Қоғамның әлеуметтік-экономикалық дамуында білім беру жүйесі жетекші рөл атқарады. Білім саласындағы нағыз мамандар белгілі бір деңгейдегі жұмыс жоспарын ұстанып, мақсаты мен міндетін, бағытын тиісінше ұйымдастырып, ұсына білумен ерекшеленеді. «Ұстаз» атты ұлы тұлғалардың қатарынан оза шауып, қазіргі таңда өз әріптестері үшін аянбай еңбек етіп жүрген бүгінгі біздің сөз болғалы отырған кейіпкеріміз – Алишарипов Тәуірбек Мырзаханұлы.
      Алишарипов Тәуірбек – дене шынықтыру пәнінің мұғалімі, күрестен спорт шебері, Республикалық жарыстардың бірнеше дүркін жүлдегері. Тәуірбек Мырзаханұлы 1955 жылы тамыз айының 18-жұлдызында Сыр өңіріне қарасты Жалағаш ауданы, Дәуімбай елді мекенінде дүниеге келген. Балалық шақтың бал күндері аталған өңірде жарқын естеліктерге тола қылып өткізіп, 1962 жылы алғаш рет шәкірт атанып, Жалағаш қыстағында №123 орта мектепке 1-сыныпқа қабылданады. 1972 жылы №202 орта мектептің түлегі атанып шығады. Мектеп қабырғасынан Тәуірбек мырза қоғамдық жұмыстарға, спорттық ойындарға белсене қатысушылардың бірі бола білді. Мектепте оқып жүрген кезінде алғаш ауданға Құлмұрат Күбеев еркін күрес үйірмесін ашып, аудан спортшыларын жаттықтырған болатын. Солардың ішінде денсаулығы төмен болса да, Тәуірбек жаттығып, еркін күрес үйірмесіне қатысып, дүбірлі додаларда бой көрсете бастады. 1970 жылы бірінші спорт жарысына қатысып, аудан жеңімпазы атанады. Сол жылдан бастап, спорт саласына бірыңғай бет бұрып, Қызылорда облысы бойынша Қазақстан Республикасының спорт мектептері арасындағы Республикалық жарыстарынан жүлделі орындарын иеленіп, жаттықтырушы мерейін арттыра бастады.
      Еліміздің әрбір ер азаматы Отан алдындағы азаматтық борышын өтеуге міндетті. Бұл дағдыдан айнымаған Тәуірбек Мырзаханұлы 1974-1975 жылдары әскер қатарында борышын атқарып, Қарулы күштер арасында еркін күрестен Орта Азиялық әскери күштер округінің жеңімпазы атанды.
      Болашақ мамандығына бағам жасап, өмірдегі көп мамандықтардың ішінде жан-жақты білімділікті, икемділікті, шеберлікті, ерекше шәкіртжандылықты, мейірімділікті қажет ететін ұстаздық мамандығына таңдау жасайды. Ұстаз – адам жанының диқаншысы. Тұлға тәрбиелеудің, жеке тұлғаны қалыптастырудың бағбаны. Кіршіксіз пәк сезімді жас ұрпақты арман жолына жетелейтін, білімнің қия шыңына көтеріп, жүректің батырлығын, сезімнің ақылдылығын, мінездің жайлылығын, адам бойындағы асыл қасиеттердің жиынтығын қалыптастыратын ұлы қасиетке ие жандардың қатарын толықтырмаққа Тәуірбек мырза аянып қалған емес-ті. Осы негізді ұстана отырып, кейіпкеріміз 1976 жылы Тәжік мемлекеттік дене шынықтыру институтына оқуға түсіп, спорттық дағдыларды ол жақта да тастамай, Тәжікстан Республикасының еркін-күрестен Республика чемпионы атанады. Ел азаматы өз мүмкіншілігін пайдала отырып, түрлі Бүкіл Одақтық спорт жарыстарына қатысып, жүлдегер атанып, еркін күрестен спорт шебері атағына қол жеткізеді. 1980 жылы Тәжікстан мемлекеттік дене шынықтыру 
институтын тәмамдап, алғашқы мансаптық жолына қадам басады. Өзінің қызметін Жалағаш ауданының жасөспірімдер спорт мектебіне еркін күрестен жаттықтырушы болып орналасудан бастайды. Аталған мектептің оқу ісінің меңгерушісі қызметін абыроймен атқарып, әріптестер арасында сыйластыққа да ие бола білді.
      Ұстаз атана білу, оны қадір тұту, қастерлеу, арындай таза ұстау – әр мұғалімнің борышы. Осы бір ұстазға лайық борышты ар тұтып, өз ісі мен өзінің шәкірт алдындағы міндетін жетік біліп, шәкірттері мен әріптестерінің көңілінен шығуды мақсат тұтқан Тәуірбек Мырзаханұлы спорт мектепте жаттықтырушы болып жүрген кезде көптеген аудан, облыс, республикалық жарыстарға өз оқушыларын қатыстырып, жүлдегер спортшылар дайындап, шәкірттері ұстаз мерейін арттыра түсті. Қазіргі уақытта шәкірттері спорт саласында белгілі қызметтерде жұмыс атқарып жүрген жайы бар. Солардың ішінде: ҚР спорт «жарыстарының жүлдегерлері Дүйсекенов С., Өлментаев Қ., Әуесбаев Дия, Сүндетбаев А., Алайдаров М. және тағы басқа шәкірттерімен Тәуірбек мырза мақтан тұтып келеді. Өз пәнінің теориясы мен әдістемесін жетік меңгерген маман, дарынды балалармен жұмысты жоғары денгейде ұйымдастыра білді. Ұлағатты ұстазымыздың шәкірттері олимпиадалардан жүлделі орындарға қол жеткізді. 2012-2013 оқу жылында Тәуірбек мырзаның шәкірті Отаркулов Н. республикада «Еркін күрестен» І орын, 2012-2013 оқу жылында шәкірті Ботаев А. қалалық «Дзюдо» жарысынан 1 орын, 2012-2013 оқу жылында шәкірті Шәмшиев Н. қалалық «Еркін күрес» жарысынан І орын, қалалық «Баскетбол» жарысынан ІІІ орын, 2014-2015 оқу жылында Ұлттық ойын «Тоғызқұмалақтан» қалалық жарыстан орын иеленді. Кәсіби маман атанған ұстазымыз жинақтаған теориялық білімін әріптестерімен бөлісе отырып, мектепте баяндамалар, панорамалық сабақтар, ауданда баяндама, қалада ашық сабақтар көрсетіп, заманауи тәсілдің ерекшелігін, шәкірттеріне алған білімін орынды жерде қолдана білуде басты назар аударады. Соның нәтижесінде аудандық білім бөлімінен және «Өрлеу» ҰБАО-нан қалалық, мектепішілік мақтау қағаздарымен марапатталды.
      Өзінің жинақтаған өндірістік білімін басылым беттеріне арнай білген ұстазымыз 2013 жылы «Арт-спорт» журналы Республикалық басылым студент практиканттардың педагогикалық практикасы жайлы, 2013 жылы Халықаралық «Дала» журналы, 2015 жылы Республикалық басылым «Сынып жетекшісінің анықтамасы» журналы, «Мектептегі дене шынықтыру» мақаласын жарыққа шығарды.
      Ел азаматының қызметтік жолында өзгерістер орын алып, 1980-1993 жылдары аралығында Жалағаш ауданында «Қайрат» ерікті спорт қоғамының төрағасы қызметіне сайланып, нәтижелі жұмыстарды атқара білді. Қызмет атқару барысында Ауыл спортын өсіп-өнуіне атсалысып, ел қошеметіне бөлене түсті. Аудандық спорт комитетінің жетекшісі Толеков Бақытбек Қаппарұлы екеуі ауданда «Алтын-күз» спартакиадасын өткізіп, ұлттық спорт түрлерін қазақша күрес, тоғызқұмалақ және т.б. ойындарын дамытуға үлес қосып, көпті өз іскерліктерімен тәнті ете білді. Сол тұста, ПМК-14 мекемесінің басшысы, Республика сенатының депутаты болған, ардагер құрылысшы - Баймаханов Қожахмет ағамызбен спорт алаңдарын әр совхозда жасап, Бұқарбай батыр атындағы совхозында жеке бассейн, спорт алаңдары, сауықтыру орындары салынып, футболдан халықаралық Польша Республикасы мен аудан құрама командасы арасында жолдастық кездесу жасыл алаңда өтіп, 5:4 есебімен Ауданның құрама командасы жеңіске жеткен еді. Тәуірбек мырза спортты жасөспірімдерге насихаттау барысында спорт ойындары кезінде спорттық лоторея өткізіп, қыс мезгілдерінде ауданда балық аулау жарыстарын ұйымдастыра білуі кәсіби шеберлігінің бір көрінісі.
      Өз ісінің кәсіби маманы атанған Тәуірбек Мырзаханұлы жасөспірімдер спорт мектебінің оқу ісінің меңгерушісі, «Қайрат» спорт қоғамының төрағасы, Қ.А.Яссауи атындағы №123 мектеп гимназиясының дене шынықтыру бірлестігінің жетекшісі қызметін абыроймен атқарып, зейнеткерлік демалысқа қол жеткізіп отыр. 
      Тәуірбек Мырзаханұлы – басқару ісін жетік білетін ұйымдастырушылық қабілеті мол іскер маман. Осы ретте, өз білімін тәжірибе жүзінде жүзеге асырып жүрген жан 30 жыл педагогикалық еңбегінде жас жеткіншектерді тәрбиелеуде әкімшілік қызметпен қатар, өз пәнін жоғары дәрежеде оқытуда бар күшін аямай жұмыс істеген ұлағатты ұстаз атана білді. Ұлағатты ұстазымыз Алматы қаласы бойынша дене шынықтыру пәні мұғалімдері арасында «Әдістемелік әзірлемелер бағытында» 1 орын иегері атанса, ҚР БжҒМ Дене тәрбиесі ұлттық ғылыми-практикалық орталығының төсбелгісімен марапатталды. Күрестен спорт шебері атана білді. 46 жыл еңбек өтілі бар ұстазымыз өмір жолында «ҚР Құрметті спорт қызметкері» төсбелгісінің, «Ы.Алтынсарин» медалінің иегері. Сондай-ақ ҚР және Алматы қаласының жылдың ең үздік «Дене тәрбиесі мұғалімі» байқауының жеңімпазы атанды.
      Тәуірбек Мырзаханұлы – жанындағы бірге жұмыс жасайтын қызметтестеріне, жолдастарына адал және әрқашан көмектесуге дайын тұратын азамат, жас мамандарға жауапты тәлімгер ретінде көпке танымал тұлға. Әрбір бірге жұмыс жасаған ұжымдастары мен әріптестерінің арасында достық атмосфераны қалыптастыра білетін азамат ретінде де ерекшелене түседі. Басшылық тарапынан берілген тапсырмаларды орындау кезінде белсенділік танытып, уақытылы және шебер орындап, осы мінезінің арқасында үлкен жетістіктерге жетіп, құрметке ие болып келеді.
      Тәуірбек мырза жастар мен жасөспірімдер спорттын дамытуға, салауатты өмір салтын қалыптастыруға және бұқаралық спортты дамытуға сүбелі үлес қосты. Жаңашылдықтың дәуірін басынан кешіріп жүрген талантты да талапты оқушыны тәрбиелеуде, осындай жаңа даму үрдіс жолында ұстаз үшін еңбектің жанғандығы, шәкірттің бел-белестердің сүрінбей өткендігі ұстаз үшін қашанда мәртебе.
      Тəуелсіз еліміздің өркендеп өсуі үшін аянбай еңбек етіп келе жатқан Тәуірбек Мырзаханұлы отбасында да адал жар, асқар тау әке, немерелерінің сүйікті атасы. Жан жары Алишарипова Нарбу Бадашқызы екеуі үш ер азамат және бір қыз тәрбиелеп өсірді. Барлық балалары Қызылорда облысы, Жалағаш ауданының тумалары. 
      Жұбайы Алишарипова Нарбу Бадашқызы 1957 жылы 7 тамызда Жамбыл облысы, Мерке ауданында дүниеге келген. Жамбыл жеңіл өнеркәсіп институтын бітірген – инженер-технолог. Жұмыс өтілі – Тұрмыстық қызмет орталығында бас маман қызметін атқарған. 
      Алишарипов Мақсұт Тәуірбекұлы 1982 жылы 1 қаңтарда дүниеге келген. Жоғарғы оқу орнында екі мамандықты тәмамдаған: 1) Жүргенов атындағы Өнер академиясында – суретші-зергер, 2) Алматы Үздіксіз білім беру университетін заңгер мамандығы бойынша. «ЧСИ Мырзахан» футбол командасының қатарында Алматы қаласы «Футбол әуесқойлары лигасының» жүлдегері. Жұмыс өтілі барысында бірнеше ұлттық мұражайлардың безендіруіне қатысқан (Әл-Фараби атындағы КазҰУ, Асфендиаров атындағы Медициналық университеті, ҚР орталық мұражайлары және т.б.). Отбасында екі ер бала және бір қыз бала тәрбиелеп отыр.
      Мырзахан Қуаныш Тәуірбекұлы 1983 жылы 22 маусымда дүниеге келген. Жоғарғы оқу орнында екі мамандық тәмамданған: 1) М.Тынышпаев атындағы Қазақ көлік және коммуникация академиясында – Жол жүру қатынастарын ұйымдастыру, 2) Алматы Үздіксіз білім беру университетін заңгер мамандығы бойынша. Бокстан спорт шеберіне үміткер, студенттер арасында ҚР чемпионы. Жұмыс өтілі барысында ҚР қаржы полиция департаменті және прокуратура басқармаларында мемлекетке қызмет еткен. Қазіргі таңда жеке сот орындаушысы ретінде қызмет атқарады. Үйленген, екі ер бала және екі қыз бала тәрбиелеп отыр.
      Алишарипова Айғаным Тәуірбекқызы 1988 жылы 1 қаңтарда дүниеге келген. Абылай хан атындағы Қазақ халықаралық қатынастар және әлем тілдері университетінде, шет тілдер (франция және ағылшын) мамандығын бітірген. Мектеп қабырғасында ағылшын тілі мұғалімі ретінде жұмыс атқарған. Тұрмыс құрған, үш ер бала және бір қыз бала тәрбиелеп отыр.
      Алишарипов Айбек Тәуірбекұлы 1990 жылы 29 мамырда Т.Рысқұлов атындағы Қазақ экономикалық университетті Мемлекеттік және жергілікті басқару мамандығы бойынша магистратура бағдарламасын бітірген, ҚР Президенті жанындағы мемлекеттік басқару акаде-
миясында Мемлкеттік басқару докторлық бағдарламасын бітірген. Жұмыс өтілі – Алматы қаласы әкімшілігінде әртүрлі басқармаларында қызмет атқарған. Үйленген, үш ер бала тәрбиелеп отыр.
      Адам өмірі бақытты сәттерден құралады десек, осы бір отбасыңыз бен жұмысыңызда орын алған әрбір жетістіктің бақытты сәттері сіздің, отбасыңыздың бақытты сәтіне айналсын!