Заңгерлер заңнамалық және заң шығару органдарының басқа да комитеттерін басқарады. Олардың барлығы да қызмет барысында қарым-қатынасқа түседі. Заңгерлердің кәсіби қатысымы басқа сала мамандары қатысымынан өзгеше, қызмет сипатына қарай өзіндік ерекшеліктерге ие.
      Заңгерлік жұмыс – өте күрделі және ауқымды қызмет. Оның мазмұны бір жағынан Конституциямен бекітілген азаматтардың құқығын қорғауды, ал екінші жағынан әр азаматтың құқықтық нормаларды қалтқысыз сақтауын қамтамасыз етуді, кез келген қоғамға қарсы және заңға қайшы әрекеттермен, қылмыспен күресуді қамтиды. Мазмұнына қарай заңгерлік қызметтің мынадай түрлері бар: төрелік ету, прокурорлық қадағалау; азаматтар мен ұйымдарға құқықтық көмек көрсету (адвокаттық қызмет), нотариалды әрекеттер жасау; мемлекеттік органдардағы, кәсіпорындардағы және ұйымдардағы құқықтық жұмыс. Құқықтық қызметтің аталған түрлеріне құқықтық мамандықтар да сәйкес келеді: тергеуші, прокурор, сот, адвокат, нотариус, құқықтық кеңесші. Бірақ бәрі сайып келгенде бір заңгерлікпен басталатын іс. Біз де бүгін осы заң саласында қызмет етіп, бүгінгі таңда құрметті зейнет демалысына шыққан білікті маман туралы айтып өтпекшіміз. 
      Өз ортасында беделді, адамгершілігі мол, ақ көкірек, ашық мінезді зайырлы мемлекеттің заң саласында еңбек етіп, түрлі басшылық қызметтерде абыройлы қызмет атқарған Нұрхасанова Ақзиба Базарбайқызы 1957 жылы 17 наурызында Ақтөбе облысы, Қобда ауданы, Жиренкопа кеңшарында дүниеге келді. Қойнауы қазынаға толы кенді өлкенің еркелей соққан самалына бұрымын сүйдіріп, тарихта таңбасы қалған ақтаңдақтар мен тарлан дарабоздардың табаны тиген өлкеде бақытты балалығын өтікізіп, үлкен өмірге қанат қақты. 
      Білім атты асқарға 1964 жылы ҚазССР-нің 15 жылдығы атындағы орта мектебінде құлаш ұрып, кеудесін білім сәулесімен нұрландырды. Іске мығым, өзіне сеніп тапсырылған тапсырманы мұқият орындағанша тыным таппайтын жауапкершілігі мол оқушы, мектепішілік өткізілген жарыстарда бақ сынап, жүлдегерлер қатарынан көрінді. Сабаққа үнемі дайындықпен барып, алдына үлкен мақсат қоя білетін Ақзиба       Базарбайқызы 1974 жылы ҚазССР 15 жылдығы атындағы орта мектепті бітіріп шыққаннан кейін Жиренкопа аудандық тұтыну одағы ҚазССР 15 жылдығы атындағы кеңшарда ыдыс-аяқ сататын дүңгіршектің сатушысы болып жұмысқа орналасты.
      1975 жылы маусым айынан бастап сол тұтыну одағындағы азық-түлік дүкенінің сатушысына ауыстырылған Ақзиба Базарбайқызы 1981 жылы Исатай ауданы Сұғалы ауылдық кеңесінің хатшысы болып, 1982 жылы Сұғалы ауылдық кеңесіне есепші болып ауысты. 
      Ақтөбеге қоныс аударуына байланысты Ақтөбе геотехника зауытына слесарь болып жұмысқа қабылданып, жеті ай жұмыс істегеннен кейін Ақтөбе облысы прокуратурасына хатшы-машинист-машинистка, одан кейін бөлімшенің аға инспекторы қызметіне ауысады.
      Қолына алған қандай іске да жан бітіріп, шырайын шығарып шыр айналдырып жіберетін жас маман «оқыдым» деп бір мамандықтың тізгінінде жабысып қалмады. Қоршаған ортаға да өзіндік көзқараспен қарап, қоғамдық мәселелерде түйінді мәселенің тінін тарқатуға ақыл-кеңесін қосып, үнемі еңбек майданында жүгіріп жүрді. Оны сол жас кезіндегі атқарған мына бір ақшалай сыйақыларынан білуге болады.
      1985 жылы Ақтөбе облысының прокуратурасы қызметтік міндеттерін адал атқарғаны үшін ақшалай сыйақы тағайындалса, 1987 жылы Октябрь революциясының 70 жылдығына орай ақшалай сыйлық беріліп, 1990 жылы 30-40 және 50-жылдардың басында негізсіз қуғын-сүргінге ұшыраған азаматтарды оңалту жұмыстарының қорытындысы бойынша бір айлық лауазымдық жалақысына үстемақы алады. Ақшалай сыйақы беру одан әрі де жалғасын тауып, 1993 жылы 8 наурыз халықаралық әйелдер күніне орай ақшалай сыйлық алса, 1994 жылы 8 наурыз мерекесіне орай материалдық ынталандыру және ақшалай сыйлық еншілейді.
      1995 жылы 16 мамырда Ақтөбе қалалық сотына І санатты машинистка хатшы болып жұмысқа қабылданған Ақзиба Базарбайқызы 2001 жылы 1 қаңтарда Ақтөбе сотының маманы болып бекітілді. 2002 жылы Ақтөбе сотының жетекші маманы болып бекітіледі. Осы заң саласында еңбек жолын жалғастырған кейіпкеріміз 2005 жылы Қазтұтыну одағы Ақтөбе кооперативтік колледжін заңгер мамандығы бойынша және «Қайнар» университетінің заң факультетіне оқуға түсіп, 2008 жылы «Заң бакалавры» біліктілігін алған Ақзиба Базарбайқызы 2008 жылдың 2 қыркүйегінде «Alex-U» ЖШС заңгерлік кеңесінің атқарушы директоры болып таға-
йындалды.
      Додаға түскеннің бәрі тұлпар бола бермейтіні секілді, билік тізгінін ұстағанның бәрі басшылықты орынға лайықты деп айту қиын. Өзінің емес өзгенің өміріне жауап беру, нарға да ауырлық танытатын ауыр жүкті арқалап алдыға жүру, міндеттелген жүктемелерді уақыты орындай барысында жұмыстың әділ әрі лайықты жүруын қадағалау әп дегеннен үйреніп кететін жұмыс емес. Аудан орталығынан алыс жатып, шаруасы шалағайлау болып жатқан елдің әлеуетін көтеру, бір облыстың тұрмысы төмен халқын тауып, шаруашылықтың аяққа тұрып кетуі үшін көмек көрсету барысында Ақзиба Базарбайқызы өзінің біліктілігінің жоғары екенін дәлелдеді.
      2014 жылы Қобда ауылындағы тұрғылықты жеріне қоныс аударып, Қобда ауданының орталық аудандық ауруханасына заңгер болып жұмысқа орналасқан Ақзиба Базарбайқызы 2017 жылы құрметті зейнет демалысына шықты.
      Адамның жүріп өткен жолы оның еткен еңбегімен бағаланады емес пе?! Біз әңгімеге арқау етіп отырған кейіпкеріміз нәзік жанды болса да ер азаматқа бергісіз тіршілік баянын кешіп, табандылығының, іскерлігінің, жан-жақтылығының, ізденімпаздығының арқасында абырой биігінен көрініп, лайықты марапатын алды. Жалпы жақсы адамдар арамызда аз емес қой. Олардың өмір жолын жазып, басқаларға үлгі етіп қалдыру азаматтық парызымыз болмақ.
      Ақзиба Базарбайқызы 2007 жылы Ақтөбе сотының төрағасы көп жылғы адал еңбегі үшін және Қазақстан Республикасының Конституциясы күнін мерекелеуге байланысты Алғыс хат иеленді.
      Қандай ортаға барса да қабағы жадырап сала беретін жылы шырайлы, өскелең ұрпақтың өнегелі тәлім-тәрбие алуы үшін қолынан келгенін аямайтын Ақзиба Базарбайқызы жастардың тұлғалық әлеуметтенуіне атсалысып, келешек алтын білікті ұрпақтың тәрбиесіне жанашыр болып жүрген асыл жан.
      Құқықтық қоғамның қатаң тәртібін қадағалап тұрған заң саласы – зайырлы елдің тыныштығының, бірлігінің, берекесінің, татулығының кепілі. Сол заңның қадағалауын атқаратын құзырлы органдар болмаса, қоғамды кім қауіпсіз деп айта алады. Ауырлығы арқаға батар заң саласының бір жүгін көтерісіп, елдік пен құқықты мемлекет болып қалыптасу жолында аянбай күш-жігерін жұмсап, ұлт болашығының берік қолда болуына атсалысып, еңбек ете білген Ақзиба Базарбайқызына халықтың берер бағасы жоғары.
      2023 жылдың басынан бері Қобда ауылындағы Мәдениет үйінің жанындағы «Айқаракөз» ансамблінің мүшесі, қазіргі таңда Қобда ауылында өткізілген іс-шараларға белсене араласып келе жатқан Ақзиба Базарбайқызының деніне саулық, отбасына амандық тілейміз!